Молитвы святых угодников

Главная --> Молитвы --> Тропари

Тропари Л-Н.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. Л-Н.

Тропарь блаженному Лаврентию, Христа ради юродивому, Калужскому

Тропарь, глас 4:
Просветився божественною благодатию, Богомудре, и весь разум и сердце от суетнаго мира сего к Зиждителю неуклонно возложив, целомудрием и многим терпением во временней жизни течение добре скончал еси и веру соблюл еси непорочну. Темже и по смерти явися светлость жития твоего, источаеши бо чудесем источник неисчерпаемый верою притекающим ко святому твоему гробу, Лаврентие всеблаженне, моли Христа Бога, да спасет души наша.

Тропарь преподобному Лаврентию, затворнику Печерскому, в Дальних пещерах

Тропарь, глас 3:
Затворивый себе Господа ради в темней пещере, преподобне отче Лаврентие, многолетне и Оному добре в ней угодивый, подаждь и нам от всякаго зла чувствия затворити, и тьмы страстей отвратитися, и светлость получити Царствия Небеснаго.

Тропарь преподобному Лаврентию Черниговскому, чудотворцу

Тропарь, глас 4:
От юности Христа возлюбил еси, и Тому тесным путем последуя, сосуд избран Духа Святаго быв, дар чудотворения и прозрения восприим: сего ради в невечернем свете Пресвятыя Троицы присно радуяся, поминай чад твоих, Лаврентие преподобне, отче наш.

Ин тропарь, глас 8:
Днесь светло красуется град Чернигов, и торжествует обитель Пресвятыя Троицы, в ней бо молитвою и постом пребывая, иночествующим и верным людям велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша.

Кондак, глас 4:
Мир оставив, чистоту ангельскую стяжав и мирови любовию послужив, отче наш Лаврентие, помощь благодатную с верою приходящим обильно являя: темже и в премирная селения достойно вселився, телом нетленным с нами пребываеши, утверждая нас в православной вере отцев наших, душею светозарною Подателю мира молишися даровати нам мир и велию милость.

Ин кондак, глас 4:
Возсиял еси, яко светильник лучезарный услыша глас Царицы Небесныя, и последовав невозвратно зову Ея. Пришел в обитель Пресвятыя Троицы, идеже Владычицы Богородицы чудотворная икона, целомудренно собрав стадо словесных овец. Не забуди и нас, последовавших ти, и да избавит Господь геенны вечныя, совершающих святую память твою, преподобне отче наш Лаврентие.

Тропарь мученику Лаврентию Римскому

Тропарь, глас 4:
Мученик Твой, Господи, Лаврентие во страдании своем венец прият нетленный от Тебе, Бога нашего, имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Тропарь святителю Лаврентию, епископу Туровскому

Тропарь, глас 8:
Всеблаженне Лаврентие, затворивый себе Господа ради в месте тесне и в нем многа лета трудолюбне поживый, молися о нас ко Господу, яко да и мы от всякаго греха чувства затворше, получим отверзение дверей милости Господни в День судный.

Кондак, глас 6:
Усердие Лавре Печерстей желая от чудес прославления, себе же самаго смиряя, отреклся еси онаго, бедне диаволом мучима, исцелити, отслав его ко пещере, идеже он исцелившися, блаженне Лаврентие, прослави с тобою Господа, прославляющаго святых своих.

Тропарь на воскрешение праведного Лазаря

Тропарь, глас 1:
Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы победы знамения носяще, Тебе победителю смерти вопием: осанна в вышних, благословен Грядый во имя Господне.

Тропарь благоверному князю Лазарю Сербскому

Тропарь, глас 3:
Красоту возжелев славы Божия, в земней Тому благоугодил еси и, порученный ти талант добре возделав, усугубил еси, о немже и подвизався до крове. Отонудуже и мзду болезней твоих, яко мученик, приял еси от Христа Бога: Егоже моли спастися поющим тя, Лазаре.

Тропарь праведному Лазарю Четверодневному, епископу Китийскому

Тропарь, глас 4:
Яко велико сокровище и богатство некрадомо к нам прииде из Кипра, Лазаре, Промыслом всех Бога, повелением царя благочестива, подая чтущим тя исцеления даром, избавляя от бед и от всякаго вреда, верою взывающих ти: спаси всех молитвами своими, Лазаре отче наш.

Тропарь святителю Льву, папе Римскому

Тропарь, глас 8:
Православия наставниче, благочестия учителю и чистоты, вселенныя светильниче, архиереев Богодухновенное удобрение, Льве премудре, ученьми твоими вся просветил еси, цевнице духовная. Моли Христа Бога спастися душам нашим.

Тропарь мученику Леониду и иже с ним

Мученик Твой, Господи, Леониде во страдании своем венец прият нетленный от Тебе Бога нашего: имеяй бо Крепость Твою, мучителей низложи, сокруши и демонов немощныя дерзости. Того молитвами спаси души наша.

Тропарь преподобному Леониду Устьнедумскому

Тропарь, глас 1:
Божественною любовию и житием духовным от юности распалився, преподобне, и вся, яже в мире красная, возненавидев, Христа единаго от души возлюбил еси, отче, легкое иго на рамо взем, Божественным Промыслом и Пречистыя Богородицы чудным явлением направляемь, достиже пустыни и в ней многолетне подвизался еси в трудех многих и слезах, всяким злостраданием плоть свою изнуряя. Отонудуже Бог, твоя труды видев, умножи тебе чада в пустыни. Но яко имея дерзновение к Богу, моли о нас, рабех твоих, отче преподобне Леониде, да избавит нас от всех навет вражиих и спасет души наша.

Тропарь, глас 8:
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Леониде, дух твой.

Тропарь мученице Леонилле

Агница Твоя, Иисусе, Леонилло зовет велиим гласом: Тебе, Женише мой люблю, и Тебе ищущи страдальчествую, и сраспинаюся, и спогребаются крещению Твоему и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе. Тоя молитвами, яко милостиво, спаси души наша.

Тропарь преподобному Леонтию, канонарху Печерскому, в Дальних пещерах

Тропарь, глас 3:
Всечестный канонарше Леонтие, правилоначальный бывый в церкви и в правиле иночестем возсиявший светло, моли Христа Бога, да прегрешений оставление подаст душам нашим.

Тропарь святителю Леонтию, епископу Ростовскому

Тропарь, глас 4:
Апостолом сопричастник и к Богу молебник верен, добродетельми возшед на Небесная, и любовь возложил еси к Любящему тя, и неверныя люди обратил еси в веру. Тем ныне, со Ангелы ликуя, предстоиши престолу славы всех, Царя Христа Бога: молися, святителю Леонтие, да спасет души наша.

Тропарь преподобному Лонгину Коряжемскому

Тропарь, глас 1:
От мятежа мирскаго удалився, к немерцающему Свету притекл еси, преподобне отче Лонгине, и ныне чисте зриши Святую Троицу, Юже моли за ны недостойныя, да спасет души наша.

Тропарь преподобному Лонгину, вратарю Печерскому, в Дальних пещерах

Тропарь, глас 1:
Преподобне и Богоблаженне отче Лонгине, врат монастырских опасный хранителю, опаснейший же и неусыпный своих чувствий от всякаго мирскаго суетствия затворителю, моли нарекшаго Себе дверь Господа Славы, да отверзет нам дверь милости Своея.

Кондак, глас 8:
Вратом земным приседя и оным с послушания внешнима очима наблюдая, Небесная врата присно умными своима очима наблюдал еси, преподобне Лонгине, в няже уже вшед и тамошния красоты сподобився, молися Господеви, да и мы получим вход Царствия Небеснаго.

Тропарь преподобному Лонгину Яренгскому

Тропарь, глас 1:
Свыше Божественною благодатию просветився Богомудре, многим терпением во временней жизни течение совершил еси, темже и по успении источаеши чудесем благодать, иже с верою приходящим к тебе, Лонгине всеблаженне. Слава Давшему ти крепость, слава Прославльшему тя в чудесех, слава Действующему тобою всем исцеление.

Тропарь мученику Лонгину Сотнику

Тропарь, глас 4:
Мученик Твой, Господи, Лонгине, во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости, Того молитвами спаси души наша.

Кондак, глас 4:
Весело возрадовася Церковь в памяти днесь приснопомятнаго страдальца Лонгина, взывающи: Ты моя держава, Христе, и утверждение.

Тропарь святителю Луке (Воино-Ясенецкому), архиепископу Крымскому, исповеднику

Тропарь, глас 1:
Возвестителю пути спасительного, исповедниче и архипастырю Крымския земли, истинный хранителю отеческих преданий, столпе непоколебимый, Православия наставниче, врачу богомудрый, святителю Луко, Христа Спаса непрестанно моли веру непоколебиму православным даровати и спасение, и велию милость.

Тропарь апостолу и евангелисту Луке

Тропарь, глас 5:
Апостольских деяний сказателя и Евангелия Христова светла описателя, Луку препетаго, славна суща Христове Церкви, песньми священными святаго апостола похвалим, яко врача суща, человеческие немощи, естества недуги и язи душ исцеляюща и молящася непрестанно за души наша.

Кондак, глас 2:
Истиннаго благочестия проповедника и тайн неизреченных ритора, звезду церковную, Луку Божественнаго восхвалим: Слово бо его избра, с Павлом мудрым языков учителя, Един ведый сердечная.

Тропарь Апостолу, глас 3:
Апостоле святый Луко, моли милостиваго Бога, да прегрешений оставление подаст душам нашим.

Кондак Апостолу, глас 4:
Яко звезду пресветлую Церковь всегда стяжа тя, апостоле Луко, чудес твоих многоподаванием просвещаема. Тем же зовем Христу: спаси чтущих верою память Твоего апостола, Многомилостиве.

Тропарь священномученику Лукиану Печерскому, в Дальних пещерах

Тропарь, глас 4:
И нравом причастник, и престолом наместник апостолом быв, деяние обрел еси, Богодухновенне, в видения восход. Сего ради, Слово Истины исправляя, и веры ради пострадал еси даже до крове, священномучениче Лукиане, моли Христа Бога спастися душам нашим.

Кондак, глас 4:
Во священстве и иночестве благочестно пожив и мучения путь прошед, мучителя и бесовское полчище посрамил еси, темже, почитающе тя, тако вопием ти: от бед избави ны присно твоими мольбами, отче наш Лукиане.

Тропарь Пресвятой Богородице перед Ея иконой, именуемой «Любечская»

Тропарь, глас 4:
Преблагословенная Царице, Пречистая Дево Богородице, прославльшая град Любеч угодника Твоего преподобнаго Антония Печерскаго рождением и чудотворныя иконы Твоея явлением, молим Тя, Всеблагая: моли за ны рождшагося от Тебе Царя, Христа Бога нашего, и Матерним Твоим к Нему предстательством избави нас от всякаго зла, недуги наша исцели, печали наша утоли и наследники яви нас Царствия Небеснаго, яко Милосердна.

Тропарь блаженной Любови Рязанской

Тропарь, глас 5:
Любовью наречена была еси во святом крещении. Любовь Христову познала еси, в житии Богу и человеком любовию послуживши, дерзновение велие стяжала еси, тем же к Тебе усердно прибегаем, из глубины сердец наших взывающи: молися убо ко Господу, Любовь Блаженная, богомудрая даровати мирови мир и душам нашим велию милость.

Тропарь мученице Людмиле, княгине Чешской

Тропарь, глас 4:
Оставльша тьму идолослужения и с горячей любовию прияв свет Православныя веры Христовы, явися ты, святая Людмило, яко звезда утренняя, и светом святости твоея истинный день Богопочитания в Честей земли начав.

Тропарь преподобному Макарию Александрийскому

Тропарь, глас 8:
В тебе, отче, известно спасеся еже по образу приим бо крест последовал еси Христу, и дея учил еси презирати убо плоть, приходит бо: прилежати же о души, вещи безсмертней: тем же и со Ангелы срадуется, преподобне Макарие, дух твой.

Кондак, глас 2:
Чистотою душевною Божественно вооружився, и непристанныя молитвы яко копие вручив крепко, пробол еси бесовская ополчения Макарие, моли непрестанно о всех нас.

Величание:
Ублажаем тя, преподобне отче Макарие, и чтем святую память твою, наставниче монахов и собеседниче Ангелов.

Тропарь преподобному Макарию Великому, Египетскому

Тропарь, глас 1:
Пустынный житель, и во плоти Ангел, и чудотворец явился еси, Богоносне отче наш Макарие, постом, бдением, молитвою Небесная дарования приим, исцеляеши недужныя и души верою приходящих ти. Слава Давшему ти крепость, слава Венчавшему тя, слава Действующему тобою всем исцеления.

Тропарь преподобному Макарию Жабынскому, Белевскому, чудотворцу

Тропарь, глас 4:
От мирскаго жития изшед в тихое пристанище жизни иноческия, преподобне Макарие, вшел еси, в нейже добре подвизався, душу твою добродетельми превысокими обогатил еси, и явился еси добр пастырь и учитель иноческому собору, емуже и обитель возградил еси, таже в безмолвие вшед и Боговидения сподобився, ко Господу преставился еси, Иже даром чудес тя обогати. Егоже ныне моли, да спасет верою и любовию почитающих святую память твою.

Тропарь преподобному Макарию, игумену Калязинскому, чудотворцу

Тропарь, глас 8:
Плотская мудрования, отче Макарие, воздержанием и бдением умертвил еси, место бо, на немже поты твоя излиял еси, яко труба, вопиет к Богу, поведающи твоя исправления, и по смерти честныя твоя мощи источают исцеления. Темже вопием ти: моли Христа Бога, да спасет души наша.

Тропарь преподобномученику Макарию Каневскому, архимандриту Овручскому, Переяславскому чудотворцу

Тропарь, глас 4:
Христу, нас ради с Небес сошедшему, последовал еси в подвизех твоих, Макарие, отче наш. Егоже моли о нас, ублажающих тя, прощение прегрешений даровати нам, любовию же и смирением сердца наша озарити и спасти души наша.

Тропарь, глас 8 (Перенесение мощей):
Ко всечестней раце многоцелебных мощей твоих, преподобномучениче Макарие, мы, грешнии, со умилением притекающе, дар исцеления приемлем: ты бо присно источаеши болящим здравие, печальным утешение и всех чтущих тя всякое исполняеши требование, молящеся Христу Богу спастися душам нашим.

Тропарь священномученику Макарию, митрополиту Киевскому

Тропарь, глас 8:
Божественныя Бескровныя совершая Жертвы, кровь твою, от безбожных агарян излиянную, в жертву непорочную принесл еси Владыце твоему, Пастыреначальнику Христу. Егоже моли, молим тя, пролити гнев на языки, хотящия браней; христолюбивое воинство наше на враги укрепи и стадо твое от всяких бед неврежденно соблюди, тебе бо крепкаго заступника почитаем, новый священномучениче российский, святителю блаженный Макарие.

Тропарь святителю Макарию, митрополиту Московскому и Всея Руси

Тропарь, глас 4:
Яко великим пастырем единонравна, и учителем вселенныя единомысленна, Божии Премудрости служителя изрядна, иже блаженству тезоимениту днесь вернии вси воспоим: Христа Бога моли, святителю Макарие, умирити мир и спасти души наша.

Кондак, глас 3:
Богомудрым учением и книжным списанием потщался еси, святителю Макарие, люди Российския просветити, и святых земли нашея прославити. Сего ради чуден пронаречеся, преемниче первопрестольников Российских. Моли сохранитися нам в вере и благочестии невредимо.

Тропарь преподобному Макарию Оредежскому, Новгородскому

Тропарь, глас 8:
Слез твоих теченьми пустыни безплодное возделал еси, и яже из глубины воздыханьми во сто трудов уплодоносил еси, и был еси светильник вселенней, сияя чудесы, Макарие, отче наш, моли Христа Бога спастися душам нашим.

Кондак, глас 2:
Чистотою душевною Божественно вооружився и непрестанныя молитвы, яко копие, вручив крепко, поборол еси бесовская ополчения, Макарие, отче наш, моли непрестанно о всех нас.

Тропарь преподобному Макарию, постнику Печерскому, в Ближних пещерах

Тропарь, глас 4:
Бывший нестяжателем Христа ради и Того за многия твоя добродетели в сердце твое вселивый, блаженне Макарие, молися о нас, поющих тя.

Тропарь преподобному Макарию, диакону Печерскому, в Дальних пещерах

Тропарь, глас 7:
От юности Христа усердне возлюбив, вдался еси Тому весь, яко непорочная жертва, и, иго Его благое на себе взем, работал в нем, всечестне Макарие, спешне, темже убо молим тя: молися о душах наших.

Тропарь преподобному Макарию Желтоводскому и Унженскому

Тропарь, глас 5:
Днесь град твой Галич тобою хвалится, в концех 6о его пресветло, яко велие солнце, возсиял еси и чудесы твоими, преподобне Макарие, вся озарил еси. И ныне молися Господеви избавитися душам нашим от прелести вражия и спастися граду твоему от поганскаго наития.

Ин тропарь, глас 4:
Богомудрый Желтоводския обители первоздателю, Богопоставленный монашескаго жития столпе, благописанный досточуднаго постничества образе, Богозданный Духа Святаго сосуде, златозарное Русския земли светило всесветлое, молим тя, отче Макарие, светозарною молитв твоих лучею разрешай мрачных страстей наших облак.

Тропарь Макарию, игумену Пинскому

Тропарь, глас 8:
Ко всечестней раце многоцелебных мощей твоих, преподобномучениче Макарие, мы, грешнии, со умилением притекающе, дар исцеления приемлем: ты бо присно исторгаеши болящим здравие, печальным утешение и всех чтущих тя всякое исполняеши требование, молящеся Христу Богу спастися душам нашим.

Тропарь преподобной Макрине

Тропарь, глас 2:
Жениха твоего смерть видевши, разсмотрела еси тленную жизнь и суетие мира, отвсюду вину приимши, Нетленному Обручнику уневестилася еси, постом и смирением любовь Того постигающи. Тем ныне радуется со Ангелы, преподобная Макрино, дух твой.

Тропарь преподобному Максиму Греку

Тропарь, глас 8:
Зарею Духа облистаем, витийствующих богомудренно сподобился еси разумения неведением омраченная сердца человеков светом благочестия просвещая, пресветел явился еси Православия светильник, Максиме преподобне, отонудуже ревности ради Всевидящаго, отечества чужд и странен, Российские страны был еси пресельник, страдания темниц и заточения от самодержавного претрепев, десницею Вышняго венчаешися и чудодействуеши преславная. И о нас ходатай буди непреложен, чтущих любовию святую память твою.

Кондак, глас 8:
Богодухновенным Писанием и Богословия проповеданием неверствующих суемудрие обличил еси, всебогате, паче же, в Православии исправляя, на стезю истинного познания наставил еси, якоже свирель Богогласная, услаждая слышащих разумы, непрестанно веселиши, Максиме досточудне, сего ради молим тя: моли Христа Бога грехов оставление низпослати верою поющим всесвятое твое успение, Максиме, отче наш.

Тропарь преподобному Максиму Исповеднику

Тропарь, глас 8:
Православия наставниче, благочестия учителю и чистоты, вселенныя светильниче, монашествующих богодухновенное удобрение, Максиме премудре, ученьми твоими вся просветил еси, цевнице духовная. Моли Христа Бога спастися душам нашим.

Тропарь блаженному Максиму, Христа ради юродивому, Московскому чудотворцу

Тропарь, глас 5:
Наготою телесною и терпением обнажил еси вражия коварствия, обличая неподобное его деяние, зельне стражда солнечный вар и нуждныя великия студени, мраза и огня не чул еси, Божиею помощию покрываемь, Максиме премудре, с верою творящих память твою честно и усердно притекающих к мощем твоим моли избавитися от бед и падения избежати.

Тропарь, глас 4 (Обретение мощей):
Терпением своим велию мзду на Небесех стяжал еси, в буйство волею Христа ради преложися и на Небо мысленное, яко на колеснице огненней, восшел еси, премудре Максиме. Днесь мы ныне чтим честных мощей твоих обретение вкупе с благочестивыми и верными людьми царствующаго града Москвы, да вси вопием ти: моли Христа Бога спастися душам нашим.

Тропарь святителю Максиму Новому, бывшему деспоту Сербскому

Тропарь, глас 3:
Странное рождение и воспитание был еси отче, но паки водворися во власти у своего народа, Небеснаго Царствия желая, земное царствие оставил еси и смирением Вышнее сокровище получил еси, преблаженне Максиме, моли, молимся, о душах наших.

Тропарь праведному Максиму, иерею Тотемскому

Тропарь, глас 4:
Непорочным священством Богови послужив, посреде мирскаго мятежа юродство избрал еси, взем бо крест, последовал еси Христу невозвратным помыслом и, с любовию к Нему добродетельми приближаяся, земная оставив, Небесная восприял еси, блаженне Максиме, отче наш, моли Христа Бога сохранитися граду Тотьме невредиму и спастися душам нашим.

Тропарь Пресвятой Богородице перед Ея иконой, именуемой «Максимовская»

Тропарь, глас 4:
Днесь светло красуется славнейший град Владимир, радостно совершая, Владычице, праздник явления Твоего святителю Максиму, в нем бывшаго, о немже ныне воспоминающе и молящеся Тебе, взываем сице: о Пречудная Владычице Богородице, молися Превечному Архиерею — Сыну Твоему, да непоколебиму утвердит Церковь Православную, град наш Владимир и всю Русскую землю в мире сохранит и спасет в правоверии души наша.

Величание:
Величаем Тя, Пресвятая Дево, и чтим образ Твой святый, егоже святитель Максим даде граду Владимиру в покров и всем верным во спасение.

Тропарь пророку Малахии

Кондак 1, глас 4:
Пророчества дарованием богатея, пророче, Христово предвозвестил еси пришествие яве и мирови спасение, Егоже сиянием мир просветися.

Кондак 2:
Яко Ангел послужил еси, всеблаженне, и сподобися пред будущая вещати, Господне бо вочеловечение всем уяснил еси, темже вопием ти:
радуйся, пророче Божий Малахие, приснопамятне.

Тропарь преподобному Мардарию, затворнику Печерскому, в Дальних пещерах

Тропарь, глас 4:
Бывый, блаженне Мардарие, нестяжатель Христа ради, и Того за многая твоя благодеяния в сердце твое вселивый, молися о нас, поющих тя.

Кондак, глас 2:
Вышних ища, нижних не стяжал еси, и колесницу огненну к Небеси, нестяжанне, себе поставль, со Ангели жити сподобился еси. Мардарие славне, с ними же Христа Бога моли непрестанно о всех нас.

Тропарь великомученице Марине

Тропарь, глас 4:
Агница Твоя, Иисусе, Марина зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но, яко жертву непорочную, приими мя, с любовию пожершуюся Тебе. Тоя молитвами, яко Милостив, спаси души наша.

Кондак, глас 3:
Марина днесь вражию главу сокрушает, победы венец с Небесе приемши. Егоже бо пророцы удержати не возмогоша, того она, связавши, уязви. Сего ради показася мучеником украшение, вкупе же и похвала.

Ин кондак, глас 3:
Девства добротами преиспещрена, дево, нетленными венцы венчалася еси, Марино, кровьми же мученичества обагрена, чудесы просветившися исцелений, благочестно, мученице, прияла еси почесть победы твоего страдания.

Тропарь преподобной Марии Египетской

Тропарь, глас 8:
В тебе, мати, известно спасеся еже по образу: приимши бо крест последовала еси Христу, и дающи учила еси презирати убо плоть, преходит бо: прилежати же о душе, вещи безсмертней: темже и со Ангелы срадуется, преподобная Марие, дух твой.

Кондак, глас 3:
Блудами первее преисполнена всяческими, Христова невеста днесь покаянием явися, ангельское жительство подражающи демоны Креста оружием погубляет. Сего ради Царствия невеста явилася еси, Марие преславная.

Тропарь Марии Магдалине, Мироносице

Тропарь, глас 1:
Христу, нас ради от Девы рождшемуся, честная Магдалино Марие, последовала еси, Того оправдания и законы хранящи: темже днесь всесвятую твою память празднующе, грехов разрешение молитвами твоими приемлем.

Величание:
Величаем тя, мироносице святая равноапостольная Марие Магдалино, и чтим болезни и труды твоя, имиже трудилася еси во благовестии Христове.

Тропарь к преподобной Марии Радонежской

Тропарь, глас 3:
Блаженств Христовых причастницы, честнаго супружества и попечения о чадах добрый образе, праведнии Кирилле и Марие, плод благочестия Сергия преподобнаго нам явивши, с ним же усердно молите Господа, низпослати нам дух любве и смиренномудрия, да в мире и единомыслии прославим Троицу единосущную.

Тропарь, глас 1:
Радуйся, преподобная мати Марие, вкупе с супругом твоим преподобным Кириллом, яко родила еси избранным сосуд Христа Бога нашего, Сергия преподобнаго, служителя Живоначальной Троицы, предстательствует бо к Ней о мире всего мира и спасении душ наших.

Кондак, глас 4:
Днесь, вернии, сошедшеся, восхвалим двоицу блаженную благовернаго Кирилла и Марию добронравную, тыя бо молятся вкупе с возлюбленным сыном своим преподобным Сергием ко единому во Святей Троице Богу отечество наше в правоверии утвердити, домы миром оградити, юныя от напастей и соблазнов избавити, старость укрепити и спасти души наша.

Кондак, глас 8:
Воспоим днесь преподобных Кирилла и Марию, прославльшихся в Российстей земли новых чудотворцев, тем же неоскудно потоцы людей православных притекают к раце ваших святых мощей, с верою и любовию взывая: молитеся о нас ко Пресвятой Троице с богоносным аввою Сергием мир стране нашей даровати и душам нашим велия милости.

Величание:
Ублажаем тя, преподобная мати Марие, и чтим святую память твою, наставнице инокиням и собеседнице ангелом.

Тропарь апостолу и евангелисту Марку

Тропарь:
Апостоле святый Марко, моли милостиваго Бога, да прегрешений оставление подаст душам нашим.

Величание:
Величаем тя, Апостоле Христов Марко, и чтем болезни и труды твоя, имиже трудился еси во благовестии Христове.

Тропарь святителю Марку, архиепископу Ефесскому

Тропарь, глас 8:
Православия наставниче, новшеств противоборниче, степень веры, Церкве светильниче, учителей Богодухновенная печате, Марко всемудре, писании твоими вся просветил еси, цевнице духовная, моли Христа Бога спастися душам нашим.

Тропарь преподобным Марку, Ионе и Корнилию Псково-Печерским

Тропарь, глас 8:
Яко светильницы, явистеся всесветлии в вертепе Царицы Богоматери, преподобнии отцы наши Марко, Ионо и Корнилие, вы бо, крест Христов на рамо вземше, усердно тому последовасте и, чистотою Богови приближившеся, отонудуже силами чудес обогатистеся, тем и мы любезно прибегаем к вам и умильно глаголем: о преподобнии, молите Христа Бога спастися душам нашим.

Кондак, глас 2:
Христовою любовию уязвившеся, преподобнии, и Того крест на рамо вземше, понесли есте Божественне, вооружившеся на невидимыя враги и непрестанныя молитвы, яко копие, в руках имуще крепко, победили есте бесовския ополчения, тем зовем вам: радуйтеся, преподобнии отцы наши Марко, Ионо и Корнилие, верных удобрение.

Тропарь мученикам Маркиану и Мартирию

Тропарь, глас 1:
Мученик двоица единонравная, Маркиан с Мартирием славным, Ариево нечестие разрушиша и Соприсносущна Сына Отцу и Духови веровати научиша, Павлу повинующеся истинных повелений учителю, темже мечем убиени, умроша; и присно со Христом живуще, о нас Того молят спасти души наша.

Тропарь преподобному Марону Сирийскому

Тропарь, глас 4:
Яко незаходимое солнце возсия нам днесь светозарными твоими молитвами, преподобне отче наш Мароне, иже некия горы достигл, и тамо на ней живущими нечестивыми чтом бысть, за превосходящую твою к Богу добродетель; и тамо обрет требище идольское, Богу освятив, в нем пребывал еси: и видев Человеколюбец Бог твой подвиг и труды, дарова тебе дар Свой, имже принесеся имя твое в человецех, целити скорби, огневицу и трясавицу прибегающим к тебе с верою. Темже и зовем: радуйся, целителю наш скорый, радуйся, заступниче наш теплый: предстоиши бо у Пресвятыя Троицы, молися Той о призывающих имя твое святое, да избавимся от сих тяжких скорбей и спасет души наша.

Тропарь святителю Мартину Исповеднику, папе Римскому

Тропарь, глас 4:
Истинных повелений устне распространил еси, зловерие низложил еси, Богомудре Мартине, святителю всечестне, поминай нас, угодниче Христов, еже к Нему ходатайствы твоими, да в мире устроиши живот наш.

Тропарь преподобному Мартину, затворнику Туровскому

Тропарь, глас 6:
Тяжким недугом страждущий и людьми забытый, молил еси жажду утолити, преподобне Мартине, темже Христос посла с Небесе благоверных Бориса и Глеба тебе послужити и недуг исцелити, молися ныне ко Господу спастися душам нашим.

Тропарь преподобному Мартиниану Белоезерскому

Тропарь, глас 2:
Богу от юности, отче, избравшу и возлюбившу тя и провидящу твое доброе произволение, наставляет тя приити к преподобному Своему угоднику — Кириллу всеблаженному, от негоже наставлен бысть на путь спасения, страхом Божиим, и чистотою душевною, и благоговением, и непрестанными к Богу молитвами во мнозе подвизе жизнь свою препроводил еси и заповеди Божия непорочно соблюл еси, пастырь и наставник иноком предивен был еси, и ныне Престолу Христову со дерзновением предстоиши на Небесех, со Ангелы светлоликовствуя, отче преподобне, Мартиниане всеблаженне, не престай моляся Христу Богу спасти и помиловати души наша.

Тропарь преподобному Мартирию, Зеленецкому чудотворцу

Тропарь, глас 2:
От юности, богоблаженне, Христа возлюбив, отечество оставил еси и, всех мирских мятежей уклонився, в тихое пристанище пречестныя обители Богоматерни достигл еси: отонудуже увидив непроходную пустыню, крестовидною зарею показанную желательне ю обрел еси и, в ней вселився, иночествующих собрал еси, и сих ученики своими, яко лествицею восходною на небо, трудолюбно тщался еси возводити к Богу. Емуже молися, богомудре Мартирие, даровати душам нашим велию милость.

Тропарь преподобному Мартирию, диакону Печерскому, в Дальних пещерах

Тропарь, глас 1:
Служивый в чину диаконства Господеви добре, честный иеродиаконе Мартирие, и тамо яко слуга Господень обретыйся, идеже и Господь твой, молися Ему и о нас, да подаст нам велию милость.

Тропарь преподобной Марфе Антиохийской, Едесской

Тропарь, глас 4:
Житием чистым и любовию, яже ко Пречистей Божией Матери, стяжала еси дар чадородия преславный, светильника миру, дивнаго Симеона, тем тя, Марфо, яко матерь, о чаде веселящуюся, песньми ублажаем.

Тропарь святым Марфе и Марии, сестрам Лазаря

Тропарь, глас 3:
Праведнаго Лазаря Боголюбивыя сестры, Марфо и Марие преславныя, чистым сердцем Христа в житии вашем возлюбили есте, мироносиц вземши чин, и Его, яко Сына Божия, безбоязненно исповедали есте; сего ради ныне во обителех Отца Небеснаго со ангелы и всеми святыми славно царствуете. Умолите, Егоже возлюбили есте, и нам грешным в вере и любви Христовой утвердитися и Царствия Небеснаго сподобитися.

Тропарь преподобной Матроне Константинопольской

Тропарь, глас 8:
Мужескомудрено утаившися вражиих лукавых путей, Матроно, к жизни воистину шествовавши несумненною волею и неуклонное течение Богомудро скончавши, от Христа прияла еси благодать духовную, тем и воду цельбам источаеши любовию притекающим в память твою славную, мнихом похвала, моли Христа Бога спастися душам нашим.

Тропарь блаженной старице Матроне

Тропарь, глас 2:
Богом умудренную блаженную старицу Матрону, земли Тульския процветение и града Москвы преславное украшение, восхвалим днесь, вернии. Сия бо света дневнаго не познавши, светом Христовым просветися и даром прозрения и исцеления обогатися. Пресельница же и странница на земли бывши, ныне в чертозех небесных Престолу Божию предстоит и молится о душах наших.

Тропарь, глас 4:
Земли Тульския прозябение, града Москвы ангелоподобная воительнице блаженная старице Матроно. От рождения в слепоте телесней до конца своих дней пребывшая. Но от Бога щедро духовное зрение приявшая, прозорливице и молитвеннице. Наипаче дар исцеления болезней стяжавшая. Помогай всем с верою к тебе притекающим и просящим в болезнех душевных и телесных, радосте наша.

Кондак, глас 7:
К служению Христову от чрева матерня предызбранная, праведная Матроно, стезею скорбей и печалей шествующи, твердую веру и благочестие явивши, Богу угодила еси. Темже, почитающе память твою, молим тя: помози и нам в любви Божии пребывати, старице блаженная.

Величание:
Величаем тя, святая праведная старице Матроно, и чтем святую память твою, ты бо молиши о нас Христа Бога нашего.

Тропарь апостолу и евангелисту Матфею

Тропарь, глас 3:
Усердно от мытницы к звавшему Владыце Христу, явльшуся на земли человеком за благость, Тому последовав, апостол избранный явился еси и благовестник Евангелия вселенней велегласен. Сего ради чтим честную память твою, Матфее Богоглаголиве, моли милостиваго Бога да грехов оставление подаст душам нашим.

Тропарь:
Апостоле святый Матфее, моли милостиваго Бога, да прегрешений оставление подаст душам нашим.

Величание:
Величаем тя, Апостоле Христов Матфее, и чтем болезни и труды твоя, имиже трудился еси во благочестии Христове.

Тропарь преподобной Мелании Римляныне

Тропарь, глас 8:
В тебе, мати, известно спасеся еже по образу: приимши бо Крест, последовала еси Христу, и деющи учила еси презирати убо плоть, преходит бо, прилежити же о душе, вещи безсмертней. Темже и со Ангелы срадуется, преподобная Мелание, дух твой.

Кондак, глас 3:
Девства чистоты возлюбльши и обручника к благим увещавши, премножество богатства расточи, в пребывание иночествующим, Богоблаженная к обители воздвиже. Темже в Небесная обители вселися, поминай нас, Мелание всечестная.

Тропарь святителю Мелетию, архиепископу Харьковскому

Тропарь, глас 4:
Мира сего временная, яко преходящая уразумел еси, от юности постническое и многотрудное житие возлюбил еси, всеблаженне, иерархов славо и преподобных похвало, Предвечного Слова усердный благовестниче, сирых и неимущих крове и прибежище. Темже в молитвах пребывая, Христу утреневати прилежал еси и, Сего взыскуя, венец неувядаемый со всеми святыми стяжал еси, отче наш, святителю Мелетие, моли Христа Бога спастися душам нашим.

Тропарь преподобному Меркурию Печерскому, епископу Смоленскому, в Ближних пещерах

Тропарь, глас 8:
Постом душу твою просветил еси, молитвами непрестанными сердце твое сосуд Духа Святаго соделал еси, преподобне отче наш Меркурие; темже вся вражия ополчения крепко посрамил еси и, яко победоносец истинный, воздаяние получил еси от Христа Бога. Тому помолися о душах наших.

Кондак, глас 8:
Любови ко Христу уязвив твою душу, преподобне отче наш Меркурие, в пещернем мраце свет спасения обрел еси и, яко чадо избранное великих отцев Печерских Антония и Феодосия, вкупе с ними обитель райскую наследовал еси, отонудуже призирай ныне на обитель земную, в нейже подвизался еси, и моли о чтущих память твою.

Тропарь преподобному Меркурию Печерскому, в Дальних пещерах

Тропарь, глас 5:
Присносущныя, блаженне, желая сподобитися жизни, праведне и непорочне жизнь свою препроводил еси в нынешнем веце, темже, Меркурие, желаемаго ты достиг, моли и нам вечныя сподобитися жизни.

Тропарь мученику Меркурию Смоленскому, воину

Тропарь, глас 2:
Возсияв, яко звезда многосветлая, в соборней церкви пред пречистым и чудотворным образом Пречистей Богородицы, за Нюже и за град Смоленск пострада, многокозненнаго и богомерзкаго царя Батыя устраши, и сильнаго исполина победи, и люди удиви, душу свою, многострадальне Меркурие, за благочестие положи, яко Захариина и Авелева ясно вопиет твоя кровь ко Господу. И ныне молися за души наша.

Тропарь священномученику Мефодию, епископу Патарскому

Тропарь, глас 1:
Кровь твоя, мудре, тайно вопиет от земли, якоже Авелева к Богу, Богомудре святителю Мефодие, ясно проповедавый Божие вочеловечение. Темже и посрамил еси Оригенову лесть, и преставился еси в Небесный чертог. Моли Христа Бога, да спасет души наша.

Тропарь преподобному Мефодию, игумену Пешношскому

Тропарь, глас 8:
Божественною любовию от юности распаляем, вся яже в мире красная возненавидев, Христа единаго возлюбил еси, и сего ради в пустыню вселився, в ней обитель сотворил еси, и собрав иноков множество, приял еси от Бога чудес дар, отче Мефодие, и был еси о Христе собеседник и спостник преподобному Сергию, с нимже у Христа Бога испроси здравие и спасение, и душам нашим велию милость.

Тропарь Пресвятой Богородице перед ея иконой, именуемой «Милостивой»

Тропарь, глас 1:
Притецем, людие, со дерзновением к Милостивой Царице Богородице, и умиленно воззовем к Ней: ниспослй, Владычице, милости Твоя богатыя, сохраняя во здравии и благоденствии грешныя рабы Твоя. Болящия исцели, скорбящия утеши и бедствующим помозй. И сподоби нас, Премилостивая, благочестно житие сие земное скончати, христианскую непостыдную кончину получите и Небесное Царствие унаследовати. Град наш избави от всякаго злаго обстояния, ограждая Твоим Милостивым заступлением. Мйрови мир даруй и спасение душам нашим испроси.

Тропарь мученикам Мине, Ермогену и Евграфу

Тропарь, глас 8:
Воздержанием страстей огнепальныя умертвивше зраки и движения, Христовы мученицы прияша благодать недуги отгоняти немощных и живше и по кончине чудодействовати. Воистинну чудо преславно, яко кости наги источают исцеления, слава Единому и Создателю Богу.

Тропарь мученику Мине

Тропарь, глас 4:
Яко Безплотным собеседника и страстотерпцем единовсельника, сошедшеся верою, Мино, восхваляем тя, мира мирови испроси и душам нашим велия милости.

Тропарь святителю Мине, епископу Полоцкому (1116)

Тропарь, глас 4:
Правило веры, и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Мино, моли Христа Бога спастися душам нашим.

Тропарь святым сестераммученицам Минодоре, Митродоре и Нимфодоре

Тропарь:
Агницы словесныя Агнцу и Пастырю приведостеся мучением ко Христу, течение скончавше, и вере соблюдше: темже днесь радостною душею совершаем, досточудныя, святую вашу память, Христа величающе.

Ин тропарь, глас 8:
В Троице хвалимый Бог троицу мучениц прослави, Минодору, Митродору и Нимфодору, в того бо веровавшее врага низложиша. Тех молитвами, Христе Боже наш, помилуй нас.

Кондак:
За Троицу терпеливно страдальчествовавшыя, многокозненнаго врага победисте, братски облекшеся духом: темже водворитеся с пятьми девами в небеснем, страстотерпицы, чертозе, и со ангелы Всецарю в весели непрестанно предстоите.

Тропарь Пресвятой Богородице перед Ея иконой, именуемой «Минская»

Тропарь, глас 5:
На древе крестнем явилася еси, Пренепорочная Отроковице, от Царьграда и Киева Богоспасаемому граду Минску милость показавши. Просвети нас, грешных, сиянием Своим, яви, яко присно, силу Свою, спаси нас предстательством Своим и избавляй от навет вражиих, Тя бо Необоримую Стену и едину Надежду имамы.

Тропарь Пресвятой Богородице перед Ея иконой, именуемой «Мирожская»

Тропарь, глас 4:
Яко звезда пресветла возсия в Российской земли от иконы честнаго образа Твоего, Богородице Дево, из обою очию текущи слезы Твоя, яко река, и видевше народи псковскии, мужи и жены и с чады, с плачем молящеся образу Твоему, сице глаголюще: О Пресвятая Владычице Богородице, не забуди грешных раб Твоих, молящися Христу Богу нашему спастися нам.

Величание:
Величаем Тя, Пресвятая Дево, Богоизбранная Отроковице, и чтем образ Твой честный, имже показала еси пречудное знамение.

Тропарь мученице Миропии

Тропарь, глас 1:
Добромученице Миропие и Христа невесто нетленная, ныне Емуже предстоиши, прекрасная, раны носящи плоти, яко камни светлы и светообразны, и в кровавую порфиру, яко царица, облеченная, преславная, умоли Его за ны, яже с любовию восхваляющия хвалы победными и песньми твою Божественную страсть.

Тропарь святителю Митрофану, епископу Воронежскому

Тропарь, глас 4:
Правило веры и образ кротости словом и житием пастве твоей, отче смиренномудре Митрофане, был еси. Темже и во светлостех святых солнца светлейше возсиял еси, венцем нетления и славы украшаемь, моли Христа Бога стране нашей и граду твоему в мире спастися.

Тропарь святым мученикам князю Михаилу и боярину его Феодору, Черниговским чудотворцам

Тропарь, глас 4:
Жизнь вашу мученически совершивше, исповедания венцы украсившеся, к небесным восекосте, Михаиле премудре с доблим Феодором, молите Христа Бога, сохранити отечество наше, по велицей Его милости.

Тропарь, глас 8 (Перенесение мощей):
Троичнаго Божества осиянием просветився, страстотерпче великий княже Михаиле, с премудрым болярином ти Феодором, самозванна к подвигом устремистася, сквозе огнь не идоста, кусту же и идолом не поклонистася, но оплеваста и нечестиваго царя обличиста, Христа же Единаго от Троицы Бога Суща исповедаста. И того ради кровей своих струями обагристася, славная. Темже и венцы от Него победная прияста, и нас свыше назираета, молим вас, святыя, молите Того, яко да вашими молитвами избавит нас от всяких обстоящих ны зол и подаст нам вся благая, Иже Един Сый прославляемый во святых Своих.

Величание:
Величаем тя, благоверный княже Михаиле, и с болярином твоим Феодором, и чтим святую память вашу, иже за Христа кровь свою излиясте, и ныне молите за нас Христа Бога нашего.

Тропарь святителю Михаилу, первому митрополиту Киевскому

Тропарь, глас 4:
Днесь пророчествие во апостолех Первозваннаго исполнися: се бо на сих горах возсия благодать и вера умножися. И иже неверием обветшавший Божественною купелию отродишася и быша людие обновления, царское священие, язык свят, Христово стадо, емуже ты первый пастырь явился еси, яко первее Крещением послуживый. И ныне, предстоя Владыце Христу Богу, моли всем сыном русским спастися: имаши бо дерзновение яко иерарх Божий и священнослужитель.

Тропарь мученику Михаилу сновидцу

Тропарь, глас 5:
От добляго наставника Феодора чистоту твердо извыче, и от нечестия царицы Сеиды целомудрием по образу Иосифа сохранися, такоже и нечестиваго царя Адрамелеха премудрыми твоими глаголы прения и ласкания низложив, и по Христе мучения венцем увязеся, Богомудрый Михаиле, Егоже моли спасти души наша.

Тропарь благоверному князю Михаилу Тверскому

Тропарь, глас 8:
Возвысив ум твой к Богу, и жития со Ангелы возжелел еси, тленную славу земную оставил еси, блаженне, и положил еси душу твою за люди твоя, восприял еси венец противу трудов твоих, Богомудре Михаиле, моли Христа Бога о чтущих любовию святую память твою.

Величание:
Величаем тя, благоверный княже Михаиле, и чтим святую память твою, иже за Христа кровь свою излиял еси, и ныне молиши за нас Христа, Бога нашего.

Тропарь преподобному Михею Радонежскому

Тропарь, глас 4:
Иго Господне на рамо взем, последовал еси Христовы со учителем своим преподобным Сергием, с нимже и сподобился еси видети Пресвятую Богородицу. И слышал еси пресладкий глас Ея, яко обещася неотступна быти места сего, но, о преподобне Михее, молися о чтущих святую память твою.

Тропарь Пресвятой Богородице перед Ея иконой, именуемой «Млекопитательница»

Тропарь, глас 3:
Без семене от Божественного Духа волею же Отчею, зачала еси Сына Божия. От Отца без матере прежде век суща, нас же ради из Тебе без отца бывша плотию познала еси Младенца и млеком питала еси. Темже не престай молити избавитися от скорбей душам нашим.

Величание:
Величаем Тя, Пресвятая Дево, Млекопитательнице Спаса нашего, и чтим образ Твой святый, от негоже благодать исцеления нам присно подаеши.

Тропарь преподобному Моисею Мурину

Тропарь, глас 1:
Пустынный житель, и в телеси Ангел, и чудотворец явился еси, Богоносе отче наш Моисее: постом, бдением, молитвою Небесная дарования приим, исцеляеши недужныя и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.

Тропарь святителю Моисею, архиепископу Новгородскому, чудотворцу

Тропарь, глас 8:
Чистоты ради жития твоего, пощения же и молитв и трудов, сосуд благопотребен был еси Владыце Христу, Иже дарова тя стаду твоему, яко сокровище неотъемлемо, чудесы всех обогащающа. Тем и мы сошедшеся к раце мощей твоих, верою и любовию вопием: моли о нас, пречестный архиерею Моисее, отче наш.

Тропарь преподобному Моисею, чудотворцу Печерскому, в Дальних пещерах

Тропарь, глас 1:
Велия исправления и крепкия подвиги во псалмопениих же и коленопреклонениих безчисленных показавый и многими труды и чудодействии, Богоносе Моисее, просиявый, моли Христа Бога во еже спастися нам.

Тропарь преподобному Моисею Угрину, Печерскому, в Ближних пещерах

Тропарь, глас 4:
Труды и подвиги со страстьми по чистоте твоей видя, святе, кто не удивится? Глад бо, темницу и раны приемля, не поработился еси сластем ляховицы, но, яко царь, страстьми обладаяй, ныне и тогда воспрославился еси от Всевидящаго человеческая сердца, от Негоже во искушениях всем пособствовати благодать прием, пособствуй и нам, твою память чтущим, Моисее преподобне.

Тропарь пророку Моисею Боговидцу

Тропарь, глас 2:
На высоту добродетелей возшел еси пророче Моисее: и сего ради сподобился еси видети славу Божию, скрижали благодатным закона прият и начертаний благодать в себе нося, и пророков был еси честная похвала, и благочестия великое таинство.

Тропарь благоверному князю Мстиславу, во святом Крещении Георгию, Храброму, Новгородскому

Тропарь, глас 4:
Измлада явился еси, Богомудре княже Мстиславе, Божественный сосуд, избран Богови, благочестием воспитан, веру непорочну соблюл еси. Темже предстоя Святей Троице, молися стране Российстей сохраненной быти и всем нам спастися.

Тропарь Пресвятой Богородице перед Ея иконой, именуемой «Муромская»

Тропарь, глас 4:
Днесь светло красуется град Муром, яко зарю солнечную восприемши Владычице, чудотворную Твою икону, к ней же ныне мы притекающе и молящеся Тебе взываем сице: о, Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко милосерд!

Тропарь Небесным Чинам Бесплотным

Тропарь Небесным Чинам Бесплотным, глас 4:
Небесных воинств Архистратизи, молим вас присно мы недостойнии да вашими молитвами оградите нас кровом крил невещественныя вашея славы; сохраняюще нас припадающих прилежно и вопиющих: от бед избавите нас, яко чиноначальницы вышних сил.

Кондак Небесным Чинам Бесплотным:
Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко Безплотных Архистратизи.

Величание Небесным Чинам Бесплотным:
Величаем вас Архангели и Ангели и вся воинства, Херувими и Серафими, славящие Господа.

Тропарь мученице Неделе (Кириакии)

Тропарь, глас 3:
Одолением чудесным победила еси вражия силы до конца, Недело преславная, идоложрения бо тьму далече Креста честнаго светлостию прогнала еси, Мученице всехвальная, Христу Богу молися даровати нам велию милость.

Тропарь в Неделю праотец

Тропарь, глас 2:
Верою праотцы оправдал еси, от язык теми предобручивый Церковь, хвалятся в славе святии, яко от семене их есть плод благославен, — без семене Рождшая Тя. Тех молитвами, Христе Боже, помилуй нас.

Кондак, глас 6:
Рукописнаго образа не почетше, но Неописанным Существом защитившеся, треблаженнии, в подвизе огня прославистеся, среде же пламене нестерпимаго стояще Бога призвасте: ускори, о Щедрый, и потщися, яко милостив, в помощь нашу, яко можеши хотяй.

Тропарь святителю Нектарию Эгинскому, митрополиту Пентапольскому

Тропарь, глас 1:
Силиврии отрасль и Эгины хранителя, в последняя лета явльшагося, добродетели друга искренняго, Нектария почтим вернии, яко божественнаго служителя Христова: точит бо цельбы многоразличныя благочестно вопиющим: слава прославльшему тя Христу, слава давшему ти чудес благодать, слава действующему тобою всем исцеления.

Тропарь, глас 4:
Преподобнически пожив, яко мудрый иерарх, прославил еси Господа добродетельным житием, Нектарие преподобне. Темже, Утешителя прославлен силою, Божественными мощми твоими, демоны отгониши и болящия исцеляеши, верою приходящим ти.

Тропарь Пресвятой Богородице перед Ея иконой, именуемой «Неопалимая Купина»

Тропарь, глас 4:
Иже в купине, огнем горящей и несгораемой, показавый Моисеови Пречистую Твою Матерь, Христе Боже, огнь Божества неопальне во чреве приимшую, и нетленну по Рождестве пребывшую: Тоя молитвами пламене страстей избави нас, и от огненных запалений град Твой сохрани, яко Многомилостив.

Тропарь мученику Неофиту

Тропарь, глас 4:
Мученик Твой, Господи, Неофит во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзности. Того молитвами спаси души наша.

Тропарь Нерукотворенному образу Господа нашего Иисуса Христа

Тропарь, глас 2:
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы врагу. Темже благодарственно вопием Ти: радости исполнил еси вся, Спасе наш, пришедый спасти мир.

Кондак, глас 2:
Неизреченнаго и Божественнаго Твоего к человеком смотрения, Неописанное Слово Отчее, и образ неписанный и богописанный победителен ведуще неложного Твоего воплощения, почитаем того лобызающе.

Величание:
Величаем Тя, Живодавче Христе, и почитаем вси Пречистаго Лика Твоего преславное изображение.

Тропарь Божией Матери перед Ея иконой, именуемой «Нерушимая Стена»

Тропарь, глас 4:
К Богородице прилежно ныне притецем, грешнии н смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Тропарь, глас 4:
Яко нерушимую стену и всемощный покров стяжахом Тя, раби Твои, Владычице Богородице, мрак грехов и скорбей отгоняющую. Темже вопием Ти: мир мирови даруй и душам нашим свет и спасение.

Тропарь преподобному Нестору Летописцу, Печерскому, в Ближних пещерах

Тропарь, глас 4:
Великих князей русских деяния и преподобных отец печерских жития и чудеса написавый, свое же, Богомудре Несторе, многих ти ради добродетелей имя написано на небеси стяжавый, моли и нам написатися в Книги Животныя.

Тропарь преподобному Нестору Некнижному, Печерскому, в Дальних пещерах

Тропарь, глас 2:
Чист и прав сый сердцем, и свят, преподобне Несторе, душею, прост же паки и не умея сам чести книг, сего ради чтущим я прилежне внимал еси и, оная в себе соблюдая, спешно тщался еси исправляти, яже яко разумен исполнив, обрел еси Царствие Небесное.

Тропарь Пресвятой Богородице перед Ея иконой, именуемой «Неувядаемый Цвет»

Тропарь, глас 5:
Радуйся, Богоневесто, жезле тайный, Цвет Неувядаемый процветший, радуйся, Владычице, Еюже радости наполняемся и жизнь наследствуем.

Тропарь Пресвятой Богородице перед Ея иконой, именуемой «Неупиваемая Чаша»

Тропарь, глас 4:
Днесь притецем вернии к Божественному и пречудному образу Пресвятыя Богоматери, напояющей верных сердца небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти молящи Сына Твоего Христа Бога нашего спасти души наша.

Тропарь Пресвятой Богородице перед Ея иконой, именуемой «Нечаянная радость»
:
Тропарь, глас 4:
Днесь, вернии людие, духовно торжествуем, прославляюще Заступницу усердную рода христианскаго, и притекающе к Пречистому Ея образу, взываем сице: О премилостивая Владычице Богородице, подаждь нам нечаянную радость, обремененным грехми и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.

Тропарь преподобному Никандру пустынножителю, Псковскому чудотворцу

Тропарь, глас 6:
Светило незаходимаго света стране нашей явился еси, Богоблаженне, доблественне претерпев вражия озлобления, биение и раны яко одежда нетления вменишася тебе, со зверьми бо брався, и от человек злых прободения прияв, о тех молился еси, не постави им греха сего, глаголя; темже Владыце Христу уподобился еси, достохвальне Никандре, отче наш, молися о душах наших.

Тропарь Пресвятой Богородице перед Ея иконой, именуемой «Никейская»

Тропарь, глас 4:
Бысть чрево Твое святая трапеза, имущи Небеснаго Хлеба, Христа, от Негоже всяк ядый не умирает, якоже рече всяческих, Богородице, Питатель.

Тропарь священномученику Никите Славянину

Тропарь, глас 4:
Постнически подвизався и плоть покорив духу, вшел еси в тишину безстрастия, иерейством же украшен, за Христа пострадал еси твердейши, Емуже молися о чтущих тя, священномучениче Никито приснопамятне.

Тропарь преподобному Никите, столпнику Переславльскому

Тропарь, глас 4:
Православным смыслом юношская возжеления возненавидев и доблественныя нравы восприим, врага победил еси, и во благоразумии Богу угодил еси, и свыше от Него прием дар чудес, бесы прогоняти, недуги исцеляти, Никито преславне, моли Христа Бога, да спасет души наша.

Тропарь преподобному Никите, Кириллу, Никифору, Клименту и Исаакию, братьям Алфановым (Сокольницким) в Новгороде

Тропарь, глас 1:
Послушаша Господня гласа, добрии рачители бывше, благий Его Ярем на ся вземше, усердно понесосте и постничества путь достигше, преподобнии отцы, святии чудотворцы, воини Небеснаго Царя Христа, Никито, Кирилле, Никифоре, Клименте и Исаакие, сего ради от Вседержительныя десницы венцы неувядаемыми увязостеся, и Небесною славою одеястеся, и чудотворении обогатистеся, темже и о нас молите не престайте, да получим вечных благ, мы же сице взываем: слава Давшему вам к подвигу крепость, слава Венчавшему вас, слава Дающему вами всем исцеления.

Тропарь святителю Никите, епископу Новгородскому

Тропарь, глас 4:
Насладився, Богомудре, воздержания и желание плоти твоея обуздав, на престоле святительства сел еси, и яко звезда многосветлая, просвещая верных сердца зарями чудес твоих, отче наш, святителю Никито, и ныне моли Христа Бога, да спасет души наша.

Тропарь преподобному Никодиму Кожеезерскому

Тропарь, глас 8:
От царствующаго града пресельник явися и яже в нем великия обители и, промышлением Божественнаго разума окормляемь, к морским странам устремися, вселися же в пустыню, уклоняяся мирския молвы, и силою Святаго Духа вооружился еси, крестным оружием враги своя прогоняя, постом и непрестанною молитвою жизнь свою совершая, сревнуя великим отцем Антонию, и Онуфрию, и Павлу Фивейскому, с нимиже Господеви молися, отче Никодиме, спастися душам нашим.

Тропарь преподобному Никодиму Святогорцу

Тропарь, глас 3:
Мудрости благодатию, отче, украшенный, труба богогласная показался еси Духа и добродетелей наставник, Никодиме Богоглаголивый, всем бо подаеши спасительная учения, жития чистаго показуя сияние богатством Божественных твоих словес, имиже, яко свет, мирови возсиял еси.

Тропарь преподобному Николе Святоше, князю Черниговскому, Печерскому чудотворцу, в Ближних пещерах

Тропарь, глас 2:
Отечество и славу княжения твоего оставил, Князю смирения, Христови, усердно последовал еси, преподобне отче наш Николо; тем приял еси от Него вечное царство и славу на Небеси, идеже ликуя, поминай нас чтущих память твою верно.

Тропарь блаженному Николаю Кочанову, Христа ради юродивому, Новгородскому

Тропарь, глас 8:
Терпением своим и мужеством Христа ради во юродство претворився, блаженне Николае, худость ризную имея, тягость вара дневнаго понесл еси и мразы зимныя терпел еси. И ныне, в Вышних Троице предстоя, нам, приходящим с верою к раце мощей твоих, исцеление подаеши, твое успение честно славящим, и молиши Христа Бога спастися душам нашим.

Тропарь блаженному Николаю, Христа ради юродивому, Псковскому

Тропарь, глас 4:
Словенска языка, Псковския земли плотски в юродстве быв, юродства притворением Горняго Иерусалима гражданин явися, Ангелом, славне, свеселишися, мироточиваго святителя Николая звание восприим, с нимже всегда Христа Бога моли даровати нам велию милость.

Тропарь великомученику Николаю Софийскому

Тропарь, глас 3:
Зарею Духа обогатився, славне, и оттуду восприим дерзновение, исповедал еси на судищи мужески Троицу Единосущную, темже и камением побиваемь, не покорился еси. Огнем же сожигаемь, обличил еси прелесть безбожных, многострадальне святе Николае. Сего ради молим тя: испроси душам нашим велию милость.

Тропари святителю Николаю, архиепископу Мир Ликийскому

Тропарь, глас 4:
Правило веры и образ кротости, воздержания учителя яви тя стаду твоему яже вещей истина: сего ради стяжал еси смирением высокая, нищетою богатая. Отче священноначальниче Николае, моли Христа Бога спастися душам нашым.

Кондак, глас 3:
В Мирех, святе, священнодействитель показался еси: Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти; сего ради освятился еси, яко великий таинник Божия благодати.

Тропарь на рождество святителя Николая Чудотворца

Тропарь, глас 4:
Чудное и славное рождество твое, святителю Николае, Церковь днесь православных светло празднует, ибо стоянием ногу твоею яви тя Господь и провозвести быти светильника и учителя миряном, весь мир обогащающа и просвещающа чудесы. Тем вопием ти: моли Христа Бога спастися душам нашим.

Тропарь на перенесение мощей святителя и чудотворца Николая, архиепископа Мир Ликийских
:
Тропарь, глас 4:
Приспе день светлаго торжества, град Барский радуется, и с ним вселенная вся ликовствует песньми и пеньми духовными: днесь бо священное торжество, в пренесение честных и многоцелебных мощей Святителя и Чудотворца Николая, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас яко предстатель наш, великий Николае.

Кондак, глас 3:
Взыдоша, яко звезда, от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси, чудотворец изящный, предивный и милостивый.

Тропарь на перенесение Великорецкой иконы святителя Николая Чудотворца из Вятки в Москву

Тропарь, глас 3:
Яко драгоценное богатство, прииде к нам от Великия реки Вятки в царствующий сей град наш Москву честная икона образа твоего, святителю Николае, и многая убо чудеса в пришествии своем сотвори, болящия исцели и вся человеки удиви. Сего ради повелением самодержца царя списася с нея сия честная икона твоя на просвещение и моление всем людем царска града, юже днесь зрим и покланяемся ей, моляще тя, таинника Христова: моли, святе, о всех нас, даровати нам мир и велию милость.

Тропарь святителю Николаю Чудотворцу перед его иконой, именуемой «Зарайская»

Тропарь, глас 4:
Пресветлый храме Святаго Духа, Богомудре отче Николае, благодатию небес освяти души наша, заступи и покрый всечестным твоим омофором, его же приял еси от рук Пречистыя Девы, и просвети нас светом заповедей Христа, от Него бо приял еси глаголы жизни. Моли благость Отца Небеснаго, во еже спастися православно чтущим тя, даруя нам велию милость.

Величание:
Величаем тя, святителю отче Николае, и чтем святую память твою: ты бо молиши за нас Христа Бога нашего.

Тропарь Николаю, архиепископу Японскому

Тропарь, глас 4:
Апостолов единонравне и сопрестольне, служителю Христов верный и Богомудрый, цевнице избранная Божественнаго Духа, сосуде преизливающийся любве Христовы, Японския земли просветителю, святый Николае, иерарше равноапостольне, молися Живоначальней Троице о всем твоем стаде и о всем мире.

Тропарь 20000-м мученикам Никомидийским

Тропарь, глас 2:
Страстотерпцы Господни, блаженна земля, напившаяся кровьми вашими, и свята селения, приимшая телеса ваша: в подвизе бо врага победисте и Христа со дерзновением проповедасте. Того, яко Блага, молите спастися, молимся, душам нашим.

Тропарь преподобному Никону, игумену Киево-Печерскому, в Ближних пещерах

Тропарь, глас 5:
Христова винограда лоза явился еси, Богоблаженне Никоне, гроздие принося Ему — добродетели твоя, и прочиих, к темже наставляя, приводил еси Христу Богу, Емуже, молим тя, молися за души наша.

Тропарь преподобному Никону Сухому, Печерскому, в Ближних пещерах

Тропарь, глас 8:
Бога Благаго возлюбив, иноческое приял еси житие и, добре в нем подвизався, пленен был еси половцы, имиже много мучим, крепкодушне Никоне, благодатию Христовою свободился еси от них невидимо, и ныне во Свете пребывая неприступнем, моли спастися нам, твою память почитающим.

Тропарь преподобному Никону, игумену Радонежскому

Тропарь, глас 1:
Послушания добрый рачитель быв, преподобне Никоне приснопамятно, Церковь бо прекрасну Святыя Троицы в похвалу отцу твоему воздвигл еси. Темже и мы, чада твоя, любовию вопием ти: слава Давшему ти крепость, слава Венчавшему тя, слава Действующему тобою всем исцеления.

Тропарь преподобному Никону Сухому, в Ближних пещерах почивающему

Тропарь, глас 8:
Бога Благаго возлюбив, иноческое принял житие и, добре в нем подвизався, пленен был еси половцы, имиже много мучим, крепкодушне Никоне, благодатию Христовою сподобился еси от них невидимо, и ныне во Свете пребывая неприступнем, моли спастися нам, твою память почитающим.

Кондак, глас 6:
Первомученику подобяся, о мучителе твоем молился еси и, избавив того от смерти, привел еси ко Христу, преподобномучениче Никоне славнее, темже, с первострадальцем зря Христа одесную Отца , молися о нас, да не пребудем вне чертога Христова.

Тропарь 45-ти мученикам Никопольским (Армянским)

Тропарь, глас 1:
Единоумне душею связани бывше, четыредесять с пятьми страдальцы святии, на врага ополчистеся, победителие же явльшеся, приясте венцы от Христа Бога и вечное мучений ваших воздаяние, тыя и нам улучити молите, благочестно песньми вас величающим.

Тропарь преподобному Нилу Мироточивому, Афонскому

Тропарь, глас 1:
Монашествовав Богоугодно в Горе Афонстей, в молитвах и постах Бога взыскал еси и стал еси приятелище чистое Духа, облиставая верным добродетелей лучи, имиже осияваеши, Ниле, вопиющих тебе: слава прославльшему тя Богу, слава Венчавшему тя, слава Действующему тобою всем исцеления.

Тропарь преподобному Нилу Постнику, Синайскому

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Ниле, отче наш, моли Христа Бога спастися душам нашим.

Тропарь преподобному Нилу Сорскому

Тропарь, глас 4:
Удалився бегая Давидски мира, и вся яже в нем яко уметы вменив, и в месте безмолвне вселився, духовныя радости исполнился еси, отче наш Ниле: и Единому Богу изволив служити, процвел еси яко финикс, и яко лоза благоплодна умножил еси чада пустыни. Темже благодарственно вопием: слава Укрепившему тя в подвизе пустынножительства, слава Избравшему тя в России отшельником уставоположника изрядна, слава молитвами твоими и нас Спасающему.

Тропарь преподобному Нилу Селигерскому, Столобенскому чудотворцу

Тропарь, глас 4:
Яко светильник, всесветел, явился еси во острове Селигера езера, преподобне отче Ниле: ты бо, крест Христов от юности своея на рамо взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающи к раце мощей твоих, умильно глаголем: отче преподобне, моли Христа Бога, спастися душам нашим.

Величание:
Ублажаем тя, преподобне отче Ниле, и чтем святую память твою, наставниче монахов и собеседниче Ангелов.

Тропарь равноапостольной Нине, просветительнице Грузии

Тропарь, глас 4:
Слова Божия служительнице, во апостольстей проповеди первозванному Андрею и прочим апостолом подражавшая, просветительнице Иверии, и Духа Святаго цевнице, святая равноапостольная Нино, моли Христа Бога, спастися душам нашим.

Тропарь святителю Нифонту, епископу Новгородскому

Тропарь, глас 3:
Яко сый нравом православных Восточныя Церкве преданий истинный защитник, сподобился еси великаго во отцех Феодосия видети по смерти яко жива, возвещающа тебе Царствия Небеснаго наследие, егоже неизреченных доброт ныне с ним неразлучно наслаждаяся, моли и о нас, чадех своих, Нифонте прехвальне.

Тропарь преподобным Новгородским

Тропарь, глас 4:
Пустынное житие возлюбивше, преподобнии отцы, явистеся Новгородстей стране, яко иное солнце, озаряюще сию молниями чудес ваших, и просвещаете верою воспевающих вам: радуйтеся, постников похвало и праведных удобрение.

Тропарь чудотворцам Новгородским

Тропарь, глас 8:
Яко всесветлии светильницы, явистеся во стране сей, святителие Новгородстии, преподобнии, и Христа ради юродивии, и вси праведнии, постом насаждении воздержанием напаяеми, сего ради и сподобистеся быти приятелище Божия Духа и чудеса действовати, молите Христа Бога за вся люди, спастися душам нашим.

Тропарь на Новолетие церковное (индикт)

Тропарь, глас 4:
Благодарни суще недостойнии раби, Твои, Господи, о Твоих великих благодеяниях на нас бывших, славящи Тя хвалим благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Слава: глас 3:
Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Прещедрый.

Тропарь, глас 2:
Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире люди и град Твой, молитвами Богородицы, и спаси ны.

Кондак, глас 2:
В Вышних живый, Христе Царю, всех видимых и невидимых Творче и Зиждителю, Иже дни и нощи, времена и лета сотворивый, благослови ныне венец лета: соблюди и сохрани в мире град и люди Твоя, Многомилостиве.

Тропарь новым Российским чудотворцам (XVI в.)

Тропарь, глас 3:
Пречестная версто, Богом возлюбленная, отцы преблаженнии, православию наставницы, в Небесныя обители, яко на колеснице, добродетельми взыдосте, теплии заступницы Русския земли и всем верным стено и утверждение, Христу молитеся даровати нам велию милость.

Величание:
Величаем вас, святии вси русстии чудотворцы, и чтим святую память вашу, вы бо молите за нас Христа Бога нашего.

Иные популярные молитвы:

Православные молитвы святым угодникам. Святые угодники Божии
Церковные праздники. Православные праздники и посты
Православный календарь на год. Церковный календарь
Молитвы Пресвятой Богородице
Праздники русского народа, отмечаемые и почитаемые в России
Символы веры христианства
О молитве: Ответ на молитву, Почему Православная Церковь установила почитание святых мощей, За что Бог насылает на нас болезни, Почему мы почитаем святые мощи, Почему мы молимся святым, Молитва святым, Для чего нужно ходить в церковь
О молитве: Почему надо молиться по молитвослову, Какие молитвы входят в молитвослов, Какие книги относятся к церковно-богослужебным, Православный молитвослов, Как молиться за других людей, Как молиться за обидчиков и врагов
Общие тропари. Ангелу Хранителю, Апостолам, Архангелу, Бессребреникам, Всем святым
Молитвы при нападении нечистой силы
Тропари Пресвятой Богородице перед иконой
Молитвы иные Пресвятой Богородице и святых
Благословление на вступление в брак
Молитвы о благосостоянии детей в обществе
Молитвы за детей

Все молитвы ...



... Добавить в "Закладки" ... Ctrl+D


Для пожертвований:

Пожертвование.

Да хранит Вас Господь!

Православные информеры для сайтов и блогов


Молитвы к Пресвятой Богородице и святым.