Молитвы святых угодников

С Новым годом и Рождеством!

Главная --> Молитвы --> Тропари

Тропари Р-Я.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. Р-Я.

Тропарь Рождеству Пресвятой Богородицы

Тропарь, глас 4:
Рождество Твое, Богородице Дево, радость возвести всей вселенной: из Тебе бо возсия Солнце Правды Христос Бог наш и, разрушив клятву, даде Благословение, н, упразднив смерть, дарова нам живот вечный.

Кондак, глас тойже:
Иоаким и Анна поношения безчадства, и Адам и Ева от тли смертныя свободистася, Пречистая, во святем Рождестве Твоем. То празднуют и людне Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.

Величание:
Величаем Тя, Пресвятая Дево, и чтим святых Твоих родителей, и всеславное славим Рождество Твое.

Тропарь преподобному Роману

Тропарь, глас 8:
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Романе, дух твой.

Тропарь благоверному князю Роману (Олеговичу) Рязанскому

Тропарь, глас 1:
Мученьми странноужасными и доблестию терпения всех преудивил еси, княже Романе: честных бо членов твоих по составом резание и всего телесе твоего раздробление претерпел еси за веру Христову. Темже и возшел еси к Престолу Царя Христа Бога и явился еси новый предстатель Церкве Рязанския. Молися убо ко Господу, да мир и благоденствие дарует граду нашему, и испроси у Него милость и спасение чтущим священную память твою, многострадальне.

Тропарь преподобному Роману Сладкопевцу

Кондак, глас 8:
Божественными добродетельми духа измлада украсився, Романе премудре, Церкви Христовой пречестное украшение был еси: пением бо прекрасным украсив ю, блаженне. Тем молим тя: подаждь желающим Божественнаго дарования твоего, яко да вопием ти: радуйся, отче преблаженне, красото церковная.

Тропарь благоверному князю Роману Угличскому

Тропарь, глас 4:
От младенства явился еси, правоверный княже Романе, избран от Бога благочестия столп необорим, веру непорочну соблюл еси, молитвами и милостынею и постом Богу угодил еси; темже и по смерти явися светлость жития твоего, исцеляеши бо недуги немощствующих, верою притекающих ко святому твоему гробу. Сего ради вопием ти: радуйся, угодниче Божий Романе, града Углича похвало и утверждение.

Тропарь преподобному Роману Киржачскому

Тропарь, глас 4:
От юности горячим желанием Божественныя любве разжигаем, житейския молвы оставль, преподобне, ученик великаго Сергия был еси, безмолвием и жестоким пребыванием, бдением и молитвою, постом последуя Христу, сего ради избранием учителя твоего, священства сподобляешися от руки блаженнаго Алексия и пастырь поставляшися обители, яже на Киржаче, в ней же трудолюбно пожив, ко Господу отходиши, Романе преподобне, моли о нас Христа Бога, со учителем своим преподобным Сергием, спастися душам нашим.

Кондак, глас 8:
Жития треволнения и мятеж мирский, и страстная взыграния в ничтоже вменив, пустынный трудолюбник показался еси, монахов наставник, Романе преподобне, иноков собиратель и молебный ко Господу честный рачитель, моли о нас Христа Бога со учителем твоим преподобным Сергием, спастися душам нашим.

Тропарь благоверному князю Ростиславу Михаилу Киевскому

Тропарь, глас 6:
Обрете тя, строителя градов и церквей, земля Киевская, великий княже Ростиславе, смуты устранял еси, единство храня, темже Господь, ти мудрость ниспосла, сего ради Христу Богу молися спастися душам нашим.

Тропарь преподобному Руфу, затворнику Печерскому, в Дальних пещерах

Тропарь, глас 8:
Послушание святое, нарицающееся живот, преподобне отче Руфе, прием, живот вечный оным постигл еси, идеже живя, не забуди и нас, хвалящих тя.

Тропарь преподобному Савве Вишерскому, Новгородскому

Тропарь, глас 4:
От юности твоея весь Богу поработился еси, блаженне, и Того ради любве отечество и род оставил еси, в пустыню вселився и в ней жестокое житие показав, чудес дарования от Господа приял еси, Савво преподобне, моли Христа Бога спастися душам нашим.

Тропарь преподобным Савве и Алексию затворнику, Печерским, в Ближних пещерах

Тропарь, глас 3:
Преблаженнии и Богоноснии отцы наши Савво и Алексие, яко стяжавшии дерзновение ко Господу равноангельным своим житием, егоже ради обогати Христос нетлением и чудесы мощи ваша, молим вас прилежно: испросите душам нашим очищение и велию и богатую милость.

Тропарь преподобному Савве Крыпецкому, Псковскому

Тропарь, глас 8:
Пустыни явился еси доброе насаждение, преподобне, от юности бо и в мире изволил еси чистое житие; ревнуя же большему, и дом отеческий оставил еси, и, вся красная мира сего презрев, от чуждых стран пришел еси во обители Богоспасаемаго града Пскова, и послушанию преподобнаго Евфросина предался еси; таже простирался умом еще к вящшему, вселился еси в пустыню, в нейже обитель пречестну воздвигл еси, и множество инок собрал еси, и их наставил еси на путь истинный. Темже и Христос, Емуже в жертву себе принесл еси, видев твоя благия труды, яко пресветла тя светильника, и по преставлении чудесы обогати, Савво, отче наш. Молися убо присно Ему о стране нашей, еже дароватися ей на враги победам, стаду же твоему от враг ненаветну пребыти, и всем нам спастися.

Тропарь преподобному Савве Освященному, Иерусалимскому

Тропарь, глас 8:
Слез твоих теченьми пустыни безплодное возделал еси и яже из глубины воздыханьми, во сто трудов уплодоносил еси, и был еси светильник вселенней, сияя чудесы, преподобне Савво, отче наш, моли Христа Бога, спастися душам нашим.

Тропарь святителю Савве II, архиепископу Сербскому

Тропарь, глас 4:
Исправление веры и образ кротости, и якоже сад посреде рая, преподобными делы твоими мир просвещаеши, сего ради к честней раце мощей твоих любовию прикасаемся, лобызаем их и верно вопием: предстани в помощь воспевающим память святую твою и светоносную, святителю отче Савво пребогате, молимся, Христу Богу молися спастися душам нашим.

Тропарь святому Савве I, архиепископу Сербскому

Тропарь, глас 3:
Пути вводящаго в жизнь, наставник и первопрестольник и учитель был еси: перве бо пришед, святителю Савво, отечество твое просветил еси, породив тое Духом Святым; яко древа маслинная в масленнем раи насадил еси всеосвященная твоя чада. Тем яко Апостолом и святителем сопрестольна, чтуще тя молим: моли Христа Бога даровати нам велию милость.

Тропарь преподобному Савве Сторожевскому, Звенигородскому

Тропарь, глас 8:
От юности божественною распаляемь ревностию, возлюбил еси чистое житие, презрев мира сего красная и суетная, последовал еси твоему Богомудрому учителю, преблаженному Сергию, в труде и бдении, в посте и подвизе: на Сторожи явлься безмолвия ради и стражи духовныя, недремленным на Божественней стражи предстоянием стяжал еси ум, зряй к Богу, и демонския козни и обстояния прозираяй: озарение Пресвятаго Духа в себе восприем, яко звезда пресветлая возсиял еси верным. Темже и премудр и светозарен предстоятель и пастырь стаду твоему явился еси, светом твоим просвещаяй и всех, приходящих тебе верою, отче наш Савво, и моли Христа Бога, да спасет души наша.

Тропарь мученику Савве Стратилату и с ним 70-ти воинам

Тропарь, глас 5:
Земнаго сана пояс оставив и почести, страдальче, пред мучителем, льстивым царем, Христа Бога суща исповедал еси, и Того ради многа страдания подъял еси, славне, тем прекрасным победы венцем увязлся еси от Царя всех царствующаго, с небесными вои светло преукрашен. Предстоя Тому, Савво, моли, да спасет души наша.

Тропарь преподобному Савватию Соловецкому

Тропарь, глас 3:
Удалився мира и водворися в пустыни, добрым подвигом подвизався, злостраданием, и вниманием, и молитвами. Отнудуже и по смерти источаеши исцеления, Савватие отче наш, моли Христа Бога спастися душам нашим.

Тропарь Пресвятой Богородице перед Ея иконой, именуемой «Самонаписавшаяся»

Тропарь, глас 1:
Чудотворней Твоей иконе, Богородице Дево, всеблагоговейно покланяемся и лобызаем ю, подаеши бо тою исцеления, здравие же и крепость душам и телесем воистинну. Темже любовию Тебе взываем: слава промышлению Твоему о нас, Чистая, слава милосердию Твоему к верным, слава Тебе, самоизобразившейся, Всеблагая Владычице.

Тропарь преподобному Сампсону странноприимцу

Тропарь, глас 4:
В терпении твоем стяжал еси мзду твою, отче преподобне, в молитвах непрестанно терпевый, нищия возлюбивый и сия удовливый, но молися Христу Богу, Сампсоне милостиве блаженне, спастися душам нашим.

Тропарь пророку Самуилу

Тропарь, глас 5:
От матере умоленный, тезоимените дания Божия, от Бога звания во младенчестве сподобися, честный пророче Самуиле, добре пасый непокоривыя люди и царем явивыйся устроитель, и о нас, верно чтущих тя, моли Истиннаго Бога, да спасет души наша.

Тропарь Пресвятой Богородице перед Ея иконой, именуемой «Свенская»

Тропарь, глас 4:
Днесь светло торжествует Свенская обитель; и радуется явлением образа Богоматери; Безмерный лик Печерских отцев с ними же и мы непрестанно вопием: Радуйся Благодатная Свенская Похвало.

Тропарь святителям Московским: Петру, Алексию, Ионе, Филиппу и Ермогену

Тропарь, глас 4:
Первопрестольницы Российстии, истиннии хранителие апостольских преданий, столпи непоколебимии, православия наставницы, Петре, Алексие, Ионо, Филиппе и Ермогене, Владыку всех молите мир вселенней даровати и душам нашим велию милость.

Кондак, глас 3:
Во святителех благочестно пожисте, и люди к богоразумию настависте, и добре Богу угодисте. Сего ради от Него нетлением и чудесы прославистеся, яко ученицы Божия благодати.

Величание:
Величаем вас, святителие велицыи, и чтим святую память вашу: вы бо молите за нас Христа Бога нашего.

Тропарь Божией Матери пред иконой Ея, именуемой «Свято-Крестовской»

Тропарь:
Чрез святую Твою икону, явленную нам на Кавказе Тобою, о Владычице, люди града Святого Креста от страшнаго агарянского нападения чудесно свободила еси, благая Вратарнице! Пленение, скорбь и узы в радость и свободу пременила еси, скоропослушнице наша. Молим тя, Матерь Божия, и на будущее время защищай всех нас, на Кавказе живущих чад Твоих, от нашествия агарянского, непрестанно молящеся у Креста Сына Твоего, Всенепорочная.

Кондак, глас 8:
Якоже дивным видением многими стоящую Тя на воздусе у Креста Сына Твоего, Богородице, молящуюся о людех града Святого Креста, в страшной беде сущих, агарянского пленения свободила еси, благая Вратарнице, сице и на будущее время православных людей Кавказа защищай от нападающих на грады и веси наши, от недуга, неверия, глада и вражды избавляй, непрестанно молящеся о нас у Креста Сына Твоего, да зовем Ти: радуйся, Святокрестовская Божия Мати, всего Кавказа защито и ограждение.

Тропарь святым отцам I Вселенского Собора

Тропарь, глас 8:
Препрославлен еси, Христе Боже наш, светила на земли отцы наши основавый, и теми ко истинней вере вся ны наставивый, Многоблагоутробне, слава Тебе.

Кондак, глас 8:
Апостол проповедание и отец догматы, Церкви едину веру запечатлеша, яже и ризу носящи истины, исткану от еже свыше богословия, исправляет и славит благочестия великое таинство.

Тропарь Пресвятой Богородице перед Ея иконой, именуемой «Себежская» или «Опочецкая» (Умиление)

Тропарь, глас 8:
Взыдем, православнии народи града Опочки, на тучную гору, яко на Фаворскую, в дом Спасителя своего, в честь боголепнаго Преображения Его, обилующу чудес и стократный клас израстившую, и узрим славу чудесе от чудотворнаго образа Пресвятыя Богоматере Умиления Себежския: яко море пролияся и Евфрат, текий из рая, тако слезы Ея быша, из обою оку пролитыя, о нашедшем гневе Создателя Своего за наше согрешение, припадем, каменносердечнии, и возрыдаем, просяще: о Владычице, умоли Сына Своего и Господа нашего сими пресвятыми Своими слезами, да избавит нас от всякаго злаго обстояния, и огненнаго запаления, и междоусобныя брани, от мора и глада, и нашествия иноплеменных в грядущия времена, и, радующеся, со Гавриилом благовестником возопием Ти: радуйся, Обрадованная, Господь с Тобою.

Величание:
Величаем Тя, Пресвятая Дево, Богоизбранная Отроковице, и чтим образ Твой честный, имже показала еси нам пречудное знамение.

Тропарь преподобному Севастиану Карагандинскому, исповеднику

Тропарь, глас 3:
Троицы Святыя служителю, земне ангеле и небесне человече, духовнаго Оптинскаго старчества преемниче, Христов священнотаинниче и исповедниче, Духа Святаго обитель всечестная, преподобне отче Севастиане, досточтиме, испроси мирови мир и душам нашим велию милость.

Тропарь преподобному Севастиану Сохотскому, Пошехонскому

Тропарь, глас 4:
Удалився мира и водворився в пустыни, добрым подвигом подвизася, злостраданием, и вниманием, и молитвами, отонюдуже и по смерти источаеши исцеления, Севастиане, отче наш, моли Христа Бога спастися душам нашим.

Тропарь святым семи отрокам, иже во Ефесе

Тропарь, глас 4:
Велия веры чудесе, в пещере яко в чертозе царском святии седмь отроцы пребыша, и умроша без тли, и по мнозех временных восташа яко от сна, во уверение воскресения всех человеков: тех молитвами, Христе Боже, помилуй нас.

Кондак, глас 4:
Мира сущая тленная презревая и нетленныя дары приемше, умерше кроме тления пребыша: темже востают по многих летех, все погребше лютех неверие: яже во хвалении днесь вернии восхваляюще, Христа воспоим.

Тропарь святителю Серапиону, архиепископу Новгородскому

Тропарь, глас 8:
Твердый адамант воистинну, отче, показался еси, во всем подобяся Владыце своему и Господу, неправедная изгнания, радуяся, претерпел еси, темже и Христос святителем и мучеником сликовна тя сотвори и дарова тя стаду твоему, яко сокровище неотъемлемо, чудесы всех обогащающее, яко да и мы, сошедшеся к раце мощей твоих, любовию вопием ти: о великий во святителех и дивный во страдальцех пречестный архиерею, Серапионе отче наш, моли о нас всеблагаго Бога, да спасет души наша.

Тропарь преподобному Серапиону Псковскому

Тропарь, глас 8:
Изрядством жития чистоту девства приим, Серапионе, и вся красная мира сего возненавидев, Христа Единаго возлюбил еси. Сего ради во внутреннюю пустыню вселився и со зверьми живый, весь Христов спостник и друг Евфросина учителя твоего был еси, тем же и молим тя, поминай нас, чтущих святую память твою, да зовем ти: радуйся, пустынныя похвало, преподобне отче наш.

Тропарь священномученику Серафиму (Чичагову), митрополиту Петроградскому

Тропарь, глас 5:
Воинство Царя Небеснаго паче земнаго возлюбив, служитель пламенный Святыя Троицы явился еси. Наставления Кронштадтскаго пастыря в сердце своем слагая, данная ти от Бога многообразная дарования к пользе народа Божия преумножил еси. Учитель благочестия и поборник единства церковнаго быв, пострадати даже до крове сподобился еси. Священномучениче Серафиме, моли Христа Бога спастися душам нашим.

Тропарь преподобному Серафиму Вырицкому

Тропарь, глас 8:
Крест приим свой, преподобне, радуяся нераздельным помыслом последовал еси Христу. Был купец еси воистину преславный, яко не земное, но небесное сокровище стяжа. Сего ради спасошася тобою мнози чада твоя, ихже возлюбил еси. И ныне, отче наш Серафиме, шлися покаяние нам даровати и в разум истины прийти.

Тропарь преподобному Серафиму, Саровскому чудотворцу

Тропарь, глас 4:
От юности Христа возлюбил еси, преподобне, и Тому Единому поработати пламенно вожделел еси, в пустыннем житии твоем непрестанною молитвою и трудом подвизался еси, умиленным сердцем любовь Христову стяжав, Небесным Серафимом в песнословии споборниче, в любви притекающим к тебе Христу подражателю, темже избранник возлюблен Божия Матере явился еси, сего ради вопием ти: спасай нас молитвами твоими, радосте наша, теплый пред Богом заступниче, Серафиме блаженне.

Тропарь мученику Серафиме деве, Римской

Тропарь, глас 8:
Невесто Христова возлюбленная, Серафимо, наследнице Царствия Небеснаго, добре за Господа пострадавшая и кровию твоею обагренная и, аки царскою багряницею, украшенная, поминай нас, совершающих святую память твою.

Тропарь мученикам Сергию и Вакху

Тропарь, глас 5:
Удобрение Христовых страстотерпец и очи Христовы Церкве, очи просветите душ наших, Сергие многострадально и Вакше преславне: молитеся ко Господу, яко да убежим тьмы греховныя и Света явимся общницы невечерняго молитвами вашими, святии.

Тропарь преподобным Сергию и Герману Валаамским

Тропарь, глас 4:
Евангелия Христова истиннии послушницы явистеся, преподобнии, мир и вся яже в нем, яко не сущая, преобидевше любве ради Христовы, и в морский остров вселистеся, и трудолюбие в нем противу невидимых врагов кознем подвизастеся, постом, бдением же и всенощным стоянием плоти своя духу мудре повинули есте: сего ради от Вседержительныя десницы достойныя венцы прияли есте. И ныне Пресвятей Троице предстояще, молитеся, всеблаженнии отцы, Сергие и Германе, спастися душам нашим.

Иной тропарь, глас 1:
От мирския молвы бегающе, безмолвия и благочестия рачители, в тихое пристанище Валаама от востока приидосте, и в нем евангельски Христу добродетельми последовавше, на верх совершенства востекли есте: и ныне в торжестве премирном богозрением наслаждающеся, всеблаженнии отцы Сергие и Германе, Человеколюбца Бога молите, еже спасти всех нас, благочестно вас почитающих.

Тропарь преподобным Сергию и Никону, Радонежским

Тропарь, глас 8:
Яко трисветлаго солнца светозарныя звезды, Тройческим светом озаряете сердца верных, сосуды Света Пресвятыя Троицы явльшеся, и предивным вашим житием иноком бысте твердии законоположителие, и церквам благолепие, и благоверным, и святителем, и всем людем, вся бо демонския скверны отгнавше отсюду вашими чистыми учении и делы, добре упасосте стадо, собранное вами, но и ныне молим вас: посещайте чад своих, яко имущие дерзновение ко Святей Троице, Богомудре, Сергие с чудным учеником своим Никоном, и молите Христа Бога да спасет души наша.

Тропарь преподобному Сергию Нуромскому (Вологодскому)

Тропарь, глас 8:
Желанием духовным разгарашеся, пребогате, слез твоих течением душу свою напоил еси и еже из глубины воздыханьми уязвляше сердце свое, и бодренными молитвами, и всенощным предстоянием Владыце Христу многодобродетелен плод принесе сам себе. И сего ради яко Божий угодник светло миру показася, сияя чудесы, Сергие отче наш, теплый молитвенниче к Богу, всегда о нас Того моли, да спасет души наша.

Тропарь преподобному Сергию Шухтомскому

Тропарь, глас 8:
Бденными молитвами и потоки слезными пустыню напоил еси и из глубины воздыханьми ю расплодил еси и бысть постнически равно Ангелом житие твое; страдальчески бореньми, яже от бесов и от ненаказанных человек, претерпел еси и Ангелом собеседник явися, Божественнаго винограда насеятель быв; и, оставив временное житие, преселился еси в жилище Небесное. Темже тя почитаем, преподобне отче наш Сергие, моли Христа Бога спастися душам нашим.

Тропарь преподобному Сергию Радонежскому

Тропарь, глас 4:
Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником: темже и вселися в тя Пресвятый Дух, Егоже действием светло украшен еси: но яко имея дерзновение ко Святей Троице, поминай стадо, еже собрал еси мудре, и не забуди якоже обещался еси, посещай чад твоих, Сергие преподобне, отче наш.

Тропарь, глас 4 (Обретение мощей):
Днесь пресветло красуется царствующий град Москва, яко светолучными зарями, молниями чудес твоих осияемь, всю вселенную созывает похвалити тя, Богомудре Сергие; пречестная же и славная обитель твоя, юже во Имя Святыя Троицы многими труды твоими создал еси, отче, имущи в себе стада ученик твоих, веселия и радости исполняется. Мы же, празднующе преславное обретение честных мощей твоих, в земли сокровенных, яко цвет благоуханен и кадило благовонно, любезно я лобызающе, различная исцеления приемлем и твоими молитвами грехов прощения сподобляемся, отче преподобне Сергие, моли Святую Троицу спасти души наша.

Тропарь, глас 8:
От юности восприял еси Христа в души твоей, преподобне, и паче всего возжелал еси мирскаго мятежа уклонитися: мужески в пустыню вселился еси, и чада послушания в ней, плоды смирения возрастил еси. Тем быв Троице вселение, чудесы твоими всех просветил еси, приходящих к тебе с верою, исцеления всем подавал обильно, отче наш Сергие, моли Христа Бога, да спасет души наша.

Тропарь Силе, Силуану, Крискенту, Епенету и Андронику, апостолам от 70-ти

Тропарь, глас 3:
Лик пяточисленный апостол Христовых песньми восхвалим, Силу, Силуана, Крискента, Андроника со Епенетом, сии бо идольскую лесть обличиша и, неверныя в веру уловивше, молят непрестанно о всех, память их величающих.

Тропарь преподобному Силуану Афонскому
:
Тропарь, глас 2
Серафимския любве ко Господу пламенный ревнителю, и Иеремии, о народе плачущему, усердный подражателю, всеблаженне отче Силуане, ты зову Матере Господа сил внемляй, змия греховнаго мужемудренно изрыгнул еси, и в гору Афонскую от суеты мира удалился еси, идеже в трудех и молитвах со слезами благодать Святаго Духа обильно стяжа. Еюже сердца наша воспламени и с тобою умильно взывати укрепи: Господи мой, жизнь моя и радосте святая, спаси мир и нас от всяких лютых.

Кондак, глас 2:
Смиренномудрия исповедниче предивный, и человеколюбия духом святым согреваемая доброто, Богу возлюбленне Силуане, о подвизе твоем Церковь Российская радуется, иноцы же горы Афонския и вси христианстии людие, веселящеся, сыновнею любовию к Богу устремляются. Егоже моли о нас, равноангельне боговедче, во еже спастися нам, в горении любве тебе подражающим.

Величание:
Ублажаем тя, преподобне отче Силуане, и чтем святую память твою, наставниче монахов и собеседниче Ангелов.

Тропарь преподобному Силуану, схимнику Печерскому, в Дальних пещерах

Тропарь, глас 3:
Многаго ти ради воздержания и безмернаго пощения приемый свыше благодать чудотворения и к Богу велие дерзновение стяжавый, постником удобрение, Силуане, Тому молися, да подаст нам мир и велию милость.

Тропарь преподобному Сильвестру Обнорскому

Тропарь, глас 6:
Иже измлада Христа возлюбив и верою к Нему приближся, изнурил еси, в пустыни живый, многострадальное тело твое. Тем, блаженне Сильвестре, со Ангелы ликовствуя, моли Христа Бога мир мирови даровати и буди помощник верою призывающим тя на помощь и чтущим святую память твою.

Тропарь праведному Симеону Богоприимцу

Тропарь, глас 4:
Симеон старец днесь веселится, восприят на руку свою Младенца Превечнаго Бога, от уз плоти разрешитися прося и вопия: видеста очи мои спасение Твое мирови.

Тропарь преподобному Симеону Новому Богослову

Тропарь, глас 3:
Божественное озарение, Симеоне отче, восприяв в души твоей, светило в мире показался еси светлейшее, разгоняя того мракобесие и всех уверяя искати, юже погубиша, благодать Духа, Егоже прилежно моли даровати нам велию милость.

Тропарь священномученику Симеону, сроднику Господню

Тропарь, глас 1:
Христова тя сродника, Симеоне священноначальниче, и мученика тверда священно восхваляем, прелесть потребившаго и веру соблюдшаго. Темже, днесь всесвятую твою память празднующе, грехов разрешение молитвами твоими приемлем.

Тропарь преподобному Симеону Столпнику Дивногорцу

Тропарь, глас 1:
Пустынный житель, и в телеси Ангел, и чудотворец явился еси, Богоносе, отче наш Симеоне, постом, бдением, молитвою Небесная дарования приим, исцеляеши недужныя и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.

Тропарь преподобному Симеону Столпнику

Тропарь, глас 1:
Терпения столп был еси, ревновавый праотцем, преподобне: Иову в страстех, Иосифу во искушениих, и безплотных жительству, сый в телеси, Симеоне, отче наш, моли Христа Бога, спастися душам нашим.

Тропарь праведному Симеону Верхотурскому

Тропарь, глас 4:
Мирскаго мятежа бегая, все желание обратил еси к Богу, да в видения восход обрящеши Горе, отнюдуже не уклонився в лукавствия сердца, но очистив душу и тело, приял еси благодать точити цельбы верным и неверным, притекающим к тебе, праведный Симеоне. Темже, по данному ти дару, испроси у Христа Бога исцеление нам, болящим душевными страстьми, и моли спасти души наша.

Тропарь, глас 4 (Перенесение мощей):
Днесь радуется славная страна Сибирь, обретши святыя твоя мощи внутрь себе. Архиереи, священницы и воеводы и весь сонм людский, духовне веселящеся, вопием ти: о, богомудре Симеоне! Избави нас, иже к тебе прибегающих, от всех бед, просяще подати всем по коегождо прошению и избавитися стране сей и граду от огненнаго запаления и поганскаго нашествия и междоусобныя брани и от всякаго зла: тем же и мы вси чтем честных и многоцелебных мощей твоих обретение, новый целебниче, и вопием: слава Давшему тобою всем исцеление!

Тропарь святителю Симеону, епископу Полоцкому

Тропарь, глас 4:
Правило веры, и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Симеоне, моли Христа Бога спастися душам нашим.

Тропарь Симону, епископу Владимирскому и Суздальскому

Тропарь, глас 1:
Житий преподобных отец Печерских списателю известный, святителю Христов Симоне всеблаженне, молися прилежно с ними Христу Богу, да управит в мире живот наш, и в книги животныя да напишет ны, спасая души наша.

Тропарь преподобному Симону Воломскому

Тропарь, глас 4:
От юности твоея вперив ум твой к Богу, блаженне Симоне, мира же отвергся, вселился еси в пустыню непроходимую, и тамо, от Господа укрепляемь, в молитвах и пощениих доблественне пожил еси, и жизнь твою страдальчески убиением от сынов противления скончал еси. Сего ради со преподобными и мученики венчался еси, с ними же и ныне предстоиши Престолу Пресвятыя Троицы. Сию моли, молим тя, оставление подати согрешений наших и даровати нам велию милость.

Тропарь преподобному Симону Радонежскому

Тропарь, глас 5:
Радуйся, пустыне Радонежская, израстившая крин духовный, вертограде преподобного Сергия: Симона, архимандрита Смоленского, познавшаго светлость послушания и дивнаго птиц видения сподобившагося, сего воспоминающе, Бога прославляем.

Кондак, глас 2:
Возлюбив, преподобне, Божественныя заповедн, чистотою душевною вооружився, непрестанною молитвою и трудом в пустыни Сергиевой подвизался есн, Христа, Сладчайшаго Иисуса, достигл еси, Его же моли непрестанно о всех нас.

Тропарь блаженному Симону, Христа ради юродивому, Юрьевецкому чудотворцу

Тропарь, глас 8:
Яко воистинну гласа апостольскаго послушатель был еси, блаженне Симоне, Христа бо ради изволив имети буйство, в немже соблюл еси твоя к Богу добродетели, посреде молв некрадомы, терпением убо пачеестественным Христу подражав, посрамил еси льстиваго всю гордыню, тем и в лютых ранах, якоже древний Лазарь, в недра Авраамля преселился еси, идеже и ныне утешался, посещай град твой, почитающий любовию святую память твою.

Кондак, глас 4:
Возгоревся рачением Горним, жестость (суровость) вольнаго юродства паче всех сладких мира предпочел еси, отонудуже повннуся ти огнь, от егоже запаления град твой Юрьевец избавил еси, и воды немокренно, яко по суху прешел есн, и хотящия быти предрекл прославльшу тя тако Богу, к Немуже моляся, и о нас, поющих блаженне Симоне, поминай.

Тропарь преподобному Сисою Великому

Тропарь, глас 2:
Плотския страсти умертвив воздержанием, миру распялся еси и, в пустыни живый, всех похотей отсечением Ангел земный и Небесный человек показался еси, сего ради тя, яко наставника иноком, поем, Сисое отче наш, и просим: моли Христа Бога, да спасет души наша.

Тропарь преподобному Сисою, схимнику Печерскому, в Дальних пещерах

Тропарь, глас 1:
Пустынный житель, и в телеси Ангел, и чудотворец явился еси, Богоносе отче наш Сисое, постом, бдением, молитвою Небесная дарования приим, исцеляеши недужныя и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.

Тропарь Пресвятой Богородице перед Ея иконой, именуемой «Скоропослушница»

Тропарь, глас 4:
Богородице притецем, сущий в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся. Тебе бо рабы Твои в нуждах готовую Помощницу имамы.

Кондак, глас 8:
В море житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.

Тропарь Пресвятой Богородице перед Ея иконой, именуемой «Сладкое целование»

Тропарь, глас 7:
Одержащей ереси, о честней иконе Твоей, Дево, яве промышляеши: морешествием Твоей обители яко дар достоин приношаеши. Сию же мы Сладколюбящую праве нарицающе, Тя ублажаем.

Тропарь Пресвятой Богородице перед Ея иконой, именуемой «Одигитрия»

Тропарь, глас 4:
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Слава, и ныне, Богородичен:
Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких вед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Кондак, глас 6:
Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих тя.

Ин кондак, глас 6:
Не имамы иныя помощи, не имамы иныя надежды, разве Тебе, Владычице: Ты нам помози, на Тебя надеемся и Тобою хвалимся: Твои бы есмы раби, да не постыдимся.

Тропарь Собору Архангела Гавриила

Кондак, глас 2:
На Небесех зря Божию славу и на земли с высоты подая благодать, начальниче Ангелов, мудре Гаврииле, Божия славы служителю и мира Божественный поборниче, спасай, соблюдай вопиющия ти: сам буди помощник, и никтоже на ны.

Иной кондак, глас 2:
Архистратиже Божий, служителю Божественный славы, Ангелов начальниче и человеков наставниче, полезное нам проси и велию милость, яко безплотных Архистратиг.

Тропарь Собору Белорусских святых

Тропарь, глас 5:
Почти Господь Белорусский край святыми, Ему благоугодившими: святители, мученики, преподобными и праведными, верно Господеви послужившими и мзду трудов приявшими. К тем же ныне и мы вопием: о нас молитеся ко Господу, да в вере и делех плод добр принесем.

Величание:
Величаем вас, святии Белорусския земли, и чтим святую память вашу, вы бо молите о нас Христа Бога нашего.

Тропарь Собору Пресвятой Богородицы

Тропарь, глас 4:
Пречистая Богомати, Богородице, Собор Твой честный украшен многоразличными добротами, дары Ти приносят, Госпоже, многи мирстии людие, узы наша грешныя раздери Своею милостию и спаси души наша.

Тропарь всем святым Болгарским

Тропарь, глас 4:
Собор ваш честный почитающе и память святую празднующе, святии, от болгар просиявшии, прилежно молим вы: Господа о всех молите, паче же о присных, сохранитися земли Болгарстей от всяких бед и народу утвердитися на веки в вере Православней, яко да, мирное житие благочестно поживше, вкупе с вами улучим вечное Отечество в блаженнем Христа Бога Царствии.

Тропарь Собору Владимирских святых

Тропарь, глас 4:
Днесь светло красуется Пресвятыя Богородицы избранный град и с ним вси концы земли Владимирския торжествуют, память совершающее богопрославленнаго великаго лика святых, в подвизех Православныя веры издревле во уделе сем Богу угодивших, и к ним с любовию вопиют: о, предивнии Христу Богу молитвенницы, венцы пресветлыми от Него увенчанныя, мир и благоденствие отечеству вашему испросите и душам нашим велию милость.

Тропарь Собору Вологодских святых

Тропарь, глас 8:
Яко светильницы всесветлии, явистеся в пределех града Вологды, преподобнии отцы наши, Вологодстии чудотворцы: вы бо, крест Христов от юности своея на рамена вземше, усердно Тому последовали есте, чистотою Богови приближившеся, от Негоже и чудес дарованием обогатистеся; темже и мы, с верою к вам притекающе, умильно глаголем: отцы преподобнии, молите Христа Бога спастися душам нашим.

Величание:
Величаем вас, чудотворцы наши славнии Вологодстии, страну северную лучами добродетелей озарившии и образ спасения верным светоявленно показавшии.

Тропарь Собору всех Волынских святых

Тропарь, глас 4:
Приспе день светлаго торжества, людии Волынстии радуются, и с ними вся Российская Церковь ликовствует во псалмех и пениих, и песнех духовных, днесь бо, яко же солнце незаходимое, всем возсия память святых и Богомужных угодников и чудотворцев Волынских святителя Стефана чуднаго, иерархом Волынским первопрестольника, и святаго благовернаго Ярополка, блаженнаго страдальца Богомужнаго, и с ними Амфилохия святителя Волынскаго, и победоноснаго Феодора, Острожскаго князя Богодарованнаго, и преподобнаго Иова Почаевскаго присноблаженнаго, ихже молитвами, Господи, землю отеческую нашу в Православии и мире утверди, и спаси всех имуще купно о нас Молитвенницу усердную, Пресвятую Матерь Свою Богородицу, благодатне сияющую в цельбоносней стопе Своей и чудотворней иконе на горе Почаевстей и заступленьми прочих угодников Волынския паствы, Иулиании, блаженныя девы Ольшанския, и святаго преподобномученика Макария, архимандрита Овручскаго.

Тропарь Собору всех преподобных отцев Киево-Печерских

Тропарь, глас 2:
Егда снидосте во гробы и самех себе заключисте, тогда, страсти умертвивше плотския, спогребостеся Христу, Богоноснии, и диавольския в подземных разрушисте ограды, сего ради Ангели венцы с Небес вам подают.

Тропарь Собору славных и всехвальных двенадцати апостолов

Тропарь, глас 4:
Апостолов первопрестольницы и вселенныя учителие, Владыку всех молите мир вселенней даровати и душам нашим велию милость.

Тропарь Собору Предтечи и Крестителю Господню Иоанну Предтече

Тропарь, глас 2:
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго: тем же за истину пострадав, радуяся, благовестил еси и сущим во аде Бога, явльшагося плотию, вземлющаго грех мира и подающаго нам велию милость.

Кондак, глас 6:
Плотскаго Твоего пришествия убоявся Иордан, страхом возвращашеся, пророческое же служение исполняя Иоанн, трепетом спряташеся, Ангельстии чини ужасахуся, зряше Тя во струях плотию крещаема, и вси сущии во тьме озаряхуся, воспевающе Тя, явльшагося и просветившаго вся.

Тропарь Собору Костромских святых

Тропарь, глас 4:
Днесь град Кострома вельми вами хвалится: в пределех бо земли Костромския, яко звезды светозарныя, возсиявше, чудесы своими вся озарили есте и ныне молитеся ко Господу, отцы преблаженнии, Геннадие, Паисие, Авраамие, Иакове, Макарие и Пахомие, со инеми многими нашего края Небесными покровителями за град Кострому и всяк град, и страну, и люди, верою и любовию вас почитающия, и о спасении душ наших.

Величание:
Ублажаем вас, преподобне отче наш Геннадие и всех святых отцев собор, Костромского края покровителей, вы бо молите за нас Христа Бога нашего.

Тропарь Собору новомучеников и исповедников Российских

Тропарь, глас 4:
Днесь радостно ликует Церковь Русская, яко мати чада, прославляющи новомученики и исповедники своя: святители и иереи, царственныя страстотерпцы, благоверныя князи и княгини, преподобныя мужи и жены и вся православныя христианы, во дни гонения безбожнаго жизнь свою за веру во Христа положившия и кровьми Истину соблюдшия. Тех предстательством, Долготерпеливе Господи, страну нашу в православии сохрани до скончания века.

Кондак, глас 3:
Днесь новомученицы Российстии в ризах белых предстоят Агнцу Божию и со Ангелы песнь победную воспевают Богу: благословение, и слава, и премудрость, и хвала, честь, и сила, и крепость нашему Богу во веки веков. Аминь.

Тропарь Собору новомучеников Христовых во взятии Царяграда пострадавших

Тропарь, глас 3:
Новии мученицы, древнюю прелесть твердым борением низложившии, вознесоша веру православных, беззаконное бо служение уничиживше, дерзновенно Христа проповедаша, Бога совершенна, и ныне непрестанно молятся даровати нам велию милость.

Тропарь собору Оптинских старцев.

Тропарь собору преподобных отцев и старцев, в Оптиной пустыни просиявших

Тропарь, глас 6:
Православныя веры светильницы, монашества непоколебимии столпи, земли Российския утешителие, преподобнии старцы Оптинстии, любовь Христову стяжавшии и души своя за чада полагавшии, молитеся ко Господу, да утвердит земное отечество ваше в православии и благочестии и спасет души наша.

Кондак, глас 4:
Воистину дивен Бог во святых Своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеления дароваша, ныне же, во славе Божией пребываеше, молятся непрестанно о душах наших.

Тропарь Собору преподобных отцев Хиландарского монастыря

Тропарь, глас 4:
Отцы наши Богоблаженнии, Афонстии подвижницы, Хиландарстии светильницы, непоколебимии столпи Православия, истиннии наставницы евангельских преданий, Владыку всех, Христа, молите мир вселенней даровати и душам нашим велию милость.

Величание:
Величаем вас, святителие Христовы, и чтим всечестный собор ваш, вы бо молите за нас Христа Бога нашего.

Тропарь Собору преподобных отцев Киево-Печерских, в Ближних пещерах

Тропарь, глас 4:
Столп огнезрачный и светоносное солнце, возсиявшее на горе Печерской, великаго Антония со всем собором богоносных отец приводим Тебе, Христе, в молитву, ихже ради молим, подаждь обители нашей благодать и душам нашим велию милость.

Тропарь Собору преподобных отцев Киево-Печерских, в Дальних пещерах

Тропарь, глас 4:
Мысленное солнце и светлую луну, первоначальных Печерских, со всем собором преподобных днесь почтим, тии бо, церковную твердь озаряюще, просвещают во тьме страстей бедствующих, и подают от Христа Бога молитвами своими помощь во всех скорбех, и душам нашим просят избавления.

Тропарь Собору Пресвятой Богородицы

Тропарь, глас 4:
Пречистая Богомати, Богородице, Собор Твой честный украшен многоразличными добротами, дары Тя приносят, Госпоже, многи мирстии людие, узы наша грешныя раздери Своею милостию и спаси души наша.

Тропарь Собору Радонежских святых

Тропарь, глас 4:
Днесь светло празднуем, вернии людие, преславныя Троицкия обители торжество: се бо велий собор святых чудотворцев Радонежских, яко дивныя птицы небесныя, являет нам Церковь Российская, стезями честнаго их жития шествовати всех призывающи, к нимже, с верою и любовию притекающе, воззовем: молитеся о нас ко Пресвятей Троице, преподобнии отцы наши с Богоносным аввою Сергием, мир мирови даровати и душам нашим велия милости.

Величание:
Величаем вас, вси святии земли Радонежския, и чтим святую память вашу, вы бо молите за нас Христа Бога нашего.

Тропарь Собору Ростово-Ярославских святых

Тропарь, глас 4:
О благочестный соборе, о людие избраннии, святителие, преподобнии и праведнии, и благовернии граждане российстии, яко звезды, на тверди церковней страны Ростовския и Ярославския к Богу предстателие, величаем с любовию вас, по плоти наших сродников. Вы же молитеся даровати мир стране и Церкви нашей, благословение и милость Божию всем людем, всепрощение и спасение, ходатаи бо есте приснии о нас ко Святей Троице.

Тропарь Собору Рязанских святых

Тропарь, глас 8:
Святии вси земли Рязанстей и Муромстей просиявшии, приснии наши молитвенницы и заступницы, молите Владыку Христа Бога нашего мир вселенней даровати и душам нашим велию милость.

Тропарь святителям Ростовским

Тропарь, глас 4:
Святителие премудрии, паствы вашея учителие богопросвещеннии, веру евангельскую в людех преумножившии, любве Небесныя на земли достоподражательнии образи, люди страны Ростовския и Ярославския приобщавшии спасению, служителие воистинну Божии и сопричастницы апостолов достойнии явилися есте, Леонтие священномучениче, Исаие, Игнатие, Иакове, Феодоре и златословесниче Российский Димитрие, Христа Бога молите о архиереех, на престоле вашем преемницех, о людех, благочестно вас почитающих, о стране нашей православной и о всей Христовей Церкви.

Тропарь Собору Сербских святых

Тропарь, глас 4:
Первосвятителие Богоноснии, отцы наши, яко просветителие сербстии, святии первопастырие и патриарси, истиннии хранителие апостольских преданий, столпи непоколебимии, Православия наставницы, Владыку всех Христа молите мир вселенней даровати и душам нашим велию милость.

Тропарь Собору Сибирских святых

Тропарь, глас 3:
Церкве Христовы светильницы, всея России украшение, святии вси, в земли Сибирстей просиявшии, Владыку всех молите мир вселенней даровати и душам нашим велию милость.

Величание:
Величаем вас, святии вси в земли Сибирстей просиявшии, и чтим святую память вашу, вы бо молите за нас Христа Бога нашего.

Тропарь Собору Смоленских святых

Тропарь, глас 4:
Соборе святых земли Смоленский, водами священнаго Днепра омовенныя, святителие, преподобнии, страстотерпцы и благовернии, апостольскую веру соблюдшии, се ныне, Святей Троице с Богородицею и лики Безплотных предстояще, водами благочестия землю Русскую напаяете, дарующе православным помощь Небесную во утверждение веры и спасение душ наших.

Тропарь Собору Тверских святых

Тропарь, глас 4:
Иже в земли Тверской прославльшиися, святителие, мученицы, преподобнии, праведнии и вси святии, верою, подвиги благочестия, любовию, кротостию, словом и житием Богу благоугодившии и венцы нетления и славы украсившиися, молите Христа Бога нашего даровати мир стране нашей и душам нашим в мире спастися.

Величание:
Величаем вас, страны Тверския покровители, и чтим святую память вашу, вы бо молите за нас Христа Бога нашего.

Тропарь Собору Тульских святых

Тропарь, глас 2:
Наста день светлаго торжества, земля наша радуется, и с нею Церковь Христова веселится, в прославлении собора Тульских святых, Богу угодивших; к ним же мы притекающе, взываем сице: о, преславнии сродницы наши, молите Христа Бога, даровати миру мир, отечеству благоденствие, и душам нашим велию милость.

Величание:
Величаем вас, святии вси, в земли Тульстей просиявшии, и чтим святую память вашу, вы бо молите о нас Христа Бога нашего.

Величание (святым воинам, на Куликовом поле за веру и Отечество души свои положившим):
Величаем вас, святый благоверный княже Димитрие и мученицывоини, и почитаем честную память вашу, вы бо на поле Куликове за веру и Отечество души своя положивше, подвигом любви землю Российскую прославили есте.

Тропарь всем Соловецким святым

Тропарь, глас 4:
Взыскующе Христа вожделенного бисера во страну полунощную востекли есте, и подвигом первоначальников Соловецких поревноваше, леса и пустыни облагоухали есте своими Богоугодными молитвами. Темже и Христос вас прослави, и мы вам вопием: вси святии Соловецтии, молите Бога спастися душам нашим.

Кондак, глас 3:
Духовнаго жительства желающе устремитеся в суровыя островы Беломория и, безбедно преплывше житейское море, соблазнов мирских избегосте и в радости велией водворитеся. Непрестанным умным восхождением Бога достигли есте и нас учите небесному восходу.

Тропарь святым сорока мученикам Севастийским

Тропарь, глас 1:
Болезньми святых, имиже о Тебе пострадаша, умолен буди Господи, и вся наша болезни исцели Человеколюбче, молимся.
:
Кондак, глас 6:
Все воинство мира оставльше, на небесах Владыце прилепистеся, страстотерпцы Господни четыредесять: сквозе огнь бо и воду прошедше, блаженнии, достойно восприясте славу с небес и венцев множество.

Тропарь, глас 1:
Страстоносцы всечестнии, воини Христовы четыредесяте, твердии оружницы, сквозе огнь и воду проидосте, и ангелом сограждане бысте, с нимиже молитеся Христу о иже верою хвалящих вас: слава давшему вам крепость, слава венчавшему вас, слава подавающему вами всем исцеления.

Тропарь, глас 3:
Страстотерпцы Христовы четыредесяте, во граде Севастийстем мужественно пострадавшии, чрез огонь и воду прошедшии, в покой вечный вшедшии, молитеся о нас ко Господу, да жизнь нашу мирну сохранит, и души наша спасет, яко Человеколюбец.

Величание:
Величаем вас, святии мученицы, и чтем честная страдания ваша, яже за Христа претерпели есте.

Тропарь иконе Софии, Премудрости Божией

Тропарь, глас 1:
Превечная Премудросте, Христе Боже наш! Божественным смотрением Своим преклонивый Небеса, благоволил еси вселитися во утробу Чистыя Отроковицы, средостение вражды разрушив, освятил еси естество наше и Царствие Твое нам отверзл еси; сего ради Тебе, Творца нашего и Избавителя, и рождшую Тя, спасения нашего тайне послужившую Деву Чистую, православно величаем.

Тропарь преподобной Софии Суздальской

Тропарь, глас 4:
Вышняго красотою явственно украшаяся, постническими бо труды подвизася преподобная София, и бысть наследница Небесному Царствию, и вниде в Небесный Чертог насладитися Христовы красоты, Его же моли спастися граду Суждалю от поганых нахождений и междоусобныя брани и подаждь душам нашим велию милость.

Кондак, глас 1:
Нощи страстныя избегши, богомудрая Софие преподобная, к Незаходимому же Солнцу, Христу, пришедши, умертвила еси плотское мудрование постом же, воздержанием и молитвами, показася равна ангелом, на земли бо поживе и духи нечистыя от человек отгнала еси, и различная исцеления подаваеши, от многих бед и зол избавляеши, Софие преподобная, моли спастися душам нашим.

Тропарь святой праведной Софии, княгини Слуцкой

Тропарь, глас 5:
Блаженная мати Софие, нетлением мощей и чудес сиянием почти тя Бог, поминающе твое праведное житие, тя молим испросити телесем нашим здравие и душам спасение.

Кондак, глас 4:
Приидите вси русстии жены, святую Софию восхвалим, уподобившуюся мудрым девам, елей благодати Духа Святаго стяжавшим; темже умудри тя Господь подвизатися во утверждении святыя Православныя веры и соблюдати Церковь Его непозыблему от ересей и расколов, сего ради благодарно воспоем ти: радуйся, града Слуцка и всея земли нашея радосте и утверждение.

Величание:
Величаем тя, святая праведная княгине Софие, и чтим святую память твою, ты бо молиши за ны Христа Бога нашего.

Тропарь святителю Софронию, епископу Иркутскому

Тропарь, глас 1:
Скорый в бедах и скорбех заступниче, отче иерарше страны Сибирския, святителю Софроние, на Небеси предстояй с первоиерархом Иркутския церкви и всеми святыми, выну имаши благоволение Господа славы; призри на люди, притекающия к честным останкам святых мощей твоих, с верою и любовию слезно просящия твоея помощи и заступления; моли, Егоже проповедал еси людем Сибири, избавити я от находящих зол и наветов вражиих, просветити людей оляденевшая древле неверием сердца, даровати утверждение веры Христовы, и спасти души наши.

Тропарь, глас 4:
От юности Христа возлюбил еси, блаженне Софроние, добре управил еси иноческия обители и, архиерейства саном почтен быв, упасл еси Иркутскую паству, темже и по преставлении дарования чудес от Бога приял еси и молиши Христа Бога избавити нас от бед и спасти души наша.

Кондак, глас 3:
Пастырей Начальнику Христу трудился еси, святителю Софроние, на пажити духовней северныя страны нашея, языцы монгольстии от прелести и скверны идольския избавляя, привел еси я к свету веры Христовы, и ныне, со Ангелы Владычню престолу предстоя, моли непрестанно о всех нас, избавити ны от бед и спасти души наша.

Тропарь преподобному Софронию, затворнику Печерскому, в Дальних пещерах

Тропарь, глас 1:
Пространна пути, ведуща в пагубу, блаженне Софроние, угонзая, затворился еси в темне месте пещернем, идеже день и нощь в молитвах и слезах и в ручном деле подвизаяся, обрел еси вечный живот и наслаждение.

Тропарь преподобным Спиридону и Никодиму, просфорникам Печерским, в Ближних пещерах

Тропарь, глас 4:
Хлебы приносныя руками своими творя, псалмопение непрестанное усты своими яко жертву хвалы приношаше Господеви, со честным Никодимом, блаженне Спиридоне, с нимже молися Христу Богу о душах наших.

Тропарь святителю Спиридону, епископу Тримифунтскому, чудотворцу

Тропарь, глас 4:
Собора Перваго показался еси поборник и чудотворец, богоносе Спиридоне, отче наш. Темже мертву ты во гробе возгласив и змию в злато претворил еси, и внегда пети тебе святыя молитвы, Ангелы сослужащия тебе имел еси, священнейший. Слава Давшему тебе крепость, слава Венчавшему тя, слава Действующему тобою всем исцеления.

Кондак, глас 2:
Любовию Христовою уязвився, священнейший, ум вперив зарею Духа, деятельным видением твоим деяние обрел еси, Богоприятне, жертвенник Божественный быв, прося всем Божественнаго сияния.

Тропарь преподобному Спиридону, просфорнику Печерскому

Тропарь:
Хлебы приносныя руками своими твори, псалмопение непрестанное усты своими яко жертву хвалы приношаше Господеви, со честным Никодимым, блаженне Спиридоне, с нимже молися Христу Богу о душах наших.

Кондак:
Да явиши разженную твою ко Господу любовь, чудне Спиридоне, разжегшуюся зело пещь мантиею своею заграждаеши и да покажеши источник вод дарований духа, в тебе живущ; одеждею своею, нося воду, угашаеши пламень огненный, тем, яко имея дерзновение ко Господу; со блаженным Никодимом молимся присно о нас, поющих тя.

Тропарь Пресвятой Богородице перед Ея иконой, именуемой «Спорительница хлебов»

Тропарь, глас 3:
Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения, и подаеши им вся обильно к наслаждению. Спорительнице сущи хлебов им, избавляя их всякия нужды и утеснения, и устрояя им, рабом Твоим сущим, избавление вечныя муки и жизнь вечную.

Тропарь Пресвятой Богородице перед Ея иконой, именуемой «Споручница грешных»

Тропарь, глас 4:
Умолкает ныне всякое уныние, и страх отчаяния исчезает, грешницы в скорби сердца обретают утешение, и небесною любовию озаряются светло: днесь бо Матерь Божия простирает нам спасающую руку, и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже людие обремененнии грехи многими, припадите подножию Ея иконы, со слезами вопиюще: Заступнице мира, грешным Споручнице, умоли Матерними молитвами Избавителя всех, да Божественным всепрощением покрыет грехи наша, и светлыя двери райския отверзет нам, Ты бо еси предстательство и спасение рода христианскаго.

Кондак, глас 1:
Честное Жилище бывши неизреченнаго естества Божественнаго выше слова и паче ума, и грешным еси Споручница, подаваеши благодать и исцеления, яко Мати всех Царствующаго, моли Сына Твоего, получити нам милость в день судный.

Тропарь на праздник Сретения чудотворной иконы Богородицы «Владимирской»

Тропарь, глас 4:
Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе, взываем сице: о пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет душы наши, яко Милосерд.

Кондак, глас 8:
Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

Тропарь святому святителю Стефану, епископу Великопермскому

Тропарь, глас 4:
Божественным желанием, от юнаго возраста, Стефане премудре, разжегся, ярем Христов взял еси, и людей оляденевшая древле неверием сердца, Божественное семя в них сеяв евангельски духовне породил еси. Тем же преславную твою память почитающе, молим тя: моли, Егоже проповедал еси, да спасет души наша.

Тропарь праведному Стефану Высокому, деспоту Сербскому

Тропарь, глас 8:
С высоты восприяв увещание, отечеству твоему был еси предстатель и просветитель, святый праведный деспоте Стефане, супостаты побеждаяй, и люди своя просвещаяй, и многая храмы устрояяй, сего ради чтуще тя, молим: моли Христа Бога о спасении народа сербскаго.

Тропарь мученику Стефану Дечанскому, царю Сербскому

Тропарь, глас 4:
В терпении добрострадальных подвиг твоих многообразныя раны претерпел еси, и по кончине своей венец от Бога с мученическими лики восприемлеши, и в земли кротких достойно водворяешися, блаженне, о нас Христа Бога моли даровати душам нашим велию милость.

Тропарь, глас 8 (Перенесение мощей):
Царскую диадиму обагрил еси кровию твоею, Богомудре великомучениче, за скиптр крест в руку приим, явился еси победоносец и яко жертву непорочну принесл еси себе Богу. От родителей твоих очию зеницы лишен был еси, и в заточении пребыл еси, и от своих удавлен еси. И ныне, радуяся, предстоиши Святей Троице. Тем празднуем днесь пренесение честных мощей твоих и обновление честнаго кивота, блаженне Стефане, молися о державе сродник твоих, благоугодней быти ей и сыновом сербским спастися.

Тропарь мученикам Стефану и Петру Казанским

Тропарь, глас 4:
Мучеников двоица единоравная, Стефане и Петре славнии, неверие соплеменников обличивше, Христу последовали есте, во Святую Троицу веровати всех научающе, Еяже ради великия страдания приемше, молитеся о нас ко Господу, да, избавившеся тьмы греховныя, Света явимся общницы невечерняго.

Кондак, глас 3:
Святии страстотерпцы Стефане и Петре, Троицы поборницы преизряднейшии, мук треволнения и страшную смерть на вечную жизнь пременившии, во граде Казани страдальчествовашии, ныне же в Небесных чертозех Всецарю предстоящии, от всяких нас грехопадений избавити Христа Бога молите, Той бо есть верных утверждение.

Тропарь преподобным Стефану, в иночестве Симеону, царю Сербскому, Мироточивому и святителю Савве I, архиепископу Сербскому

Тропарь, глас 1:
Обители Хиландарския священных строителей и Афона светильники, Сербии похвалу, Симеона величайшаго, преподобных лепоту, и род его чудный, святителя, — глаголю, — Савву, приидите согласно почтим, глаголя: молите Христа Бога о пастве вашей, блаженнии, и о еже Церкви свободней быти от обстояний.

Тропарь святителю Стефану Исповеднику, архиепископу Сурожскому

Тропарь, глас 4:
Яко святитель со Безплотными единожитель быв, священномучениче Стефане, восприем бо Крест яко оружие, и став крепко сопротив иконоукорителя и духоборцев, не поклоняющихся пречистому образу Христа Бога нашего, и отсекл еси всяку ересь лукавых. Того ради прием мучения венец, избавил еси град твой Сурож от всякия неприязни. И ныне молим тя, святе, да избавиши нас от всяких злых искушений, и бед, и вечныя муки.

Тропарь преподобному Стефану игумену, Махрищскому чудотворцу

Тропарь, глас 8:
Православия ревнителю, благочестия наставниче и чистоты, ищущим спасения путеводительный светильниче, монашествующих богодухновенное удобрение, преподобнаго Сергия духовный собеседниче, Стефане премудре, ученьми и добродеяньми твоими души просветил еси и пустыни населил еси. Моли Христа Бога спастися душам нашим.

Тропарь праведному Стефану Милютину, королю Сербскому

Тропарь, глас 3:
Ты на земли вседушно Христа возлюбив и Того заповеди соблюдая, яко река, благоутробием иссохших нищетою богатно напоил еси и люди своя снабдел еси, и рака мощей твоих благоухания цельбы всем подает, сего ради, святе, молим тя, испроси душам нашим велию милость.

Тропарь преподобномученику Стефану Новому, исповеднику

Тропарь, глас 4:
Постнически предподвизався на горе, умная врагов ополчения всеоружием Креста погубил еси, всеблаженне, паки же ко страдальчеству мужески вооружился еси, убив Копронима мечем веры, и обоих ради венчался еси от Бога, преподобномучениче Стефане приснопамятне.

Тропарь первомученику и архидиакону Стефану

Тропарь, глас 4:
Подвигом добрым подвизался еси, первомучениче Христов и апостоле, и мучителей обличил еси нечестие. Каменем бо побиен от рук беззаконных, венец от яже свыше десницы приял еси, и к Богу взывал еси вопия: Господи, не постави им греха сего.

Величание:
Величаем тя страстотерпче святый Стефане, и чтим честная страдания твоя, яже за Христа претерпел еси.

Тропарь преподобному Стефану, игумену Печерскому, епископу Владимиро-Волынскому

Тропарь, глас 8:
Учению повинуяся Богоноснаго Феодосия, поставлен бысть от него вождь быти святому его стаду, еже добре пасый, церковь Богородицы, волею Тоя основанную чудне, совершил еси благолепно, приснопамятно Стефане, в нейже нам, молящимся, испроси от Христа Бога велию милость.

Тропарь преподобному Стефану Савваиту

Тропарь, глас 5:
Воздержанием житие украси и страсти умертвив, посрамил еси вражия прилоги, отче Стефане, и преложися к Богу, чудотворец показася, в вечней славе со Ангелы ликуя, с ними же моли помиловати души наша.

Тропарь преподобному Стефану, в иночестве Симеону, царю Сербскому, Мироточивому

Тропарь, глас 3:
Божественною благодатию просветився, и по смерти показуеши светлость жития твоего, источаеши бо миро благоухания притекающим к раце мощей твоих, и люди твоя наставил еси к свету Богоразумия, Симеоне отче наш, Христа Бога моли даровати нам велию милость.

Тропарь Стефану Урошу V, королю Сербскому

Тропарь, глас 3:
Юношески процвел еси во отечествии твоем, добротою украшен, и неправедную и безвременную смерть подъял еси, Уроше всечестне; царскаго корене плод сладок, аще и не во время созрев, в Господню житницу вселился еси и жалость велию сродству твоему оставил еси. Молися о нас, творящих святую память твою.

Тропарь праведному Стефану Щиляновичу, Сербскому, князю

Тропарь, глас 4:
На земли премудрости славу стяжал еси, богатство Господеви своему вручил еси, и Той тя с Небесными водворяет, тело твое на земли, святе, сохрани невредимо, ты бо в целомудрии и чистоте житие праведно пожил еси, тем с дерзновением моли спастися нам.

Тропарь Пресвятой Богородице перед Ея иконой, именуемой «Страстная»

Тропарь, глас 4:
Днесь возсия неизреченно царствующему граду нашему Москве икона Богоматере, и, яко светозарным солнцем, пришествием тоя озарися весь мир, Небесныя силы и души праведных мысленно торжествуют, радующеся, мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.

Тропарь 12-ти грекам, строителям Соборной Успенской церкви Киево-Печерской лавры

Тропарь, глас 3:
Преблаженнии и Богоноснии отцы наши, двоенадесятице честная, устроению великия церкве Киево-Печерския послужившии и равноангельным житием Богу угодившии и Того ради дерзновение велие у него стяжавшии, молим вас прилежно, испросите душам нашим очищение и велию и богатую милость.

Тропарь мученице Сусанне

Агница Твоя Иисусе Сусанна, зовет велиим гласом: Тебе, Женише мой, люблю, и Тебе ищущи страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе; тоя молитвами, яко милостив, спаси души наша.

Тропарь Пресвятой Богородице перед Ея иконой, именуемой «Табынская»

Тропарь, глас 4:
Наста днесь пресветлый праздник, Пречистая Дево, честныя Твоея Табынския иконы, Владычице, яже паче лучей солнечных возсия, от Источника приснотекущаго, Христа, Бога нашего, источаеши целебныя дары с верою к тебе притекающим, Тя бо Христос Помощницу людем Своим дарова, покрывати и спасати от всякия беды рабы Своя, едину Благословенную.

Тропарь праведной Тавифе

Тропарь, глас 4:
Днесь вера Христова утверждается камнем веры, и ликовствует в веселии Иоппия, псаломски славословят Жизнодавца Сына Божия вернии, видяще совершаемо велие чудо: первоверховный апостол глаголет, и умершая востает от гроба, юже Низложитель смерти дарует Церкви, да украшаются во образ ея добродетельми люди. Приидите убо, христиане, принесем ко святей моления наша: блаженная Тавифо и милосердная, вознеси наша воздыхания Пресвятей Троице и молися со дерзновением, да сынове Света Превечнаго будем, да сподобимся Божия милости, да пребываем в любви Божественней, и да царствует мир во вселенней.

Тропарь, глас 4 (в Неделю 4-ю по Пасхе):
Апостолом сотаиннице, милостивая Тавифо, обители женския начало положила еси и бедным одеяние была еси, послушнице смиренная, слову апостола Петра повинувшися, из мертвых силою Христовою возстала еси и ныне на Небесех светло празднуеши. Темже моли Христа Бога всем, поминающим тя, даровати живот вечный.

Тропарь преподобной Таисии

В тебе мати известно спасеся, еже по образу: приимши бо крест, последовала еси Христу, и деющи учила еси, презирати убо плоть, преходит бо: прилежати же о души вещи бессмертней. Темже и со Ангелы срадуется, преподобная Таисия, дух твой.

Тропарь благоверной Тамаре, царице Грузинской

Тропарь, глас 4:
Во святых дивная, Иверии светило, благоверная царице Тамаро, на горах высоких храмы воздвигшая, да в них моления возсылают ко Господу, мольбами твоими крепость даровавшая воем христолюбивых людей страны Иверския, десницею же своею полчища агарянская низпровергшая, моли Христа Бога спастися душам нашим.

Тропарь Пресвятой Богородице перед Ея иконой, именуемой «Тамбовская»

Тропарь, глас 4:
Днесь светло красуется град Тамбов, и святитель Христов Питирим радуется. Сияет бо ныне чудесы икона Твоя, Владычице, юже из первопрестольнаго града Москвы святитель принесе, и дивное людем являет Твое заступление, подающи исцеление всем, с верою к Тебе притекающим. Темже умильно вопием Ти: спасай нас иконою Твоею, Дево Всепетая.

Тропарь святителю Тарасию, епископу Константинопольскому

Тропарь, глас 4:
Правило веры и образ кротости, воздержания учителя, яви тя стаду твоему, яже вещей истина, сего ради стяжал еси смирением высокая, нищетою богатая, Отче Тарасие, моли Христа Бога спастися душам нашим.

Кондак, глас 3:
Православными догматы Церковь уяснив, и Христову, блаженно, честную икону почитати и покланятися всех научив, облечил еси иконоборцев безбожное веление. Сего ради вопием ти: о отче, радуйся, мудре Тарасие.

Тропарь мученице Татиане

Тропарь, глас 4:
Всечестная благочестия учредительнице, прехвальная и всеблаженная мученице Татиано, сосудом девства и чистоты явившаяся и невестой Христовой нарекшаяся, страданий кровьми украсившеся, возлетела еси в небе в небесный чертог. Темже чтущия тя поминай.

Кондак, глас 4:
Светло во страдании твоем возсияла еси, страстотерпице, от кровей твоих преиспещрена, и яко красная голубица к небеси возлетела еси, Татиано: темже моли присно за чтущия тя.

Тропарь апостолу Тимофею

Тропарь, глас 4:
Благости научився и трезвяся во всех, благою совестию священнолепно оболкся, почерпл еси от сосуда избранного неизреченная и, веру соблюд, равное течение совершил еси, апостоле Тимофее, моли Христа Бога спастися душам нашим.

Тропарь преподобному Титу, пресвитеру Печерскому, в Ближних пещерах

Тропарь, глас 1:
Братолюбие тя живуща видев любве ненавистник, победил тя во гнев, но, ведый твоя прежния труды любве источник — Господь, преложи тя паки на братолюбие, в немже ты прочее пожив Богоугодне, молися о нас, яко да поживем братолюбне.

Тропарь преподобному Титу Печерскому, бывшему воину, в Дальних пещерах

Тропарь, глас 3:
Воинство тленное оставль, в нетленном ввоенился еси Христови, и оружием его крестным победив подземных ефиопов, победы венец от Христа, Тите, славно приял еси, Емуже молися даровати нам мир и велию милость.

Тропарь Пресвятой Богородице перед Ея иконой, именуемой «Тихвинская»

Тропарь, глас 4:
Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущим Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Тропарь святителю Тихону Задонскому

Тропарь:
От юности возлюбил еси Христа, блаженне, образ всем был еси словом, житием, любовию, духом, верою, чистотою и смирением темже и вселился еси в небесныя обители, идеже предстоя престолу Пресвятыя. Троицы, моли, святителю Тихоне, спастися душам нашим.

Тропарь, глас 4:
Православия наставнице, благочестия учителю, покаяния проповедниче, Златоустаго ревнителю, пастырю предобрый, новый России светильниче и чудотворче, паству твою добре упасл еси и писаньми твоими вся ны наставил еси, темже венцем нетления украшен от Пастыреначальника, моли Его спастися душам нашим.

Тропарь преподобному Тихону Луховскому, Костромскому чудотворцу

Тропарь, глас 4:
Желанием духовным в пустыню вселился еси и, тамо невозвратно шествовав Божественными стезями, достигл еси в Небесныя обители, и ныне со Ангелы предстоиши у Престола всех Царя Христа Бога, Емуже прилежно молися помиловати град сей и люди, верою празднующим пречестную память твою, Тихоне преподобне, отче наш.

Тропарь преподобному Тихону Медынскому, Калужскому

Тропарь, глас 4:
Яко светильник пресветлый, явился еси в Российстей земли, преподобне отче наш Тихоне, в пустыни вселився, в нейже преходя жестокое жительство, яко безплотен, пожил еси, сего ради и чудес дарованием обогати тя Бог. Тем и мы, притекающе к мощем твоим, умильно глаголем: отче преподобне, моли Христа Бога спастися душам нашим.

Тропарь святителю Тихону, патриарху Московскому и всея Руси

Тропарь, глас 3:
В годину тяжкую Богом избранный в совершенной святости и любви Бога прославил еси, во смирении величие, в простоте и кротости силу Божию являя, положил душу за Церковь, за люди своя, исповедниче патриарше святе Тихоне, моли Христа Бога, Емуже сораспялся еси, и ныне спасти землю Русскую и паству Твою.

Тропарь, глас 1 (Прославление):
Апостольских преданий ревнителя и Христовы Церкве пастыря добраго, душу свою за овцы положившаго, жребием Божиим избраннаго Всероссийскаго патриарха Тихона восхвалим и к нему с верою и упованием возопиим: предстательством святительским ко Господу Церковь Русскую в тишине соблюди, расточенная чада ея во едино стадо собери, отступившия от правыя веры к покаянию обрати, страну нашу от междоусобныя брани сохрани и мир Божий людем испроси.

Кондак, глас 2:
Тихостию нрава украшен, кротость и милосердие кающимся являяй, во исповедании православныя веры и любве ко Господ тверд и непреклонен пребыл еси, святителю Христов Тихоне. Молися о нас, да не разлучимся от любве Божия, яже о Христе Иисусе, Господе нашем.

Величание:
Величаем тя, святителю отче Тихоне, и чтим святую память твою: ты бо молиши за нас Христа Бога нашего.

Тропарь Пресвятой Богородице перед Ея иконой, именуемой «Толгская»

Тропарь, глас 4:
Днесь светло сияет на Толге образ Твой, Пречистая Дево Богородице, и, яко солнце незаходимое, всегда верным подадеся, Егоже видев на воздусе, невидимо Ангелы, яко никим, держима, преосвященный епископ града Ростова Трифон тече ко явленному светящемуся столпу огненну, и по водам, яко по суху, прейде, и моляшеся Ти верно о пастве и о людех. И мы, к Тебе притекающе, зовем: Пресвятая Дево Богородице, верно Тя славящих спасай, страну нашу, архиереев и вся Российския народы от всех бед избавляй по велицей Твоей милости.

Тропарь на праздник Торжества Православия

Тропарь, глас 2:
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы врагу. Темже благодарственно вопием Ти: радости исполнил еси вся, Спасе наш, пришедый спасти мир.

Кондак, глас 2:
Неописанное Слово Отчее, из Тебе, Богородице, описася воплощаемь: и оскверншийся образ в древнее вообразив, Божественною добротою смеси. Но исповедающе спасение, делом и словом, сие воображаем.

Тропарь Пресвятой Богородице перед Ея иконой, именуемой «Трех радостей»

Тропарь, глас 4:
От святыя иконы Твоея радости неизреченныя преисполнила еси сердце благочестивыя жены. О Пречистая Владычице мира, Всемощная Царица радосте, Приснодево твари, егда возвратила оной и мужа, и сына, и достояние ея, такожде и всем нам милосердствуеши, даруй исполнение благих желаний, источая приснотекущий источник радости молящимся Тебе и вседушно вопиющим: Радость всему миру родившая, радости исполни неоскудевающия чтущих Тя.

Тропарь святителям Василию Великому, Григорию Богослову и Иоанну Златоустому

Тропарь, глас 4:
Яко апостолов единонравнии и вселенныя учителие, Владыку всех молите, мир вселенней даровати и душам нашим велию милость.

Кондак, глас 2:
Священный и боговещанныя проповедники, верх учителей, Господи, приял еси в наслаждение благих Твоих и упокоение; труды бо онех и смерть приял еси паче всякого всеплодия, Едине прославляяй святыя Твоя.

Величание:
Величаем вас, святителие Василие, Григорие и Иоанне, и чтим святую память вашу: вы бо молите за нас Христа Бога нашего.

Тропарь преподобному Трифону, архимандриту Вятскому

Тропарь, глас 4:
Яко светозарная звезда, возсиял еси от востока до запада, оставль бо свое отечество, дошел еси Вятския страны и Богоспасаемаго града Хлынова, в немже обитель во славу Пресвятыя Богородицы создав, и, тамо на добродетель вперився, собрал еси иночествующих множество, и, сих наставляя на путь спасения, был еси Ангелом собеседник, и постником сопричастник, Трифоне преподобне, с ними Христа Бога моли спастися душам нашим.

Тропарь преподобному Трифону Печенгскому, Кольскому

Тропарь, глас 8:
Пути, вводящаго в жизнь, наставник и учитель был еси: первее бо, преподобне отче наш Трифоне, пришел еси в часть Норвегския земли и в последних концех северныя страны языки просветил еси, породив водою и Духом Святым, и священная твоя чада в безплодней пустыни, яко древа масличная, насадил еси, велию обитель Святыя и Живоначальныя, Единосущныя и Нераздельныя Троицы создал еси и монахов множество собрав. Тем, яко апостолом и пустынножителем равночестна чтуще тя, прилежно припадающе, вопием: моли всех Бога за Русскую землю, за область твою и за вся люди, почитающия память твою.

Кондак, глас 8:
Все твое умное желание к Богу вперив, и того званию невозвратно от души последовал еси, в пустыню конечную вселився, и тамо ангельски и равноапостольне пожив, многим путь был еси ко спасению: сего ради и Христос тя прослави, и даром чудес обогати, ибо великих царей Иоанна и Феодора Российских чудесы удивил еси, темже вси вопием ти: радуйся, исповедниче Христа Бога нашего, радуйся, граду твоему непоколебимое утверждение, Трифоне отче наш.

Тропарь Пресвятой Богородице перед Ея иконой, именуемой «Троеручица»

Тропарь, глас 4:
Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущим Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Тропарь, глас 4:
Днесь светло красуется царствующий град Москва, имеющи в себе, о Всемилостивейшая, всея твари Честнейшая, Заступнице наша Дево Богородице, честный образ Твой, имже подсолнечныя концы земли удивляеши и мир мирови даруеши, во образ бо Святыя Троицы являеши трие руце: двема убо Сына Своего, Христа Бога нашего, носиши, третиею от напастей и бед верно к Тебе прибегающих избавляеши, и от потопления изымаеши, и всем полезная даруеши, и преподобному Михаилу Малеонскую гору показа, и всех всегда милуеши, честною ризою Своею покрываеши жительство сие и вся грады и страны наша, да зовем Ти: радуйся, Обрадованная.

Тропарь, глас 4:
Яко звезда светозаряющая, из Сербии на Афон чудесно прииде всечестная икона Твоя Троеручица, юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.

Величание:
Величаем Тя, Пренепорочная Дево, и чтим чудеса образа святаго Твоего, трех пречистых рук Твоих явление в славу Божества, в Троице Бога нашего.

Тропарь мученикам Трофиму, Феофилу и с ними 13-ти мученикам

Тропарь, глас 4:
Яко воини, мученицы непобедимии, течением невозбранным в судилище неверных внидосте и веры ради многия муки претерпесте, Христа исповедающе Единаго со дерзновением. Того молите, Трофиме и Феофиле с прочими, яко да тяготу страстей отложше, ваше ныне страдание поем, страстотерпцы непреоборимии.

Тропарь мученику Уару и с ним семи учителям христианским

Тропарь, глас 4:
Воинством святых страстотерпец страждущих законне, зря онех, показал еси мужески крепость свою. И устремився на страсть волею, и умрети вожделе за Христа, Иже приял еси почесть победы твоего страдания, Уаре, моли спастися душам нашим.

Тропарь Пресвятой Богородице перед Ея иконой, именуемой «Умиление» (Смоленская)

Тропарь, глас 4:
Богорадованная Владычице, Препрославленная Мати щедрот и человеколюбия, Всемилостивая о всем мире Ходатаице! Прилежно, рабы Твои, к Божественному предстательству прибегающе и пречудному образу Твоему со умилением припадающе, молимся: молитву теплую к Сыну Твоему и Богу нашему сотвори, о Всепетая Царице Богородице, да всяких болезней и печалей нас Тебе ради избавит и от грехов всяких свободит, Царствия Своего Небеснаго наследники ны покажет, велие бо неизреченное, яко Мати, имаши дерзновение к Нему и вся можеши, Едина во веки Преблагословенная.

Тропарь Пресвятой Богородице перед Ея иконой, именуемой «Умиление»

Тропарь, глас 4:
К Богородице со умилением припадем, вси грехми обремененнии, чудотворную Ея икону Умиление облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.

Тропарь Пресвятой Богородице перед Ея иконой, именуемой «Умягчение злых сердец»

Тропарь, глас 5:
Умягчи наша злая сердца Богородице, и напасти ненавидящих нас угаси, и всякую тесноту души нашея разреши: на Твой бо святый образ взирающе, Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати благосердная, в жестокосердии нашем и от жестокосердия ближних погибнути, Ты бо еси воистину злых сердец Умягчение.

Тропарь Пресвятой Богородице перед Ея иконой, именуемой «Урюпинская»

Тропарь, глас 3:
Явилася еси на древе в Донской земли, благодатная Твоя икона, Богородице, больныя исцеляти, заблуждшия обращати; темже умильно молимся Тебе: избави град наш от всякаго зла и спаси люди, к Тебе притекающия.

Тропарь на усекновение главы Предтечи и Крестителя Иоанна

Тропарь, глас 2:
Память праведнаго с похвалами, тебе же довлеет свидетельство Господне, Предтече: показал бо ся еси воистину и пророков честнейший, яко и в струях крестити сподобился еси Проповеданного. Темже за истину пострадав радуяся, благовестил еси и сущым во аде Бога яильшагося плотию, вземлющаго грех мира и подающаго нам милость.

Кондак, глас 5:
Предтечево славное усекновение, смотрение бысть некое Божественное, да и сущим во аде Спасово проповесть пришествие; да рыдает убо Иродиа, беззаконное убийство испросивши: не закон бо Божий, ни живый век возлюби, но притворный, привременный.

Величание:
Величаем тя, Крестителю Спасов Иоанне, и погибаем вси честныя твоея главы усекновение.

Тропарь Успению Пресвятой Богородицы

Тропарь, глас 1:
В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша.

Кондак, глас 2:
В молитвах неусыпающую Богородицу и в предстательствах непреложное упование гроб и умерщвление не удержаста: якоже бо Живота Матерь к животу престави во утробу Вселивыйся приснодевственную.

Величание:
Величаем Тя, Пренепорочная Мати Христа Бога нашего, и всеславное славим Успение Твое.

Задостойник, глас 1:
Ангели, Успение Пречистыя видевше, удивишася, како Дева восходит от земли на Небо. Побеждаются естества уставы в Тебе, Дево Чистая, девствует бо рождество и Живот предобручает смерть; по рождестве Дева и по смерти жива, спасаеши присно, Богородице, наследие Твое.

Тропарь Пресвятой Богородице перед Ея иконой, именуемой «Устюжская» («Благовещение»)

Тропарь, глас 4:
Вспетая и Всеславная Царице Богородице, Мати всея твари Содетеля, христианская Надеждо и Заступнице, печальным утешение, ненадеющимся и отчаявшимся скорое надеяние, молим Тя: милостива буди нам, грешным, не остави раб Твоих и не отрини моления недостойных. Молимтися, взирающе ко образу Твоему честному святыя и чудотворныя иконы Твоея и вопиюще с плавающими и путь шествующими, да пребудет милость Твоя. О Владычице, ризою честною защити, и во всяцех местех злых соблюди, и молися к рождшемуся из Тебе Христу Богу нашему, да спасет от грех души наша.

Тропарь Пресвятой Богородице перед Ея иконой, именуемой «Утоли моя печали»

Тропарь, глас 5:
Утоли болезни многовоздыхающия души моея, Утолившая всяку слезу от лица земли: Ты бо человеком болезни отгоняеши и грешных скорби разрушаеши, Тебе бо вси стяжахом надежду и утверждение. Пресвятая Мати Дево.

Кондак, глас 6:
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Тропарь священномученику Фаддею (Успенскому), архиепископу Тверскому

Тропарь, глас 1:
Хвала Богу и жертва живая житие твое, священномучениче Фаддее, явися. Постом, бдением и молитвою Небесная дарования приим, многим добрый помощник и утешитель бысть. Пастырскою мудростию и тихостию нрава украшен, лукавства врагов Христовых препобедил еси. Слава Давшему тебе во страданиих крепость, слава, яко мученика, Венчавшему тя, слава Действующему тобою всем исцеления.

Тропарь Фаддею, апостолу от 70-ти

Тропарь, глас 2:
Днесь Едес град веселится, прием тобою Крещения баню, и Авгарь, страстей пременен, твою память славит. С нимиже поем и мы: веселия духовнаго исполни живот наш и страсти исцели, Фаддее апостоле, молитвами твоими.

Тропарь святой благоверной (преподобной) княгине Февронии, в иночестве Евфросинии

Тропарь, глас 8:
Яко благочестиваго корене пречестная отрасль был еси, добре во благочестии пожив, блаженне Петре; тако и с супружницею твоею премудрою Феврониею, в мире Богу угодивше, и преподобных житию сподобистеся; с нимиже молитеся Господеви, сохранити без вреда отечество ваше, да вас непрестанно почитаем.

Кондак, глас 8:
Мира сего княжение, и славу временну помышляя, сего ради благочестно в мире пожил еси Петре, купно и с супружницею твоею премудрою Феврониею, милостынею и молитвам Богу угодивше; темже и по смерти неразлучно во гробе лежаще, исцеление невидимо подаваете. И ныне Христу молитеся сохраннти град же и люди, иже вас славящих.

Величание:
Ублажаем вас, святии чудотворцы Петре и Февроние, и чтим святую память вашу, вы бо молите за ны Христа Бога нашего.

Тропарь первомученице равноапостольной Фекле

Тропарь, глас 4:
Словесем Павловым научившеся Богоневестная Фекло, и верою утвердившися от Петра Богозванная, первомученица явилася еси, и первострадальница в женах, возшла, еси на пламень, яко на место благоцветущее, звери и юнцы устрашишася тебе, вооружися бо Крестом. Тем моли, всехвальная, Христа Бога, спастися душам нашим.

Тропарь святителю Феодору, епископу Едесскому

Тропарь, глас 4:
Неволею паству святительскую приим, но волею подвигнувся о Божии Церкви, и перстию Христова гроба невернаго Моавия царя уверив, и с телесною слепотою вкупе и душевную ему исцелив, благоверна показа, с нимже и еретики от Божия Церкве, яко волки, отгнав, честный святителю Феодоре, моли спастися душам нашим.

Тропарь преподобномученикам Феодору и Василию Печерским, в Ближних пещерах

Тропарь, глас 1:
Союзом любве связавшеся, преподобнии, всяк союз козней вражиих попрасте, страдание же и смерть неповинне от сребролюбиваго князя претерпесте добле, тем молим вас, вкупе поживших и венцы мучения приемших, молитеся Господеви о нас, яко да во мнозей любви, вере и надежди добре поживше, всегда ублажаем вас, Феодоре и Василие добропобеднии.

Тропарь мученикам Феодору варягу и сыну его Иоанну, первомученикам Российским

Тропарь, глас 2:
Страстотерпцы Господни, Феодоре со Иоанном отроком, славнии! Блаженна земля Русская, напившаяся кровьми вашими, и радуется отечество наше, в немже вы первии, идолы посрамивше, Христа со дерзновением исповедаете и за Него пострадасте. Того, яко Блага, молите, до скончания века в стране нашей Церковь Православную непоколебиму утвердите и всех русских людей во истинней вере и благочестии сохранити.

Тропарь преподобным Феодору и Павлу Ростовским

Тропарь, глас 8:
Звездам заря послушания жизнь лучших показа, яко два светила сияюще нам, Феодор и Павел Богомудрии, Ростовская похвало, житием чистым Богу присвоишася.

Тропарь преподобному Феодору Начертанному, исповеднику

Тропарь, глас 8:
Православия наставниче, благочестия учителю и чистоты, вселенныя светильниче, монашествующих Богодухновенное удобрение, Феодоре премудре, ученьми твоими вся просветил еси, цевнице духовная; моли Христа Бога спастися душам нашим.

Тропарь блаженному Феодору, Христа ради юродивому, Новгородскому

Тропарь, глас 8:
Иже на земли Христа ради волею в буйство преложився, мира сего красоты отнюд возненавидел еси и, плотская играния увядив постом и жаждею и на земли леганием, от зноя же и студени, от дождя и снега и от прочия воздушныя тягости никогдаже уклонился еси, душу же очистил еси добродетельми, яко злато в горниле, отче преблаженне Феодоре, и ныне на Небесех предстоиши Престолу Пресвятыя Троицы, но яко имея дерзновение многое, моли Христа Бога спастися душам нашим.

Тропарь преподобному Феодору Освященному

Тропарь, глас 1:
Пустынный житель, и в телеси Ангел, и чудотворец явился еси, Богоносе отче наш Феодоре: постом, бдением, молитвою небесная дарования приим, исцеляеши недужныя и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.

Тропарь преподобному Феодору, князю Острожскому, Печерскому, в Дальних пещерах

Тропарь, глас 7:
Преобразил еси земнаго княжения славу во иночества образ смиренный, и вместо врагов видимых на невидимыя ополчился еси, и, обою победитель красен являяся, един от чудотворец Печерских показался еси; темже и нам ревности Божия дар испроси, братолюбием сердца наша просвети и ко спасению вечному стези наша, Феодоре блаженне, направи.

Ин тропарь, глас 4:
Княжеских дароношений и всего суетствия мирскаго спешне отвергся, Божиих же дарований, премудре Феодоре, преискренне сподобитися желая, приял еси иноческий образ и, в нем смиренным послушанием и безмолвным житием Царю Небесному благоугождая, получил еси от Него безсмертныя дары, ихже и нам, чтущим тя, получити молися.

Ин тропарь, глас 4:
Яко благочестиваго корене пречестная отрасль был еси, блаженне Феодоре, яви бо тя Христос яко воистинну Богодарованное сокровище Волынстей земли, новаго поборника Православия, и народу российскому преславна и благоприятна. Темже ныне, плоды светоносных трудов твоих к стране нашей под сению Святыя Церкве Православныя наслаждающеся, хвалим Господа, даровавшаго тебе силу и крепость на сопротивныя. Егоже моли спасти отечество твое, и:
державе сродник твоих Богоугодней быти, и сыновом российским спастися.

Кондак, глас 4:
Красоты ризныя возгнушавшагося и богатства тленнаго со благодарением отвергшагося, в ризу же безстрастия облекшагося и богатому в щедротах Христу возследовавшаго, приидите, вернии, восхвалим Феодора достославна, яко молящася непрестанно о душах наших.

Тропарь преподобному Феодору Печерскому, Молчаливому

Тропарь, глас 8:
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Феодоре, дух твой.

Тропарь преподобному Феодору Печерскому

Тропарь, глас 1:
Союзом любве связавшеся, преподобнии, всяк союз козней вражиих попрасте, страдание же и смерть неповинне от сребролюбиваго князя претерпесте добле, тем молим вас, вкупе поживших и венцы мучения приемших, молитеся Господеви о нас, яко да во мнозей любви, вере и надежди добре поживше, всегда ублажаем вас, Феодоре и Василие добро победнии.

Тропарь, глас 8:
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Феодоре, дух твой.

Тропарь святителю Феодору, архиепископу Ростовскому

Тропарь, глас 5:
От юности, премудре, прилежно подвизався, и извещением Святаго Духа превеликую обитель воздвиже Пресвятой Богородице в похвалу Рождества Ея, струями же слез твоих безплотныя враги погрузил еси, и, жития твоего целомудрием со Ангельскими лики совокупився, преподобне отче Феодоре, с ними же Христа Бога моли спастися душам нашим.

Тропарь благоверному князю Феодору Смоленскому

Тропарь, глас 4:
Яко целитель преизряден и казатель благоприятен мирский мятеж оставил еси и крест свой на рамо взем и божественным житием пожил еси и воздержанием плоти украсился еси к тебе притекающим сосуд избранный показа тя, всеблаженне Феодоре, воспевающих твою память в псалмех и песнех, преподобне, молися о душах наших.

Тропарь благоверному князю Феодору Стародубскому

Тропарь, глас 1:
Божественным желанием от юнаго возраста весь сам себе Господеви возложив, в молитвах и постех образ был добродетели, богатство же, и славу, и доброродство телесное яко не сущее презрев, Христа единаго от души возлюбил еси, и Того Истиннаго Бога пред нечестивым царем исповедал еси, и доблестию терпения своего сего ужасил и всех преудивил еси. Телом бо, яко розга, обрезаемь, на кийждо состав, удеси резания благодарны молитвы изрек еси Господеви. Тем во страдании своем венец прием, к Престолу возшел еси славы и со Ангелы предстоиши, всехвальне Феодоре, моли Христа Бога спастися душам нашим.

Кондак, глас 3:
Днесь светло сияющая Церковь благочестно празднует праздник пресветлой и светоносной твоей памяти, великий град и страну созывающи, радуется бо, яко имущи в себе сокровище велие – честные и многоцелебные мощи твоя, всехвальне Феодоре, мученице великоименитый и чудес подателю пребогатый, моли Христа Бога спастися душам нашим.

Тропарь великомученику Феодору Стратилату

Тропарь, глас 4:
Воинствословием истинным, страстотерпче, Небеснаго Царя воевода предобрый был еси, Феодоре, оружиями бо веры ополчился еси мудренно и победил еси демонов полки, и победоносный явился еси страдалец. Темже тя верою присно ублажаем.

Тропарь преподобному Феодору Студиту, исповеднику

Тропарь, глас 8:
Православия наставниче, благочестия учителю и чистоты, вселенныя светильниче, монашествующих Богодухновенное удобрение, Феодоре премудре, ученьми твоими вся просветил еси, цевнице духовная, моли Христа Бога спастися душам нашим.

Тропарь святителю Феодору, епископу Суздальскому

Тропарь, глас 8:
В молитвах бдя, сердцем же о стаде твоем выну болезнуя, учением своим всех просветил еси, Феодоре премудре, темже Христа Бога моли, в день памяти твоея даровати нам велию милость.

Тропарь великомученику Феодору Тирону

Тропарь, глас 2:
Велия веры исправления, во источнице пламенне, яко на воде упокоения, святый мученик Феодор радовашеся: огнем бо всесожегся, яко хлеб сладкий Троице принесеся, Того молитвами, Христе Боже, спаси души наша.

Кондак, глас 8:
Веру Христову, яко щит, внутрь приим в сердце твоем, противныя силы попрал еси, многострадальче, и венцем Небесным венчался еси вечно, Феодоре, яко непобедимый.

Тропарь святому праведному воину Феодору Ушакову

Державе Российстей архистратиг непобедимый явился еси, агарянскую злобу нивочтоже вменив и разорив: ни славы мирския, ниже богатства взыскуя, но Богу и ближнему послужил еси. Моли, святе Феодоре, воинству нашему даровати на враги одоление, Отечеству во благочестии непоколебиму пребыти и сыновам российским спастися.

Тропарь благоверному князю Феодору Ярославичу, Владимирскому

Тропарь, глас 8:
В жизни сей утвердися верою, в заповедех Господних пребываше непреклонен, благоугодих Тому, яко благочестив самодержец Емуже подобяся о врученных ти христоименитых людех, душу свою положити потщався, в землю идяше всезлую и безбожную и тамо, пред нечестивым мучителем Христа дерзновенно исповедав, мученический венец прият, темже, премудре Феодоре Ярославиче, Избавителя моли избавити от бед отечество твое и люди, да тя вси непрестанно почитаем.

Тропарь благоверному князю Феодору Ярославичу, Новгородскому

Тропарь, глас 8:
От благочестиваго корене отрасль благочестивая прозябл еси и, скончався в юности, лета долга твоими добродетельми исполнил еси, благоверный княже Феодоре, сего ради Владеющему временами молимся, да молитвами твоими подаст нам долготу лет и низпослет стране нашей велию и богатую милость.

Тропарь благоверному князю Феодору Смоленскому и чадам его Давиду и Константину

Тропарь, глас 4:
От юности вашея Христово любви прилепившеся, святии, усердно закон и оправдания Того сохранисте, отонудуже и чудесными дарованьми обогатившеся, исцеления источаете, Феодоре, Давиде и Константине, с верою вас почитающих, молите Христа Бога, спастися душам нашим.

Тропарь, глас 4 (Обретение мощей):
Измлада явистеся святии, Богомудре Феодоре и блаженне Давиде с Константином славным, Божественнии сосуди, избраннии Богови. Ныне же источаете нам многа исцеления от честных мощей ваших, вся ереси потопляюще, и спасающе присно град свой, и всех верных сохраняюще невредимо от видимых и невидимых враг. Темже верою молим вас, святии: молите Христа Бога в мире сохранитися нам и спасти души наша.

Тропарь, глас 8 (Перенесение мощей):
Яко звезды многосветлыя от юности возсиявше, осветили есте сердца верных пренесением честных мощей ваших, во плоти, яко Ангелы на земли показастеся, лощением насаждены бысте яко древа, при водах воздержания, напоени струями слез ваших, и скверну омысте. Сего ради явистеся приятелища Божия Духа, Феодоре, и Давиде, и Константине, молите Христа Бога, спастися душам нашим.

Тропарь Пресвятой Богородице перед Ея иконой, именуемой «Феодоровская»

Тропарь, глас 4:
Присшествием честныя твоея иконы, Богоотроковице, обрадованный днесь Богохранимый град Кострома, якоже древний Израиль к кивоту завета, притекает к изображению лица Твоего и воплотившагося от Тебе Бога нашего, да Твоим матерним к Нему предстательством присно ходатайствуеши всем, под сень крова Твоего прибегающим, мир и велию милость.

Тропарь, глас 4:
Днесь светло красуется преименитый град Кострома и вся Русская страна, созывающи к веселию вся боголюбивыя народы христианския, на преславное торжество Божия Матере, пришествия ради чудотворнаго Ея и многоцелебнаго образа, днесь бо явися нам пресветлое великое солнце, приидите, вси Богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражиих. Но, о Всемилостивая Госпоже, Дево Богородице, Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: радуйся, Дево, Христианом похвало.

Тропарь преподобному Феодосию Великому, общих житий начальнику

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Феодосие отче наш, моли Христа Бога спастися душам нашим.

Тропарь преподобному Феодосию Едесскому, Столпнику

Тропарь, глас 3:
Прежде запенся богатственною сетию, яко человек, но последи нищетою нестяжания посрамил еси врага и молитвами твоими, честный Феодосие, прият от Бога прозрения дар. Тем и честному епископу Феодору прорече о Святей Церкви, еже на враги одоление, и ныне молися Христови за чтущих тя.

Тропарь преподобному Феодосию Кавказскому

Тропарь, глас 4:
От юности Христа возлюбил еси, блаженне, и Его ради на Святой Афон и ко Гробу Господню удалился еси, и тамо благодатию и даром чудес обогатився, в страну Российскую к людем своим возвратился еси. Народы Кавказа в годину гонений молитвами, подвигом юродства и чудесы многими во Православии укрепивый, преподобне отче Феодосие, моли Христа Бога, да укрепит Господь люди, зде живущия, во Православии, и оградит землю нашу миром, и спасет всех, яко милосерд.

Тропарь преподобному Феодосию, игумену Печерскому, чудотворцу

Тропарь, глас 8:
Возвысився на добродетель, измлада возлюбив монашеское житие, к желанию доблественне достиг, вселился еси в пещеру, и украсив житие твое пощением и светлостию, в молитвах яко безплотен пребывал еси, в Российстей земле яко светлое светило просияв, отче Феодосие, моли Христа Бога спастися душам нашим.

Тропарь:
Егда снвдосте во гробы и самех себе заключисте, тогда, страсти умертвивше плотския, спогребостеся Христу, богоноснии, и диавольския в подземных разрушисте ограды. Сего ради Ангелы венцы с небес вам подают.

Тропарь преподобному Феодосию Терновскому

Тропарь, глас 3:
В блаженнем безмолвии пустыннем и на соборех, любовию к Богу горя, посрамил еси лукавых бесов и еретик злочестивых. На молитве же стоя, огня светлостию просиял еси и преставлением твоим Ангелов поющих обвеселил еси, Феодосие, отче наш, сего ради молим тя: молися о душах наших.

Тропарь святителю Феодосию Черниговскому

Тропарь, глас 4:
Преудобрен во архиереех, святителю Феодосие, был еси светило своему стаду, таже преставился еси в вечныя обители. Умоли у Престола Царя славы, избавитися нам от заходящих на ны зол, и спастися душам нашим, святе, молитвами твоими.

Кондак, глас 4:
Пастырей Начальнику Христу трудился еси, святителю Феодосие, на пажити духовней питая словесныя твоя овцы, и приял еси от Христа Спаса целебный дар целити от немощи душевныя и телесныя всякаго с верою приходящаго к целебным твоим мощем. Моли, святе, о призывающих имя твое, от наветов вражиих спастися душам нашим.

Тропарь святителю Феоктисту, архиепископу Новгородскому

Тропарь, глас 3:
Божия Слова Премудрости изрядный служитель, Ангельскаго жительства истинный подражатель, Божественныя чистоты рачитель, архиереом сопрестольниче, преподобным сожительниче, пастырская красота, Великому Новуграду похвала, святителю пречестный Феоктисте, отче наш, Емуже, Слову Божию, в житии сем послужил еси, моли спастися душам нашим.

Тропарь преподобному Феоктисту Палестинскому

Тропарь, глас 8:
Слез твоих теченьми, пустыни безплодное возделал еси, и иже из глубины воздыханьми, во сто трудов уплодоносил еси, и был еси светильник вселенней, сияя чудесы, Феоктисте отче наш, моли Христа Бога, спастися душам нашим.

Тропарь преподобному Феоктисту, бывшему Драгутину, королю Сербскому

Тропарь, глас 4:
Божественнаго страха огнем душу свою распалил еси, очистився покаянием и украсився кротостию и смирением, востекл еси к невечернему Свету — Христу, преподобне отче Феоктисте, и ныне, трисолнечным светом озаряемь, на Небеси ликуеши, моли о нас, верою почитающих честную память твою.

Тропарь святителю Феофану, Затворнику Вышенскому

Тропарь, глас 8:
Православия наставниче, благочестия учителю и чистоты, Вышенский подвижниче, святителю Феофане богомудре, писаньми твоими слово Божие изъяснил еси и всем верным путь ко спасению указал еси, моли Христа Бога спастися душам нашим.

Кондак, глас 4:
Богоявлению тезоименитый, святителю Феофане, учении твоими многия люди просветил еси; со Ангелы ныне предстоя Престолу Святыя Троицы, моли непрестанно о всех нас.

Тропарь преподобному Феофану, исповеднику, епископу Никейскому

Тропарь, глас 8:
Православия наставниче, благочестия учителю и чистоты, вселенныя светильниче, архиереов Богодухновенное удобрение, Феофане премудро, ученьми твоими вся просветил еси, цевнице духовная, моли Христа Бога спастися душам нашим.

Тропарь святителю Феофану, епископу Тамбовскому

Тропарь, глас 8:
Православия наставниче, благочестия учителю и чистоты, Вышинский подвижниче, святителю Феофане богомудре, писаньми твоими Слово Божие изъяснил еси и всем верным путь ко спасению указал еси: моли Христа Бога спастися душам нашим.

Кондак, глас 4:
Богоявлению тезоименитый, святителю Феофане, учении твоими многия люди просветил еси, со ангелы ныне предстоя Престолу Святыя Троицы, моли непрестанно всех нас.

Тропарь преподобному Феофану, исповеднику Сигрианскому

Тропарь, глас 5:
Воздержанием житие украсил и, узды умертвив, победил еси вражия козни, отче Феофане, преставился еси к Богу в вечную жизнь, яко достоин причастник, моляся непрестанно, помиловати души наша.

Кондак, глас 5:
Свыше прием Божественное откровение, со тщанием изшел еси от среды молвы житейския и, уединився, преподобне, чудес приял еси действо и пророчества достоинство, богатства и супружницы лишився.

Тропарь преподобному Феофилу, архиепископу Новгородскому, в Дальних пещерах

Тропарь, глас 4:
Правило веры, и образ кротости, и воздержания известный учитель Христову стаду воистину был еси, уча е выну смирению, не мудрствовати еже высокая, сего ради стяжал, яже желаше, отче святителю Феофиле, моли Христа Бога спастися душам нашим.

Тропарь преподобному Феофилакту исповеднику, епископу Никомидийскому

Тропарь, глас 6:
Таяся, пожил еси, прехвальне, но Христос тя показа, яко светило на свещнице мысленнем, и скрижали ти вручи учений духовных, имиже, святителю Феофилакте, и нас озари.

Тропарь преподобному Ферапонту Белоезерскому, Можайскому

Тропарь, глас 4:
Житием чистым просветився, в молитвах и постех пустыни явился еси доброе прозябение и, духовному твоему учителю последствуя, ум свой к Небесным управль, стаду твоему наставник был еси, тем тя молим, отче Ферапонте: моли Христа Бога спастися душам нашим.

Тропарь преподобному Ферапонту Монзенскому

Тропарь, глас 8:
Любовию Христовою, Богомудре, просветився, и добродетельми сожительствовал еси Василию блаженному, и, всякое наслаждение плотское возненавидев, в пустыню вселился еси, в ней же вельми подвизался еси, в жизни сей временней плоть умершвляя свою в пениих, и во бдениих, и в пощениих. Тем же и Христос даром чудес обогати тя, но поминай убо нас, чтущих пресветлую память твою, преподобне отче Ферапонте, и моли Христа Бога спастися душам нашим.

Тропарь святому праведному Филарету Милостивому

Тропарь, глас 8:
В терпении твоем стяжал еси мзду свою, праведне, и в заповедех Господних совершенне пожил, нищих возлюбил и сих удоволил еси, но молися Христу Богу, блаженне, спастися душам нашим.

Ин тропарь, глас 4:
Аврааму в вере подражая, Иову же в терпении последуя, отче Филарете, благая земли разделял еси неимущим и лишение сих терпел еси мужественне. Сего ради светлым тя венцем увенча Подвигоположник, Христос Бог наш, Егоже моли спастися душам нашим.

Кондак, глас 3:
Истинно всеизрядная твоя купля зрится и мудрою быти судится всеми благомудрствующими: отдал бо еси дольняя и кратковременная, взыскуя Горних и Вечных. Темже и достойно стяжал еси вечную славу, милостиве Филарете.

Стихира:
Благотворяй от Бога есть, глаголет Богослов, и ты убо от Бога еси, милостиве Филарете. Якоже бо Божие есть, тако и твое бысть дело, еже благодеяти, Того убо по естеству, твое же по причастию.

Тропарь святителю Филарету, митрополиту Московскому

Тропарь, глас 4:
Духа Святаго благодать стяжав, богомудре святителю Филарете, истину и правду разумом просвещенным людем проповедал еси, мир и милость сердцем умиленным, страждущим явил ее и, яко учитель веры и страж неусыпный паству Российскую жезлом правости сохранил еси. Сего ради ко Христу Богу дерзновение имея, моли даровати церкве утверждение, людем и душам нашим спасение.

Кондак, глас 2:
Яко истинный подражатель преподобнаго Сергия, добродетель измлада возлюбил еси, богоблаженне Филарете. Яко пастырь праведный и исповедник непорочный, по святем преставлении от безбожных поругание и поношения приял еси, Бог же знаменми и чудесы тя прослави и заступника Церкве нашея яви.

Величание:
Величаем тя, святителю отче Филарете, и чтим святую память твою: ты бо молиши за нас Христа Бога нашего.

Тропарь преподобному Филиппу Ирапскому

Тропарь, глас 4:
Яко кедр, в пустыни давидски растущ, и яко финикс, благоуханен цветущ, ревнитель учителю твоему был еси, преподобному отцу Корнилию, стопам бо его последовал еси и, святое иго взем, светлым житием просиял еси, яко солнце, явлься мирови многими чудесы, отче Филиппе! И Ныне на Небесех предстоиши Престолу Пресвятыя Троицы и, яко великое имея дерзновение, преподобнии свои руце воздев, моли от враг сохранитися градом нашим и спастися душам нашим.

Тропарь святителю Филиппу, митрополиту Московскому и всея России чудотворцу

Тропарь, глас 8:
Первопрестольников преемниче, столпе православия, истины поборниче, новый исповедниче, святителю Филиппе, положивый душу за паству твою. Темже яко имея дерзновение ко Христу, моли за православныя люди чтущия достойно святую память твою.

Тропарь, глас 5 (Перенесение мощей):
Радостный возсия день светлаго торжества: днесь церковная расширяются недра, приемлюще духовных даров неоскудеемо боготворное сокровище, струю благодатей неисчерпаемую, источника чудесем обильна, чудотворивыя и священныя мощи твоя, святителю Филиппе. Темже моли прославившаго тя Дародателя Христа Бога о воспевающих тя и кланяющихся священным мощем твоим.

Кондак, глас 3:
Православия наставника и истины провозвестника, Златоустаго ревнителя, Филиппа премудраго восхвалим, пищею словес своих разумно чада своя питающа, той бо языком хваления пояше, устнама же пение вещаше, яко таинник Божия благодати.

Тропарь апостолу Филиппу

Тропарь, глас 3:
Благоукрашается вселенная, Ефиопия ликовствует, яко венцем красуема, тобою просветившися, светло торжествует память твою, Богоглаголиве Филиппе, вся бо веровати Христу научил еси и течение совершил достойно Евангелия. Тем дерзновенно варит Ефиопская рука к Богу, Егоже моли даровати нам велию милость.

Тропарь мученикам Флору и Лавру

Тропарь, глас 4:
Преудобренную и богомудрую двоицу пресветлую восхвалим вернии по достоянию, Флора преблаженного и Лавра всечестнаго, иже усердно Троицу Несозданную ясно проповедаста всем. Темже пострадавше до крове, и венцы пресветлыми увязостеся: молитеся Христу Богу, да спасет души наша.

Кондак, глас 8:
Яко благочестия мученики, и страдальцы Христовы богомудренны, вселенная преславно почитает Флора и Лавра днесь: яко да улучим благодать и милость молитвами их, и избавимся бед и напастей, гнева же и скорби в день судный.

Тропарь апостолу Фоме

Тропарь, глас 2:
Ученик Христов быв, Божественнаго собора апостольскаго сопричастник, неверствием во Христово воскресение известив и Того пречистую страсть осязанием уверив, Фомо всехвальне, и ныне нам проси мира и велия милости.

Кондак, глас 8:
Любопытною десницею жизноподательная Твоя ребра Фома испыта, Христе Боже: созаключенным бо дверем яко вшел еси, с прочими апостолы вопияше Тебе: Господь еси и Бог мой.

Тропарь святителю Фотию, митрополиту Киевскому и всея Руси

Тропарь, глас 4:
Словес евангельских послушателю и Божественных учений рачителю, премудрый наказателю, всегда страху Господню поучаяйся, в молитвах к Богу простираяйся, заградителю уст кривоглаголющим слово правыя веры, апостолом сопричастниче, вере Христовой утвердителю, пророчески вещателю, святителю Фотие, моли Христа Бога умирити мир и спасти души наша.

Тропарь преподобной Фотинии (Светлане) Палестинской

В тебе мати, известно спасеся еже по образу: приимши бо крест, последовала еси Христу, и деющи учила еси презирати убо плоть: преходит бо, прилежати же о души, вещи бессмертней. Темже и со Ангелы срадуется, преподобная мати Светлане, дух твой.

Величание:
Ублажаем тя, преподобная мати Светлане, и чтем святую память твою: ты бо молиши за нас Христа Бога нашего.

Тропарь священномученику Харалампию

Тропарь, глас 4:
Яко столп избранный Церкве Христовой и светильник присносветлый всея вселенныя, премудре показася, Харалампие, возсия в мире мучением, разруши идольское мракобесие, блаженне, сего ради явися предстатель Христу, молися спастися нам.

Тропарь преподобной (благоверной княгине) Харитине Литовской

Тропарь, глас 2:
От юности твоея Бога всем сердцем возлюбила еси, Харитино преподобная, подвиги в вере положила еси за Христа Жениха твоего, и в новое твое Отечество, землю русскую вселилась еси, к Небесному Отечеству нас призывавши, моляши Христа Бога спастися душам нашим.

Кондак, глас 4:
Отечество твое и род оставив, Великаго Новаграда достигла еси, во обители иноческой многотрудный подвиг преподобнический подъяла еси, ангельски на земле поживше, многим женам русским путь ко спасению показа. Темже вси притекающе к тебе, зовем: радуйся, преподобная мати наша Харитино.

Величание:
Ублажаем тя, преподобная мати Харитино, и чтим святую память твою, наставнице инокиням и собеседнице ангелом.

Тропарь мученикам Хрисанфу и Дарии

Мученицы Твои Господи, во страданиих своих венцы прияша нетленныя от Тебе Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.

Тропарь Пресвятой Богородице перед Ея иконой, именуемой «Цареградская»

Тропарь, глас 1:
Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, приходящих к ней с верою и любовию и молящихся усердно к Твоему, еже о Сыне Твоем и Бозе, величию. Слава Богу, Евфосином сию давшему нам! Слава Приведшему ю от Царьграда! Слава Дающему тою всем исцеления.

Тропарь Пресвятой Богородице перед Ея иконой, именуемой «Целительница»

Тропарь, глас 4:
Яко Пресветлая Звездо, просия Божественными чудесы святый Твой образ «Целительнице», подаждь убо и нам, Богородице Марие, исцеление недугов душевных и телесных, спасение и велию милость.

Тропарь, глас 1:
Любовию, Чистая Дево, Твою святую икону почитающим и Божию Тя истинную Матерь прославляющим и верно поклоняющимтися Целительница явися, всякое зло и болезни от сих удаляющая, яко Всемогущая.

Тропарь Пресвятой Богородице перед Ея иконой, именуемой «Черниговская-Гефсиманская»

Тропарь, глас 5:
Пречистая Владычице Богородице, упование всех христиан, понеже инаго упования не имамы разве Тебе, Всенепорочная Владычице моя, Госпоже Богородице, Мати Христа Бога моего. Темже помилуй и избави мя от всех зол моих и умоли Милостиваго Сына Своего и Бога моего, да помилует окаянную душу мою, и да избавит мя от вечныя муки, и сподобит мя Царствия Своего.

Тропарь Пресвятой Богородице перед Ея иконой, именуемой «Чирская» (Псковская)

Тропарь, глас 4:
Яко необоримую стену и источник чудес, стяжавше Тя, рабы Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Тропарь преподобному Шио Мгвимскому

Тропарь, глас 8:
В тебе, отче, известно спасеся еже по образу, приим бо крест, последовал еси Христу, и дея учил еси презирати убо плоть, приходит бо, прилежати же о души, вещи безсмертней. Темже и со Ангелы срадуется, преподобне Шио, дух твой.

Кондак, глас 4:
Житие твое служением Господним исправил еси и, взем крест, оставил еси вся житейская, красото пустыни, преподобне Шио. Кого убо паче тя, и по смерти жив суща страна Иверская почитает и мощми твоими, от гроба явленными услаждается, темже не престай моляся о нас ко Господу.

Тропарь Пресвятой Богородице перед Ея иконой, именуемой «Шуйская-Смоленская»

Тропарь, глас 4:
Яко многоценное сокровище прият град Шуя чудесно написанную икону Твою, Пресвятая Владычице, Дево Богородице, во исцеление лютыя язвы и во утешение православных Тобою дарованную, от неяже источники благодатныя и до ныне обильно изливаются. Пробави, Пречистая, и на будущее время милости Твоя ведушим Тя, храни град Твой и всю Русскую землю и спасай людей, к Тебе с верою и любовию притекающих.

Тропарь Пресвятой Богородице перед Ея иконой, именуемой «Экономисса»

Тропарь, глас 4:
Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси страну нашу и всех православно живущих в ней защити, зане родила еси Бога, Едина Благословенная.

Тропарь Пресвятой Богородице перед Ея иконой, именуемой «Югская-Смоленская»

Тропарь, глас 4:
Днесь яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою покланяющихся Его Божественному и Твоему Пречистому образу, Дево Неискусобрачная.

Тропарь явлению Пресвятой Богородицы преподобному Сергию Радонежскому

Тропарь, глас 4:
В преславнем явлении Твоем, Дево Богородице, припаде к стопам Твоим преподобный авва Сергий и мольбу о святей обители изрядно сотвори, да Твоим Матерним ко Христу предстательством усердно присно ходатайствуеши о всех под священный покров Твой прибегающих, просящи нам оставления грехов и велия милости.

Величание:
Величаем Тя, Пресвятая Дево, Богоизбранная Отроковице, и чтим явление Твое, имже точиши обетование покрывати присно место сие.

Тропарь явлению на небе Креста Господня в Иерусалиме

Тропарь, глас 8:
Креста Твоего образ ныне паче солнца возсия, егоже от горы святыя даже до лобнаго места простерл еси и в нем Твою, Спасе, крепость уяснил еси, сим укрепляя нас и спасай выну в мире молитвами Богородицы, Христе Боже, и спаси нас.

Тропарь благоверному князю Ярополку, во святом крещении Петру, Владимиро-Волынскому

Тропарь, глас 4:
Яко благоверен и праведен, за любовь Христа Бога от своих смерть приял еси, Ярополче, страстотерпче святый, благоверный княже Волынский, и пролиял еси кровь твою, якоже прежде сродницы твои и страстотерпцы, Богоблаженнии Борис и Глеб, ихже подвигом ревнуя благочестно, Господеви взывал еси усердно: даруй ми кончину, якоже братиям моим, да и аз омыю грехи моя кровию моею и избавлюся мира сего тщетнаго и мятежнаго. Темже, днесь сошедшеся в память твою, верою и любовию славим Господа, укрепившаго Тебе в подвизе напрасныя смерти, яко же бо агнец незлобивый, от раба заколен еси, и себе самаго жертву непорочну Господеви принесл еси, Егоже моли, присноблаженне, спасти Отечество твое и сыновом Российским спастися.

Иные популярные молитвы:

Молитвы иные иконе Божьей матери и святым угодникам
Молитвы о вере
Что нужно знать верующему. Первые шаги в храме
О молитве: Как нужно молиться и каких ошибок избегать, Молитвенное правило, Из каких молитв должно состоять молитвенное правило мирянина, Когда совершать свое молитвенное правило, Как подготовиться к молитве, Как совершать дома свое молитвенное правило, Что делать при рассеянии на молитве, Как заканчивать свое молитвенное правило, Как научиться молитвенно проводить день, Как принудить себя к молитве, Что нужно для успешной молитвы
Заповеди Блаженства
Различные молитвы
Ежедневные молитвы
Тропари Е-З. Тропарь Пресвятой Богородице. Тропарь святым преподобным угодникам
Тропари Р-Я. Тропарь Пресвятой Богородице. Тропарь святым преподобным угодникам
Молитвы о благосостоянии детей в обществе
Молитвы спасении от насилия
Молитвы о помощи в житейских делах, о благословении Божием над домом
Акафист, Молитвы составленные в заключении
Молитвы к чудотворным иконам Божией Матери, Пресвятой Богородице
Сильные молитвы Николаю Чудотворцу


... Добавить в "Закладки" ... Ctrl+D


Для пожертвований:

Пожертвование.

Да хранит Вас Господь!

Православные информеры для сайтов и блогов




Все молитвы ...