Молитвы святых угодников

Главная --> Молитвы --> Тропари

Тропари О-П.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. О-П.

Тропарь о болящих

Тропарь, глас 4:
Скорый в заступлении един сый, Христе, скорое свыше покажи посещение страждущим рабом Твоим, и избави от недуг и горьких болезней, и воздвигни во еже пети Тя и славити непрестанно, молитвами Богородицы, Едине Человеколюбче.

Тропарь о ненавидящих и обидящих нас

Тропарь, глас 4:
О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякого зла и лукавства к добродетельному настави жительству, смиренно мольбу Тебе приносим, да в согласном единомыслии славим Тя, Единаго Человеколюбца.

Тропарь о путешествующих

Тропарь, глас 2:
Путь и истина сый, Христе, спутника Ангела Твоего рабом Твоим ныне, якоже Товии иногда, посли сохраняюща, и невредимых к славе Твоей, от всякого зла во всяком благополучии соблюдающа, молитвами Богородицы, Едине Человеколюбче.

Тропарь о умножении любви

Тропарь, глас 4:
Союзом любве апостолы Твоя связавый, Христе, и нас, Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче.

Тропарь о усопших

Тропарь, глас 2:
Помяни, Господи, яко благ, рабы Твоя, и елика в житии согрешиша прости, никтоже бо без греха, токмо Ты един, могий и преставленным дати покой.

Тропарь обновлению Храма Воскресения Христова в Иерусалиме

Тропарь, глас 4:
Якоже вышния тверди благолепие, и нижнюю споказал еси красоту святаго селения славы Твоей Господи, утверди сие во век века, и приими наша в нем непрестанно приносимая Тебе моления, Богородицею, всех Животе и Воскресение.

Тропарь Обрезанию Господню

Тропарь, глас 1:
На Престоле огнезрачнем в Вышних седяй со Отцем Безначальным и Божественным Твоим Духом, благоволил еси родитися на земли от Отроковицы Неискусомужныя, Твоея Матере, Иисусе, сего ради и обрезан был еси, яко Человек осмодневный. Слава всеблагому Твоему совету, слава смотрению Твоему, слава снизхождению Твоему, Едине Человеколюбче.

Величание:
Величаем Тя, Живодавче Христе, и почитаем пречистыя плоти Твоея законное обрезание.

Тропарь Пресвятой Богородице перед Ея иконой, именуемой «Озерянская»

Тропарь, глас 3:
Твоего предстательства уверение и милосердия Твоего явление икона Озерянская нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.

Тропарь Пресвятой Богородице перед Ея иконой, именуемой «Оковецкой»

Тропарь, глас 4:
Предстательнице нератная, о Одигитрие готовая! Тверския земли и града Москвы красота и слава, днесь в кров Твой вси прибегаем и умильно вопием Твоему крепкому заступлению, просяще избавления от злых наветников православия, присно борющих нас, и получити, Богородительнице Чистая, токи неисчерпаемых чудесных исцелений от Твоея пречудныя иконы молитвой предстоящего пред Тобою Мирликийского чудотворца Николая да усердно вси Твое проповемы наше ограждение.

Кондак, глас 4:
Яко стену необоримую, источник милосердия, упование земным и заступление, Мати всяческих Творца Всесветлая, Тя стяжавши, раби Твои Богоотроковице, на мольбу нашу ныне умилосердися иже от врагов православия насилование скоро и невозвратно разори мечем божественныя Твоея и святителя Николая молитвами и не остави прославляющия люди и стада Твоя погибнути, яко вся возможно Тебе, чистая Богородице Неискусобрачная и Мати Зиждителя сущи и Всепетая, да усердно вси Твое проповемы наше ограждение.

Величание:
Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающих к нему.

Тропарь преподобному Олегу Брянскому, благоверному князю

Тропарь, глас 8:
От юности возлюбив Христа всем сердцем, преподобне славу земную, яко преходящу, оставил еси и царство земное в ничтоже вменивше, лику инок радостно причелся еси и труды многими град Брянск, аки солнце пресветло, озарил еси: тем, быв Троицы украшение, моли, княже Олеже, Христа Бога, спастися душам нашим.

Величание:
Ублажаем тя, благоверне княже Олеже, и чтим святую память твою, ты бо молиши за нас Христа Бога нашего.

Тропарь святой равноапостольной княгине Ольге

Тропарь, глас 1:
Крилами богоразумия вперивши твой ум, возлетела еси превыше видимыя твари, взыскавши Бога и Творца всяких и Того обретши, паки рождение крещением прияла еси, древа животнаго наслаждающися, нетленна во веки пребываеши, Ольго приснославная.

Кондак, глас 4:
Воспоем днесь Благодетеля всех Бога, прославльшего в России Ольгу богомудрую, да молитвами ея подаст душам нашим грехов оставление.

Величание:
Величаем тя, блаженная и равноапостольная княгине Ольго, и чтим святую память твою, идолы поправшую и многия люди Российския святым Крещением просветившую.

Величание:
Величаем тя, святая равноапостольная княгине Ольго, яко зарю утреннюю в земли нашей возсиявшую и свет веры Православныя народу своему предвозвестившую.

Тропарь преподобному Онуфрию Великому

Тропарь, глас 1:
Желанием духовным пустыни достигл еси, богомудре Онуфрие, и яко безплотен в ней многолетне подвизался еси трудолюбне, соревнуя пророкам Илии и Крестителю: и от руку ангельску таин божественных насладився, ныне во свете Святыя Троицы купно с ними веселишеся. Моли спастися нам, твою память почитающим.

Тропарь преподобному Онуфрию и Авксентию Вологодским

Тропарь, глас 8:
Православия наставницы, благочестия и чистоты учителие, Церкви Вологодстей Богодарованное украшение, преподобнии отцы наши Онуфрие и Авксентие, молите милостиваго Бога, да вашим предстательством подаст благодать и мир стране нашей и душам нашим спасение.

Тропарь преподобному Онуфрию молчаливому и Онисиму затворнику, Печерским, в Ближних пещерах

Тропарь, глас 3:
Преблаженнии и Богоноснии отцы наши Онуфрие и Онисиме, яко стяжавшии дерзновение ко Господу равноангельным своим житием, егоже ради обогати Христос нетлением и чудесы мощи ваша, молим вас прилежно: испросите душам нашим очищение и велию и богатую милость.

Тропарь мученику Оресту, врачу

Тропарь, глас 4:
Удом усекновение терпел еси и огненную лютую муку, мучениче, подвигся, всеславне, венцем яве увязеся нетленным, преблаженне, Престолу же предстоиши Святыя Троицы, Юже помоли, да спасет ны, мучениче Оресте, верою поющим тя.

Тропарь на освящение воды

Тропарь, глас 6:
С небесе посли благодать, Жизнодавче, и воду сию освяти, и всем сквернам яви ю быти очищение.

Тропарь на освящение храма

Тропарь, глас 3:
Иже на камени веры создавый, церковь Твою, Блаже, к той исправи моления наша, и приими люди в вере вопиющих Тебе: спаси ны Боже наш, спаси ны.

Тропарь Святым угодникам Киево-Печерской Лавры, из среды которых вышли блаженные отцы, основавшие Обитель Почаевскую

Тропарь, глас 4:
Приспе день светлаго торжества, обитель Печерская радуется, и с нею благословенная Почаевскя лавра ликовствует во псалмех и пениих и песнех духовных: Днесь бо, яко же солнце незаходимое всем возсия, память Преподобных и Богоносных отец Печерских, от нихже, волею Божиею, изыдоша первоначальницы иноческаго жития на Горе Почаевстей. Ихже молитвами, Господи, землю отечественную нашу в православии и мире утверди, и помилуй всех, имущи купно о нас Молитвенницу и Заступницу Усердную, Пречистую Матерь свою Богородицу, от лет древних благодатне сияющую в Цельбоносней Стопе своей и чудотворней Своей иконе во обители Почаевстей, в просвещение и спасение душ наших.

Тропарь в прещение труса (об избавлении от землетрясения)

Тропарь, глас 2:
Призираяй на землю, и творяй ю трястися, избави ны страшнаго труса прещения, Христе Боже наш, и низпосли нам богатыя милости Твоя, молитвами Богородицы, и спаси ны.

Тропарь святым отцам 6-ти Вселенских Соборов

Тропарь, глас 8:
Препрославен еси, Христе Боже наш, светила на земли отцы наша основавый и теми ко истинней вере вся ны наставивый, Многоблагоутробне, слава Тебе.

Тропарь святым отцам I-го Вселенского Собора

Тропарь, глас 8:
Препрославен еси, Христе Боже наш, светила на земли отцы наша основавый и теми ко истенней вере вся ны наставивый, Многоблагоутробне, слава Тебе.

Тропарь святым отцам VII-го Вселенского Собора

Тропарь, глас 8:
Препрославлен еси, Христе Боже наш, светила на земли отцы наша основавый и теми ко истинней вере вся ны наставивый, Многоблагоутробне, слава Тебе.

Тропарь Отцам

Тропарь, глас 8:
Препрославлен еси Христе Боже наш, иже на земли отцы наша основавый, и теми ко истинней вере вся ны наставивый, Многоблагоутробне, слава Тебе.

Тропарь мученикам Павлу и Иулиании

Мученицы Твои, Господи, во страданиих своих венцы прияша нетленныя от Тебе Бога нашего имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.

Тропарь преподобному Павлу Обнорскому и Комельскому, Вологодскому чудотворцу

Тропарь, глас 1:
Божественною любовию от юности распаляем, Павле преподобне, вся, яже в мире, красная возненавидев, Христа единаго возлюбил еси, и сего ради во внутреннюю пустыню вселился еси со зверьми жити весь Христу: отонудуже и всевидящее Око, твоя труды видев, даром чудес и по преставлении обогати тя. Темже вопием ти: моли непрестанно о всех нас, честную память твою присно в песнех почитающих.

Тропарь преподобному Павлу Послушливому, Печерскому, в Дальних пещерах

Тропарь, глас 3:
Послушанию Христову подражавый, и Имени Его ради во всяком послушании, терпеливне, даже до смерти, Павле всечестне, потрудивыйся, мзду же ныне послушания своего трудолюбно от Господа прием, к Нему всегда молися о нас, поющих тя.

Тропарь преподобному Павлу Препростому

Тропарь, глас 8:
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Павле, дух твой.

Тропарь святителю Павлу, митрополиту Тобольскому

Тропарь, глас 3:
Прославим, вернии, благочестие возлюбившаго, и от юности иго Христово усердно восприимшаго, ревностнаго святителя Церкве Российския, в Богоспасаемом граде Тобольске подвизавшагося. Ты же, Богомудре отче Павле, телом убо в нетлении почивая, духом же Престолу Божию предстоя, моли спастися душам нашим.

Кондак, глас 8:
Звезду церковную, от Киево-Печерския Лавры возсиявшую и чрез Новград в Сибирскую страну достигшую, идеже ревностно служением своим сияющую, святителя почтим, Тобольския митрополии столетие венчавшаго: радуйся, отче Павле, всея Сибири чудотворче.

Тропарь преподобному Паисию Великому

Тропарь, глас 2:
Божественною любовию от юности распалаемь, преподобне, вся красная, яже в мире, возненавиде, Христа единаго возлюбил еси, сего ради в пустыню вселися, идеже сподобися Божественнаго посещения, Егоже неудобь зрети и ангельскима очима, паде, поклонися. Великий же Дародатель, яко Человеколюбец рече к тебе: не ужасайся, возлюбленный Мой, дела твоя угодна Мне. Се даю тебе дар: о коемлибо грешнице помолишися, отпустятся ему греси. Ты же в чистоте сердца твоего возгореся, прием воду и прикоснуся Неприкосновенному, умы нозе Его и, воду пив, даром чудес обогатися, болящия исцеляти, бесы от человек отгоняти и грешники от муки молитвою своею избавляти. О преподобне отче Паисие, молю тя, да умолиши и о мне, якоже тебе Бог обетова, ибо от сих грешник первый аз есмь, да даст ми Господь время покаяния и простит мое согрешение, яко Благий и Человеколюбец, да со всеми и аз воспою Ему: Аллилуиа.

Тропарь преподобному Паисию Величковскому

Тропарь, глас 2:
Странен быв на земли, Небесного отечества достигл еси, преподобне отче Паисие, добротолюбия подвижниче, верных научил еси ум к Богу возводити и сердцем к Нему взывати: Господи Иисусе Христе, Сыне Божий, помилуй мя, грешнаго.

Кондак, глас 8:
Избранный иноческого жития ревнителю, яко пчела многотрудная, писаньми отеческими души наша снабдил еси, коегождо наставляя на путь спасения, сего ради зовем ти: радуйся, Паисие премудре, старчества духовнаго в стране нашей возродителю.

Тропарь преподобному Паисию Галичскому

Тропарь, глас 8:
Днесь возсия нам память твоя, славне Паисие, яко солнце светозарное, лучами озаряющи весь мир, тако и ты, преподобне, чудесы своими тьму нощи злых духов от нас отгоняя; днесь Небесныя силы, и святых Ангел, и души праведных мысленно торжествуют, радующеся; днесь и мы, грешнии, припадающе честному твоему образу молимся: о, преподобне Паисие, Христа Бога моли непрестанно спасти град и люди, иже тебе почитающия.

Тропарь преподобному Паисию Печерскому, в Дальних пещерах

Тропарь, глас 4:
Великаго во отцех подражая Паисия, якоже он в пустыню, тако и ты в пещеру вселился еси, идеже труды прилагая, блаженне, ко трудом, и псаломскому пению выну прилежал еси, моли о нас, поющих тя.

Кондак, глас 5:
Всею душею и помышлением, Паисие, Христа возлюбив, Тому вседушне вся дни живота твоего служил еси, Богомудре, тем по кончине твоей наследил еси радость и вечное наслаждение.

Тропарь преподобному Паисию Угличскому

Тропарь, глас 8:
Христовы ради любве отечество и род оставил еси, и, ангельскому житию поревновав, в пустыню вселился еси, в нейже многотрудное житие явил еси и чудес дарования от Бога приял еси, Паисие преподобне, моли Христа Бога спастися душам нашим.

Тропарь преподобному Палладию Александрийскому

Тропарь, глас 1:
Монашествовав Богоугодно, Богоносне отче наш, молитвою и постом Бога взыскал еси и был еси приятелище чисто Духа, блистая верным добродетельныя зари, имиже просвещаеши вся чтущия тя. Слава прославльшему тя Христу, слава Укрепльшему тя, слава Действующему тобою всем исцеление.

Тропарь преподобному Памве, затворнику Печерскому, в Дальних пещерах

Тропарь, глас 1:
Неленостным послушанием и отвержением воли своея крепко себе обуздав, вдался еси за Христа Бога на муки и раны, от Негоже сугубо, всечестне отче Памво, венчався, молися о душах наших.

Кондак, глас 2:
Послушание иноческое кровию мучения обагриша, ублажаем тя любезне, преподобномучениче Памво, и, поклоняющеся честным мощем, верно молим: молися Господеви непрестанно о всех нас.

Тропарь преподобному Панкратию Печерскому, в Дальних пещерах

Тропарь, глас 2:
Панкратие Богомудре, священниче Господень изрядне, и чудес многих самодетелю, молися Господеви, во еже спасти души наша.

Тропарь священномученику Панкратию, епископу Тавроменийскому

Тропарь, глас 8:
Яко стрела огнезрачная, от Верховнаго послан был еси Тавроменийскому престолу уязвляти безбожных злочестие, верных же сердца просвещати, яже боговещанными твоими словесы в вере утвердив и течение совершив, пострадал еси до крове, священномучениче Панкратие, моли за вся, поющия память твою.

Тропарь великомученику и целителю Пантелеимону

Тропарь, глас 3:
Страстотерпче святый и целебниче Пантелеимоне, моли Милостивого Бога, да прегрешений оставление подаст душам нашим.

Кондак, глас 5:
Подражатель сый Милостиваго, и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.

Величание:
Величаем тя, страстотерпече святый великомучениче и целебниче Пантелеимоне, и чтим честная страдания твоя, яже за Христа претерпел еси.

Тропарь мученице Параскеве Пятнице

Тропарь, глас 4:
Премудрая и всехвальная Христова мученица Параскева, мужескую крепость приемщи, женскую же немощь отвергши, диавола победи, и мучителя посрами, вопиющи и глаголющи: приидите, тело мое мечем ссецыте, и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.

Кондак, глас 3:
Всесвятое и непорочное мучение принесши, яко вено пречестное Безсмертному Жениху Христу, ангельское ликостояние возвеселила еси, и победила еси демонския козни: сего ради тя честно верою чтим, мученице Параскево, многострадальная.

Величание:
Величаем тя, страстотерпице Христова Параскево, и чтим честное страдание твое, еже за Христа претерпела еси.

Тропарь преподобномученице Параскеве Римской

Тропарь, глас 1:
Тщание имущи сообразно имени твоему, тезоименитая, равноимянную тебе веру в сожительство избрала еси, Параскево победоносная темже изливаеши исцеления и молишися о душах наших.

Тропарь преподобной Параскеве Сербской

Тропарь, глас 4:
Пустынное и безмолвное житие возлюбивши, и во след Христа, Жениха твоего, усердно потекши, и Того благое иго во юности твоей вземши, Крестным знамением к мысленным врагом мужески вооружившися, постническими подвиги, постом, и молитвами, и слезными каплями углие страстей угасила еси, достославная Параскево: и ныне в Небеснем чертозе с мудрыми девами предстоящи Христу, моли о нас почитающих честную память твою.

Тропарь преподобному Пафнутию Боровскому

Тропарь, глас 4:
Жития светлостию просветив твое отечество, в молитвах и постех дарований Божественнаго Духа исполнился еси, и, во временней сей жизни добре подвизався, милость благоутробия всем скорбящим отверзл еси, и нищим был еси заступник. Тем молим тя, отче Пафнутие, моли Христа Бога, да спасет души наша.

Тропарь преподобному Пафнутию, затворнику Печерскому, в Дальних пещерах

Тропарь, глас 2:
Велия веры исправления, в пещернем затворе, яко на воде упокоения, преподобне отче Пафнутие, радовался еси, огнем бо любве Божественныя распаляемь, бдением и молитвою безстрастия достигл еси и явился еси равноангельный на земли, того молитвами, Христе Боже, спаси души наша.

Тропарь преподобному Пахомию Великому

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Пахомие отче наш, моли Христа Бога спастися душам нашим.

Тропарь перед началом всякого доброго дела

Тропарь, глас 2:
Творче и Создателю всяческих, Боже, дела рук наших к славе Твоей начинаемая, Твоим благословением спешно исправи, и нас от всякого зла избави, яко един всесилен и Человеколюбец.

Тропарь Пресвятой Богородице перед Ея иконой, именуемой «Песчанская»

Люди верные со дерзновением притецем к чудотворному образу Богоматери Песчанской, ибо она дарует граду сему и стране нашей велию милость и спасение душам нашим.

Тропарь священномученику Петру, архиепископу Александрийскому

Тропарь, глас 8:
От вышняго суда Христова предстательствова стаду, на пажитех благожизненных упасл еси всемудрыми твоими догматы, отгнав Ария, яко волка некроткаго, вшедшаго в них безбожными учении. Темже и душу твою положил еси за них, пастырь нареклся еси, яко рече Господь, иерарше Петре блаженне, моли Христа Бога грехов оставление даровати чтущим любовию святую память твою.

Тропарь апостолу Петру (поклонение честным веригам апостола Петра)

Тропарь, глас 4:
Рима не оставль, к нам пришел еси честными веригами, яже носил еси, апостолов первопрестольне. Имже верою покланяющеся, молимся: твоими к Богу молитвами даруй нам велию милость.

Тропарь святым апостолам Петру и Павлу

Тропарь, глас 4:
Апостолов первопрестольницы и вселенныя учителие, Владыку всех молите, мир вселенней даровати и душам нашим велию милость.

Кондак, глас 2:
Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, Едине сведый сердечная.

Величание:
Величаем вас, Апостоли Христовы, весь мир ученьми своими просветившыя и вся концы ко Христу приведшия.

Тропарь мученику Петру и Стефану Казанским

Тропарь, глас 4:
Мучеников двоица единонравная, Стефане и Петре славнии, неверие соплеменников обличивше, Христу последовали есте, во Святую Троицу веровати всех научающе, Еяже ради великия страдания приемше, молитеся о нас ко Господу, да, избавившеся тьмы греховныя, Света явимся общницы невечерняго.

Тропарь благоверному князю Петру, в иночестве Давиду, и Февронии, в иночестве Евфросинии, Муромским чудотворцам

Тропарь, глас 8:
Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.

Величание:
Ублажаем вас, святии чудотворцы Петре и Февроние, и чтим святую память вашу, вы бо молите за ны Христа, Бога нашего.

Тропарь преподобному Петру Коришскому, Сербскому

Тропарь, глас 4:
Любовию Христовою просвещен, измлада возлюбил еси монашеское житие и, возненавидев всякое плотское наслаждение, житие твое исполнил еси терпением, постом и молитвами, просиял бо еси добродетельми, яко светлое светило, и ныне, усердно молим тя: моли Христа Бога сохранити отечество наше и весь крестоносный народ сербский и всем даровати велию милость.

Тропарь священномученику Петру (Полянскому), митрополиту Крутицкому

Тропарь, глас 2:
Божиим смотрением к святительскому служению святым Патриархом Тихоном призванный, стаду Христову явился еси страж неусыпный и защитник небоязненный, священномучениче Петре. Жестокая заточения и дальная изгнания, страдания и смерть от богоборцев претерпел еси. Венец мученический прияв, на Небеси ныне радуешися. Моли милостиваго Бога, да сохранит Церковь нашу от нестроений, единомыслие и мир людем Своим дарует и спасет души наша.

Тропарь святителю Петру, митрополиту Московскому

Тропарь, глас 4:
Яже прежде безплодная, земле, ныне веселися: се бо Христос светильника в тебе показа, яве сияюща в мире и исцелевающа недуги и болезни наша. Сего ради ликуй и веселися со дерзновением: святитель бо есть Вышняго, сия соделоваяй.

Тропарь, глас 4 (Перенесение мощей):
Наста днесь всечестный праздник пренесения честных мощей твоих, святителю Петре, веселя изрядно твое стадо, и вернаго императора, и люди, о нихже не оскудевай моляся Христу Богу: от Него дарованней ти пастве сохранитися от враг ненаветованней и спастися душам нашим.

Тропарь преподобному Петру, царевичу Ордынскому (Ростовскому)

Тропарь, глас 8:
Отечества своего, блаженне Петре, удалився, и богомерзкую веру отнюд возненавидев, от тьмы во свет пришел еси и вселился еси во славный и многонародный град Ростов, в немже житие честно пожив, церковь во имя святых апостол Петра и Павла воздвигл еси Христовою благодатию, и сию чудными иконами, яко невесту, украсив, святителя же, и князя, и вся люди житием своим удивил еси, темже и по смерти твоей Христос даром чудес обогати тя. Поминай нас, чтущих пресветлую память твою, преподобне отче Петре, и моли Христа Бога спастися душам нашим.

Тропарь преподобному Петру Афонскому

Тропарь, глас 4:
Мир оставил еси, Петре, Господа ради своего и крест восприим на рамо свое, на гору достигли еси Афонскую, якоже древле фесвитянин Илия. И в ней пребыв пощением, и молитвами, и бдением, Бога милостива творя, и Пречистую Богородицу Молебницу предлагая, сего ради вопием ти: моли Христа Бога, да спасет души наша.

Кондак, глас 2:
Удалив себе человеческаго сожительства, в пещерах каменных и разселинах пожил еси, желанием Божественным и любовию, Петре, Господа твоего, от Него же венец приял еси. Моли непрестанно спастися нам.

Тропарь преподобному Пимену Великому

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Пимене, отче наш, моли Христа Бога спастися душам нашим.

Тропарь преподобному Пимену, постнику Печерскому, в Дальних пещерах

Тропарь, глас 8:
Постом душу твою просветил еси, молитвами непрестанными сердце твое сосуд Духа Святаго соделал еси, преподобне отче наш Пимене; темже вся вражия ополчения крепко посрамил еси и, яко победоносец истинный воздаяние получил еси от Христа Бога. Тому помолися о душах наших.

Тропарь преподобному Пимену Многоболезненному, Печерскому в Ближних пещерах почивающему

Тропарь, глас 5:
Богоноснаго Антония смиренномудрием подражая, терпением Иову подобяся, не исцеления от болезни, но паче протяжения тоя желал еси себе, терпеливодушне Пимене, да не како, здрав быв и от места сего родительми исторжен, сожития преподобных и чина их лишишися, тем паче надежды от самих Ангел пострижен был еси, с нимиже моли Христа Бога спастися душам нашим.

Кондак, глас 6:
Долговременную болезнь благодарне претерпевшего, приидите, сошедшеся, восхвалим Пимена многотерпеливаго, иже бо иногда за смрад в болезни бе гнушаем, сей нынe благоухания испущает с верою к раце мощей его приходящим и прогонит злосмрадие страстей от вопиющих: прииди, Пимене, к нам, и ничтоже успеет враг на ны.

Тропарь преподобному Пиору, затворнику Печерскому, в Дальних пещерах

Тропарь, глас 5:
Затворивыйся в месте темне, Богоблаженне Пиоре, и отнюд света сего и всяких прелестей в нем сущих зрети нехотевый, Света же днесь Невечерняго сподоблься, моли и нам Светом темже озаритися.

Тропарь святителю Питириму, епископу Великопермскому

Тропарь, глас 8:
Православия наставниче, благочестия учителю и милости сокровище, архиереев украшение, людей зырянских наставниче, святителю Питириме, душу свою за Христа положивый, моли Единаго Человеколюбца о пастве твоей и о всех любовию чтущих память твою.

Тропарь святителю Питириму Тамбовскому, чудотворцу

Тропарь, глас 4:
Веры и благочестия наставниче, церкве светильниче, монашествующих образ, святителю Питириме премудре, стадо твое благочестиво упасл еси и ко Христу привел еси: темже в вышних венцем славы украшен, с нами на земли духом пребываеши, сияя чудесы. Моли Христа Бога спастися душам нашим.

Тропарь Покрову Пресвятой Богородицы

Тропарь, глас 4:
Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим Покровом и избави нас от всякаго зла, молящи Сына Твоего, Христа Бога нашего, спасти души наша.

Величание:
Величаем Тя, Пресвятая Дево, и чтим Покров Твой честный, Тя бо виде святый Андрей на воздусе, за ны Христу молящуюся.

Тропарь преподобному Поликарпу Брянскому

Тропарь, глас 1:
Ветрилом креста душевный корабль окормив, житейская красная оставил еси, и от мирскаго мятежа изшед, плотския похоти воздержанием многим, отче, умертвил еси, пощением и слезами, молитвами и песньми непрестанно прилепляяся Богу: темже и жилище достойно Духа Пресвятаго показался еси. Моли, Поликарпе преподобне, Христа Бога оставление прегрешений даровати нам и велию милость.

Тропарь преподобному Поликарпу, архимандриту Печерскому, в Ближних пещерах

Тропарь, глас 4:
Тезоименит званию твоему, яко многоплодное древо, насажден сын во обители Божия Матере, многая и чудная тщанием твоим исправления показавый, мудре Поликарпе, моли Христа Бога о нас, яко да и мы, многия плоды добродетелей Ему принесше, спасемся.

Тропарь положению честного пояса Пресвятой Богородицы

Тропарь, глас 8:
Богородице Приснодево, человеков покрове, ризу и пояс пречистаго Твоего телесе, державное граду Твоему обложение даровала еси, безсеменным рождеством Твоим нетленна пребывающи, о Тебе бо и естество обновляется и время. Темже молим Тя мир граду Твоему даровати и душам нашим велию милость.

Тропарь положению честной ризы Пресвятой Богородицы во Влахерне

Тропарь, глас 8:
Богородице Приснодево, человеков покрове, ризу и пояс пречистаго Твоего телесе, державное граду Твоему обложение даровала еси, безсеменным рождеством Твоим нетленна пребывающи, о Тебе бо и естество обновляется и время. Темже молим Тя мир граду Твоему даровати и душам нашим велию милость.

Величание:
Величаем Тя, Пресвятая Дево, Богоизбранная Отроковице, и чтим святыя ризы Твоея честное положение.

Тропарь на положение честной ризы Господа нашего Иисуса Христа, в Москве

Тропарь, глас 4:
Днесь притецем, вернии, к Божественней и цельбоносней ризе Спасителя нашего Бога, благоизволившаго сию плотию носити и на Кресте святую Свою Кровь излияти, еюже искупи нас от работы вражия. Тем, благодаряще, вопием Ему: спаси отечество наше, и архиереев, и град, и вся люди, честною Твоею ризою защити и спаси души наша, яко Человеколюбец.

Величание:
Величаем Тя, Живодавче Христе, и почитаем вси Божественныя ризы Твоея честное положение.

Тропарь положению честной ризы Пресвятой Богородицы во Влахерне

Тропарь, глас 8:
Богородице Приснодево, человеков покрове, ризу и пояс пречистого Твоего телесе, державное граду Твоему обложение даровала еси, безсеменным рождеством Твоим нетленна пребывающи, о Тебе бо и естество обновляется и время. Темже молим Тя мир граду Твоему даровати и душам нашим велию милость.

Величание:
Величаем Тя, Пресвятая Дево, Богоизбранная Отроковице, и чтим святыя ризы Твоея честное положение.

Тропарь в день Похвалы Пресвятой Богородицы (Суббота Акафиста)

Тропарь, глас 4:
Дево Безневестная и Мати Всечистая, приемши от Архангела благовещение, со тщанием востекла еси в Горняя, и целовавши южику Твою, всечестную Елисаветь, Материю Господа от сия наречена была еси, и возвеличила возвеличившаго Тя Господа: Благословенна Ты в женах, и благословен Плод чрева Твоего.

Тропарь Пресвятой Богородице перед Ея иконой, именуемой «Почаевская»

Тропарь, глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети, и к Сыну Твоему молитву вознеси о спасении душ наших.

Величание:
Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Тропари и кондаки на праздники Господские, Богородичные и святых.

Вход Господень во Иерусалим

Тропарь, глас 1:
Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы, победы знамения носяще, Тебе победителю смерти вопием: осанна в вышних, благословен грядый во имя Господне.

Кондак, глас 1:
На престол на небеси, на жребяти на земли носимый, Христе Боже, Ангелов хваление и детей воспевание приял еси, зовущих Ти: благословен еси, грядый Адама воззвати.

Величание:
Величаем Тя, Живодавче Христе, Осанна в вышних и мы Тебе вопием Благословен Грядый во Имя Господне.

Пасха (Светлое Христово Воскресение)

Тропарь, глас 5:
Христос воскресе из мертвых, смертию смерть поправ, и сущим во гробех живот даровав.

Кондак, глас 8:
Аще и во гробе снизшел еси, Безсмертне, но адову разрушил еси силу, и воскресл еси, яко Победитель, Христе Боже, женам мироносицам вещавый: радуйтеся, и Твоим Апостолом мир даруяй, падшим подаяй воскресение.

Задостойник, глас 1:
Ангел вопияше Благодатней: Чистая Дево, радуйся, и паки реку: радуйся, Твой Сын воскресе тридневен от гроба, и мертвыя воздвигнувый, людие, веселитеся! Светися, светися, новый Иерусалиме; слава бо Господня на тебе возсия. Ликуй ныне, и веселися Сионе. Ты же Чистая, красуйся, Богородице, о востании Рождества Твоего.

Вознесение Господне

Тропарь, глас 4:
Вознеслся еси во славе, Христе Боже наш, радость сотворивый учеником обетованием Святого Духа, извещенным им бывшим благословением, яко Ты еси Сын Божий, Избавитель мира.

Кондак, глас 6:
Еже о нас исполнив смотрение, и яже на земли соединив небесным, вознеслся во славе, Христе Боже наш, никакоже, отлучался, но пребывая неотступный, и вопия любящим Тя: Аз есмь с вами и никтоже на вы.

Величание:
Величаем Тя, Живодавче Христе, и почитаем Еже на небеса, с Пречистою Твоею плотию, Божественное Вознесение.

Святая Пятидесятница

Тропарь, глас 8:
Благословен еси, Христе Боже наш, Иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.

Кондак, глас 8:
Егда снизшед языки слия, разделяше языки Вышний; егда же огненныя языки раздаяше, в соединение вся призва; и согласно славим всесвятаго Духа.

Величание:
Величаем Тя, Живодавче Христе и чтем Всесвятаго Духа Твоего, Егоже от Отца, послал еси божественным учеником Твоим.

Рождество Пресвятыя Богородицы 8 Сентября.

Тропарь, глас 4 (Предпразднеству):
От корене Иессеева и от чресл Давидовых, Богоотроковица Мариам раждается днесь нам: радостию бо радуются всяческая и обновляются. Срадуйтеся купно, небо и земля, восхвалите Ю отечествия языков. Иоаким веселится и Анна торжествует, зовущи: неплоды раждает Богородицу, и Питательницу Жизни нашея.

Тропарь, глас 4:
Рождество Твое, Богородице Дево, радость возвести всей вселенней: из Тебе бо возсия Солнце правды Христос Бог наш и разрушив клятву, даде благословение, и упразднив смерть, дарова нам живот вечный.

Кондак, глас 4:
Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем; то празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.

Величание:
Величаем Тя, Пресвятая Дево, и чтем святых Твоих родителей, и всеславное славим Рождество Твое.

Введение во храм Пресвятой Богородицы 21 Ноября.

Тропарь, глас 4 (Предпразднеству):
Радость предобручает всем Анна ныне, печали сопротивный плод прозябши, едину Приснодеву, Юже и приводит, молитвы исполняющи, днесь веселящися, в храм Господень, яко сущий храм Бога Слова и Матерь чистую.

Тропарь, глас 4:
Днесь благоволения Божия предображение и человеков спасения проповедание, в храм Божий ясно Дева является и Христа всем предвозвещает. Той и мы велегласно возопиим: радуйся, смотрения Зиждителева исполнение.

Кондак, глас 4:
Пречистый храм Спасов, многоценный чертог и Дева, священное сокровище славы Божия, днесь вводится в дом Господень благодать совводящи, яже в Дусе Божественном, Юже воспевают Ангели Божии: Сия есть селение небесное.

Величание:
Величаем Тя, Пресвятая Дево, Богоизбранная Отроковице, и чтем еже в храм Господень вхождение Твое.

Воздвижение Честнаго и Животворящаго Креста 14 Сентября.

Тропарь, глас 4 (Предпразднеству):
Животворящий Крест Твоея благости, Егоже даровал еси нам недостойным Господи, Тебе приносим в молитву, спаси люди и град Твой молящийся, Богородицею, Едине Человеколюбче.

Тропарь, глас 1:
Спаси, Господи, люди Твоя и благослови достояние Твое, победы православным христианом на сопротивныя даруя, и Твое сохраняя крестом Твоим жительство.

Кондак, глас 4:
Вознесыйся на Крест волею, тезоименитому Твоему новому жительству, щедроты Твоя даруй, Христе Боже, возвесели силою Твоею верные люди Твоя, победы дая им на супостаты, пособие имущым Твое оружие мира, непобедимую победу.

Величание:
Величаем Тя, Живодавче Христе, и чтем Крест Твой Святый, имже нас спасл еси от работы вражия.

Рождество Христово 25 Декабря.

Тропарь, глас 4 (Предпразднеству):
Готовися, Вифлееме, отверзися всем, Едеме, красуйся, Евфрафо, яко древо живота в вертепе процвете от Девы: рай бо Оноя чрево явися мысленный, в немже Божественный сад, от негоже ядше, живи будем, не якоже Адам умрем. Христос раждается прежде падший возставити образ.

Тропарь, глас 4 (Предпразднеству, навечерие):
Написовашеся иногда со старцем Иосифом, яко от семене Давидова, в Вифлееме Мариам, чревоносящи безсеменное Рождение. Наста же время рождества, и место ни единоже бе обиталищу, но, якоже красная палата, вертеп Царице показашеся. Христос раждается прежде падший воскресити образ.

Тропарь, глас 4:
Рождество Твое, Христе Боже наш, возсия мирови свет разума, в нем бо звездам служащии звездой учахуся Тебе кланятися Солнцу правды и Тебе ведети с высоты Востока, Господи, слава Тебе!

Кондак, глас 3:
Дева днесь Пресущественнаго рождает, и земля вертеп Неприступному приносит; Ангели с пастырьми славословят, волсви же со звездою путешествуют: нас бо ради родися Отроча младо, превечный Бог.

Величание:
Величаем Тя, Жизнодавче Христе, нас ради ныне плотию рождшагося от Безневестныя и Пречистыя Девы Марии.

Крещение Господне 6 Января.

Тропарь, глас 4 (Предпразднеству):
Готовися, Завулоне, и красуйся, Неффалиме, Иордане реко, стани, подыми, взыграя, креститися грядуща Владыку. Веселися, Адаме с праматерию, не крыйта себе, якоже в рай прежде, ибо, наги видев вы, явися, да облечет в первую одежду: Христос явися, всю тварь хотя обновити.

Тропарь, глас 4 (Предпразднеству, навечерие):
Возвращашеся иногда Иордан река милотию Елиссеевою, вознесшуся Илии, и разделяхуся воды сюду и сюду и бысть ему сух путь, иже мокрый, во образ воистинну Крещения, имже мы текущее жития преходим шествие: Христос явися во Иордане освятити воды.

Тропарь, глас 1:
Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя: и Дух в виде голубине извествоваше словесе утверждение: явлейся, Христе Боже, и мир просвещай, слава Тебе.

Кондак, глас 4:
Явился еси днесь вселенней, и свет Твой, Господи знаменася на нас, в разуме поющих Тя: пришел еси и явился еси, Свет неприступный.

Величание:
Величаем Тя, Жизнодавче Христе, нас ради ныне плотию крестившагося от Иоанна в водах Иорданских.

Сретение Господне 2 Февраля.

Тропарь, глас 1 (Предпразднеству):
Небесный лик Небесных Ангел, приник на землю, пришедше зрит яко Младенца, носима к храму, Перворожденна всея твари от Матере Неискусомужныя, предпразднственную убо с нами поют песнь, радующеся.

Тропарь, глас 1:
Радуйся Благодатная Богородице Дево, из Тебе бо возсия Солнце правды Христос Бог наш, просвещаяй сущия во тьме: веселися и ты, старче праведный, приемый во объятия Свободителя душ наших, дарующаго нам воскресение.

Кондак, глас 4:
Утробу Девичу освятивый рождеством Твоим, и руце Симеоне благословивый, якоже подобаше, предварив, н ныне спасл еси нас, Христе Боже; но умири во бранех жительство, и укрепи православныя христианы, их же возлюбил еси, едине Человеколюбче.

Величание:
Величаем Тя, Жизнодавче Христе, и чтем Пречистую Матерь Твою, Еюже по закону ныне принеслся еси в храм.

Благовещение Пресвятыя Богородицы 25 Марта.

Тропарь, глас 4 (Предпразднеству):
Днесь всемирныя радости начатки предпразднственное воспети повелевают: се бо Гавриил приходит, Деве нося благовестие, и к Ней вопиет: радуйся, Благодатная, Господь с Тобою.

Тропарь, глас 4:
Днесь спасения нашего главизна, и еже от века таинства явление: Сын Божий Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою!

Кондак, глас 8:
Взбранней Воеводе победительная, яко избавльшеся от злых, благодарственная восписуем Ти раби Твои, Богородице: но яко имущая державу непобедимую, от всяких нас бед свободи, да зовем Ти: Радуйся Невесто Неневестная.

Величание:
Архангельский глас вопием Ти, Чистая: радуйся, Благодатная, Господь с Тобою.

Преображение Господне 6 Августа.

Тропарь, глас 4 (Предпразднству):
Христово преображение предусрящем, светло торжествующе предпразднственная, вернии, и возопиим: приспе день Божественнаго веселия: восходит на гору Фаворскую Владыка, Божества Своего облистати красоту.

Тропарь, глас 7:
Преобразился еси на горе, Христе Боже, показавый учеником Твоим славу Твою, якоже можаху; да возсияет и нам грешным свет Твой присносущный, молитвами, Богородицы, Светодавче, слава Тебе.

Кондак, глас 7:
На горе преобразился еси, и якоже вмещаху ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мирове же проповедят яко Ты еси воистину Отчее сияние.

Величание:
Величаем Тя, Жизнодавче Христе, и почитаем пречистыя плоти Твоея преславное преображение.

Успение Пресвятыя Богородицы 15 Августа.

Тропарь, глас 4 (Предпразднеству):
Людие, предыграйте, руками плещуще верно, и любовию соберитеся, днесь радующеся и светло восклицающе вси веселием: Божия бо Мати имать от земных к Вышним прейти славно, Юже песньми присно яко Богородицу славим.

Тропарь, глас 1:
В рождестве девство сохранила еси, во успении мира не оставила еси, Богородице, преставилася еси к Животу, Мати сущи Живота, и молитвами Твоими избавляеши от смерти душы наша.

Кондак, глас 2:
В молитвах неусыпающую Богородицу, и в предстательствах непреложное упование, гроб и умерщвление не удержаста: якоже бо Живота Матерь, к Животу престави во утробу вселивыйся приснодевственную.

Величание:
Величаем Тя, Пренепорочная Мати Христа Бога нашего, и всеславное славим Успение Твое.

В Неделю Православия

Тропарь, глас 2:
Пречистому Твоему образу покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал, еси, от работы вражия. Тем же благодарственно вопием Ти: радости исполнил еси вся, Спасе наш, пришедый спасти мир.

Покров Пресвятыя Богородицы 1 Октября.

Тропарь, глас 4:
Днесь благовернии людие светло празднуем, осеняеми Твоим, Богомати, пришествием, и к Твоему взирающе Пречистому образу, умильно глаголем; покрый нас честным Твоим покровом, и избави нас от всякаго зла, молящи Сына Твоего Христа Бога нашего, спасти души наша.

Кондак, глас 3:
Дева днесь предстоит в церкви и лики святых невидимо за ны молится Богу, Ангелы со архиереи покланяются, апостоли же со пророки ликовствуют: нас бо ради молит Богородица Превечного Бога.

Величание:
Величаем Тя, Пресвятая Дево, и чтем Покров Твой честный: Тя бо святый Андрей виде на воздусе, за ны Христу молящуюся.

Тропарь Праотцам

Тропарь, глас 2:
Верою праотцы оправдал еси, от язык теми предобручивый Церковь: хвалятся в славе святии, яко от Семене их есть Плод благославен, без семене Рождшая Тя. Тех молитвами, Христе Боже, помилуй нас.

Тропарь на Преполовение Пятидесятницы

Тропарь, глас 8:
Преполовившуся празднику, жаждущую душу мою благочестия напой водами, яко всем, Спасе, возопил еси: жаждай да грядет ко Мне и да пиет. Источниче жизни наше: Христе Боже, слава Тебе.

Кондак, глас 4:
Празднику законному преполовляющуся, всех Творче и Владыко, к предстоящим глаголал еси, Христе Боже: приидите и почерпите воду безсмертия. Темже Тебе припадаем, и верно вопием: щедроты Твоя даруй нам, Ты бо еси Источник жизни нашея.

Тропарь Пресвятой Богородице

Тропарь, глас 4:
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши: потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6:
Предстательство христиан непостыдное ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление. предстательствующи присно, Богородице, чтущих Тя.

Ин кондак, глас 8:
Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная. Преславная Приснодево, Мати Христа Бога принеси нашу молитву Сыну Твоему и Богу нашему, да спасет Тобою души наша. Все упование мое на Тя возлагаю, Мати Божия, сохрани мя под кровом Твоим. Богородице Дево, не презри мене грешнаго, требующа Твоея помощи и Твоего заступления, на Тя бо упова душа моя, и помилуй мя.

Припевы:
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству. Призри благосердием, Всепетая Богородице, на мое лютое телесе озлобление, и исцели души моея болезнь.

Величание:
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Тропарь при нападении врагов

Тропарь, глас 4:
Скоро предвари, прежде даже не поработимся врагом, хулящим Тя и претящим нам, Христе Боже наш, погуби Крестом Твоим борющия нас, да разумеют, како может православных вера, молитвами Богородицы, Едине Человеколюбче.

Тропарь Пресвятой Богородице перед Ея иконой, именуемой «Прибавление ума»

Тропарь, глас 4:
О Преславная мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.

Кондак, глас 2:
Яко Единицы умом нас просвещающую, хвалим Тя, Пречистая, Мати Разума, всю вселенную держащаго, Красото мира видимаго и невидимаго, лучами жизни нас озаряющая.

Тропарь Пресвятой Богородице перед Ея иконой, именуемой «Призри на смирение»

Тропарь, глас 4:
Необоримая стена образ Твой и источник чудес, якоже древле от Него заступление Твое граду Пскову даровала еси, тако и ныне нас от всех бед и скорбей милостивно избави и спаси души наша, яко любвеобильная Мати.

Кондак, глас 3:
Пренепорочная Дево, отображение лика Твоего чтущия благодарныя дары приемлеши, живым и мертвым помогаеши, град и страну нашу спасаеши, и пред Сына твоего молитвы приносиши, и спасаеши всех нас.

Величание:
Величаем Тя, Пресвятая Дево, Богоизбранная Отроковице, и чтим святыя иконы Твоея чудесное отображение.

Тропарь мученикам Прову, Тараху и Андронику

Тропарь, глас 5:
Святых мученик исправлением Небесныя силы преудивишася, яко в теле смертнем, безтелеснаго врага силою Креста, подвизавшеся добре, победиша невидимо. И молятся Господу помиловатися душам нашим.

Тропарь блаженному Прокопию, Христа ради юродивому, Вятскому

Тропарь, глас 4:
Иже на земли Христа ради волею в буйство преложися, и мира сего красоты отнюд возненавиде, и плотская играния увядив постом и жаждою и на земли леганием, от зимы студению и мразом, и от зноя солнечнаго и дождя и прочия тяготы никогда же уклонися под кров, и на теле своем не имея одеяния, Божиею помощию покрываема, и душу очистил еси добродетельми своими, яко злато в горниле, Прокопие премудре, с верою творящим память твою честно и усердно притекающим к мощем твоим, прославляюще твое святое успение, Христу Богу молися, благоюроде, да избавит ны Господь от варварскаго нашествия и междоусобныя брани и мир мирови дарует и душам нашим велию милость.

Тропарь преподобному Прокопию Декаполиту, исповеднику

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Прокопие отче наш. Моли Христа Бога спастися душам нашим.

Тропарь праведному Прокопию Устьянскому

Тропарь, глас 1:
Божественною благодатию просветився, и по смерти даруеши исцеления притекающим к тебе, премудре Прокопие, темже и мы ныне чтим честных мощей твоих явление, веселящее вкупе души и телеса. Тем вси вопием: слава Давшему ти крепость, слава Венчавшему тя, слава Действующему тобою всем исцеления.

Тропарь блаженному Прокопию, Христа ради юродивому, Устюжскому чудотворцу

Тропарь, глас 4:
В терпении твоем от Бога мзду дарований пророчества приял еси, блаженне, молитвами, бдением и пощением тело свое изнурив, душу же возвысив на Небесная, Царя всех Христи Бога славы зрети сподобися и неувядаемым венцем увязеся. Емуже с лики святых предстоя, за люди своя моление предлагая, тепле пролия слез источник, избавил еси град Великий Устюг и люди своя от труса страшнаго, и огня, и напрасныя смерти. Темже и мы, к честней раце твоей припадающе, вопием ти: о Прокопие чудоносне, ходатай нам буди ко Господу во дни нашедших печалей, рабом твоим, и молися, да спасет души наша.

Тропарь преподобному Прохору Печерскому, в Ближних пещерах

Тропарь, глас 4:
Преподобне и чудотворче, отче Прохоре, препитавый во гладе алчущия хлебом от былия и солию от пепела, напитай и нас пищею духовною, моля Христа Бога о душах наших.

Тропарь Пресвятой Богородице перед Ея иконой, именуемой «Псково-Покровская»

Тропарь, глас 4:
Днесь светло красуется Богоспасаемый град Псков и вся страна Российская пришествием Матери Бога Вышняго на избавление града сего от варварскаго пленения. Услыша плач и слезы раб Своих, скоро приклонися на мольбу к Сыну Своему и Богу нашему, и молением Своим гнев Божий укроти и весь мир просвети, и град сей от скорби на радость премени. О, дивному знамению, како Пресвятая Владычице прииде на воздусе и в церковь Свою и на забрало града Пскова и призва угодников своих, благоверных князей, и поноси в людех беззаконие. И Своею пречистою рукою указоваше на поганаго злаго варвара и его совет на разрушение. Возвеселися, Богоспасаемый граде Пскове и все Православие, имеюще такову Заступницу непобориму. Днесь притецем, вернии, в дом спасительный Владычицы Богородицы, светло празднуя, и ко святому Ея образу со слезами припадем, вопиюще и глаголюще: О Всемилостивая Госпоже Владычице Богородице, молися Сыну Своему Христу Богу нашему спасти православныя люди и град сей избавити от огненнаго запаления и от нахождения поганых и междоусобныя брани, и спасти души наша яко Милосердая.

Тропарь Пресвятой Богородице перед Ея иконой, именуемой Пюхтицкой («У источника»)

Тропарь:
Утешение всех скорбящих, Скорая Помощнице в туге сердечней к Тебе прибегающим, услыши нас, Владычице, и даждь нам на пути к жизни вечней душ и сердец от скверн очищение и яко елень на источники водныя к Царству Небесному неустанное стремление.

Кондак:
Пресвятая Богородице, Дево, утоли жажду спасения страждущия души моея у Источника вод живых — Божественнаго Слова, Сына Твоего, Христа Бога нашего, призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.

Величание:
Величаем Тя, Светозарная Дево, и почитаем осиявшее гору Пюхтицкую благодатное явление Твое.

Иные популярные молитвы:

Православные молитвы святых угодников и Божьей матери.
Православные молитвы святым угодникам. Святые угодники Божии
Православные молитвы святым угодникам в недугах. Православные молитвы нуждающимся в различных нуждах и немощах
Православные Святые угодники: житие, память, страдание
Молитвы вечерние читать ежедневно
Карта сайта Молитвы святых — prayerssaints.ru
Избранные тропари. Общие тропари Святым Угодникам
Молитвы и каноны по усопшим
О молитве: Для чего нужно молиться, Когда нужно молиться, Какие бывают молитвы
Заповеди Блаженства
Каноны и молитвы для подготовки к Таинствам Исповеди и Святого Причастия
Молитвы за отечество
Тропари Б-В. Тропарь Пресвятой Богородице. Тропарь святым преподобным угодникам
Молитвы при недостатке материнского молока
Молитвы о целомудрии и благополучном замужестве дочерей

Все молитвы ...



... Добавить в "Закладки" ... Ctrl+D


Для пожертвований:

Да хранит Вас Господь!

Православные информеры для сайтов и блогов