Молитвы святых угодников

С Новым годом и Рождеством!

Главная --> Молитвы --> Тропари

Тропари Е-З.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. Е-З.

Тропарь праведной Еввуле

Тропарь, глас 1:
Всерадостное дарование от Бога святым женам — святыя дети; всерадостное даяние и тебе, святая Еввуло, — святый великомученик Пантелеимон, милости тезоименитый, недугующих целитель и наш заступник. Слава убо о вас Всемилостивому Владыце, слава Подающему вами цельбы, слава предстатели наши вас Показавшему.

Тропарь преподобномученице Евгении

Агница Твоя Иисусе Евгения зовет велиим гласом: Тебе Женише мой, люблю, и тебе ищущи страдалъчествую, и сраспинаюся, и спогребаюся крещению Твоему, и стражду Тебе ради яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко милостив, спаси души наша.

Тропарь праведному Евдокиму Каппадокиянину

Тропарь, глас 4:
От земли воззвавый тя к Небесным селением соблюдает и по смерти невредимо тело твое, святе Евдокиме: ты бо в целомудрии и чистом жительстве, блаженне, жительствовал еси, не осквернив плоти. Темже со дерзновением моли Христа Бога спастися нам.

Тропарь преподобномученице Евдокии Илиопольской

Тропарь, глас 8:
Правостию умною душу твою привязавши в любовь Христову, тленных, и красных, и временных забытием претекла еси, яко Слова ученица: лощением страсти первее умертвивши, страдальчески второе врага посрамила еси. Тем Христос сугубых венцев сподоби тя, славная Евдокие, преподобная страстотерпице, моли Христа Бога спастися душам нашим.

Тропарь Евстафию I, архиепископу Сербскому

Тропарь, глас 4:
Избран от Бога, возлюблен от людей, архиереов Божественная красото, отче Евстафие, Ангелов сослужителю, таин же Божественных проповедатель был еси, темже моли Христа Бога со всеми святыми избавитися от всяких зол молитвами твоими, блаженне, и спастися нам, чтущим любовию святую память твою.

Тропарь преподобномученику Евстратию Печерскому

Тропарь, глас 7:
Постником и мучеником явился еси похвала, преподобне Евстратие, прежде бо воздержанием плоть умертвив, последовал еси Христу, нося крест свой. Последи же и сам на крест вознесен быв и копием в ребра прободен, в руце Божии душу предал еси. Колесницею огненною возносим на Небеса, сугубо венчался еси от Христа Бога и Спаса душ наших.

Кондак, глас 8:
Яко ревнитель страсти Владычней и постников усердный последователь сый, пленники учением твоим наставль, Христови привел еси, Евстратие, и нас, пленных страстьми, мольбами своими свободи и подражатели честному твоему житию покажи, зовущих: радуйся, испивый сладостне чащу Христовых страданий.

Тропарь мученикам Евстратию, Авксентию, Евгению, Мардарию и Оресту

Тропарь, глас 4:
Мученик всечестных светлость, пяточисленных страстотерпцев воспоем, славу земных презревших, солнца светлаго Евстратия, премудраго витию со страдальцы, на огнь и муки дерзнувших за всех Царя Христа и от Престола Того славы почестьми венцев обдаренных. Тех молитвами, Христе Боже, спаси души наша.

Тропарь преподобному Евфимию Архангелогородскому

Тропарь, глас 4:
Яко сокровище многоценно и источник, изливающ токи исцелений, подаде нам Христос честныя мощи твоя, преподобне Евфимие, болезни убо отъемлющия страстей различных, благодать же душам точащия непрестанно, Егоже моли даровати нам велию милость.

Тропарь святителю Евфимию, патриарху Болгарскому

Тропарь, глас 4:
Подвигом пустынным просиял еси и на престол первосвятительства по достоянию возшел еси, отонудуже лучами Боговедения и добродетели всех озарил еси и чашу мученичества безкровно отпил еси. Ныне же предстоя престолу Горняго Иерусалима, Евфимие, моли седящаго на нем Христа Бога нашего о почитающих честную память твою.

Тропарь преподобному Евфимию Великому

Тропарь, глас 4:
Веселися, пустыня нераждающая, благодушствуй, неболящая, яко умножи тебе чада муж желаний духовных, благочестием насадив, воздержанием воспитав добродетелей в совершенство, Того молитвами, Христе Боже, умири живот наш.

Тропарь преподобному Евфимию и Харитону Сянжемским

Тропарь, глас 1:
Пустынное и безмолвное житие ваше постнически препроводивше, Христов бо крест на рамо вземше и Того стопам усердно последовавше, на невидимаго врага мужески ополчистеся, и того козни сокрушисте, молитвами и слезами чистотою Богови приближившеся, преподобнии отцы наши Евфимие и Харитоне. Яко солнце, осияваете светозарными лучами чудес ваших, всех нас спасите с верою призывающих вас и творящих честную вашу память, и, яко имущии дерзновение ко Спасу, мир мирови испросите и спастися душам нашим.

Тропарь святителю Евфимию, архиепископу Новгородскому, чудотворцу

Тропарь, глас 4:
Избран быв Богови от юности, святителю Евфимие, и сего ради архиерейства саном почтен быв, упасл еси люди, иже тебе Богом врученныя; темже и по преставлении чудес дарования от Господа приял еси исцеляти различныя недуги. Того моли о нас, совершающих честную память твою, да тебе вси непрестанно ублажаем.

Тропарь преподобномученику Евфимию Новому, Афонскому, Константинопольскому

Тропарь, глас 4:
Постнически преподвизався на горе, умная врагов ополчения всеоружием креста погубил еси, всеблаженне, паки же ко страдальчеству мужески облеклся еси, убив Копронима мечем веры и обоих ради венчался еси от Бога, преподобномучениче Евфимие приснопамятно.

Тропарь преподобному Евфимию, схимнику Печерскому, в Дальних пещерах

Тропарь, глас 4:
Евфимие всечестне, преподобным единоревнителю и Ангелом собеседниче, получивый с ними житием своим чистым и безмолвным вечная благая, молися Господеви присно о всех нас, да и мы тех же благ сподобимся.

Тропарь преподобному Евфимию, архимандриту Суздальскому, чудотворцу

Тропарь, глас 3:
Яко светозарная звезда, пришел еси от востока на запад, оставив отечество твое, Нижний Новград, и, дошед богоспасаемаго града Суждаля, в нем обитель сотворил еси, и собрал еси монахов множества, и, прием дар чудес от Бога, отче Евфимие, был еси о Христе собеседник и спостник преподобному Сергию. С нимже у Христа Бога испроси нам здравие, и спасение, и душам нашим велию милость.

Тропарь преподобномученикам Евфимию, Игнатию и Акакию Афонским

Тропарь, глас 1:
Равночислении Троицы Несозданныя суще, с лики Ангелов и чины мучеников предстоите вы, радующеся Престолу Божества, мудрии. Сего ради причастием сияние отонуду приемлюще, источник исцелений верным подаете и Божественное просвещение, мучениче Христов Евфимие со Игнатием мудрым и с Божественным Акакием, о нас присно молитеся.

Тропарь великомученице Евфимии Всехвальной

Тропарь, глас 4:
Жениха твоего Христа возлюбивши и свещу твою светлу уготовльши, добродетельми возсиявши, всехвальная Евфимие, тем возшла еси с Ним на брак, венец страдания от Него приемши. Но от бед избави нас, чтущих верою память твою.

Тропарь преподобному Евфросину Псковскому

Тропарь, глас 4:
Житейскую печаль и всяк мятеж мира сего любве ради Христовы со дерзновением отвергл еси, блаженне, и повеленная распятым Господем Иисусом Христом вся исправил еси, и, Того ярем взем, во всем воли Его повинулся еси, и, благочестив делатель, животным заповедем Христовым благотрудно прилежал еси. И сего ради Бог прослави тя и по преставлении чудеса показа от честнаго гроба твоя, Темже и неоскудно угобзися обитель твоя, и нищим бысть богатное пристанище и покров, отче наш преподобне Евфросине, моли Христа Бога, да спасет души наша.

Ин тропарь, глас 4:
Изволением Божественнаго разума вселися в пустыню и тамо вперив свой ум в Небесныя обители и равно Ангелом житие пожив на земли, в молитвах и трулах, и в пощении образ быв своим учеником. Темже Бог, видев твое благое изволение, умножи тебе чада в пустыни, слез твоих тучами напаяема, но, яко имея дерзновение к Богу, поминай стадо свое, еже собрал еси, мудре, и не забуди, якоже обещался еси, посещая чад своих, Евфросине, преподобне отче наш.

Кондак, глас 8:
Божиим светолитием просвещен, отче, постническое стяжав жительство, преподобне; иноком преподобный наставниче и постником благое украшение. Сего ради Господь, труды твоя видев, даром чудес обогати тя, источаеши бо исцеления. Мы же, радующеся, вопием ти: радуйся, отче Евфросине, иноком удобрение.

Тропарь преподобному Евфросину Синеозерскому

Тропарь, глас 1:
От юности вперив ум свой к Богу, блаженне Евфосине, и бегая суеты мира сего, достигл еси в пустыню непроходимую, идеже Богу тя укрепляющу, ангельское житие стяжав, поработал еси довольно Владыце твоему Христу в пощении и в молитвах и во всенощных бдениих и сподобился еси дара Духа Пресвятаго, еже прорицати будущая, наставляя на стезю покаяния притекающих к тебе и послушающих тя. Темже Всеблагий Бог, видя великую твою к Себе веру, нелицемерную любовь и несумненную надежду, дарова тебе, не точию еже веровати в Него, но и еже страдати по Нем, егда от противных сынов в тойже пустыни кровь твоя нещадно излияся, и доселе, якоже Авелева, вопиет к Богу, свидетельствующу о сем нетлением мощей твоих: в няже взирающе умильно вопием: слава, Даровавшему тебе Благодать толику, Егоже и моли о нас.

Ин тропарь, глас 4:
От юности вперив ум свой к Богу, блаженне Евфросине, отвержением мира, вселился еси в непроходимую пустыню, в нейже постнически, укреплением Божиим, в молитвах и в пощениих доблественне, якоже достоит, пожил еси, и жизнь свою страдальчески неповинне убиением от сопротивных сынов скончал еси. Сего ради со преподобными и со мученики венчался еси, с нимиже предстоя Престолу Пресвятыя Троицы, моли, молим тя, оставление подати согрешениям нашым и даровати нам велию милость.

Кондак, глас 8:
Подражая житию древних отец, Богомудре Евфросине, возненавидев мира сего красоту, вселился еси в пустыню, и веру Христову якоже щит в сердце свое прием, изшел еси, добр воин Царя Небеснаго не на брань противу плоти и крови, но на брань противу кознем невидимаго врага. Темже даровавшейся тебе Духа Святаго Благодати, глубоким смирением твоим низложил еси вознесенную того гордыню, и приял еси от Небеснаго Дародателя неувядаемый венец победы. Сего ради сошедшеся любовию вопием ти: радуйся, отче Евфросине, пустынное украшение.

Тропарь преподобномученику Евфросину Синозерскому, Новгородскому

Тропарь, глас 4:
От юности твоея вперив ум твой к Богу, блаженне Евфросине, мира же отвергся, вселился еси в пустыню непроходимую, и тамо, от Господа укрепляемь, в молитвах и пощениих доблественне пожил еси, и жизнь твою страдальчески убиением от сынов противления скончал еси, сего ради со преподобными и мученики венчался еси, с нимиже и ныне предстоиши Престолу Пресвятыя Троицы. Сию моли, молим тя, оставление подати согрешений наших и даровати нам велию милость.

Тропарь преподобной (благоверной княгине) Евфросинии Московской

Тропарь, глас 8:
По земнем вдовстве Небесному Жениху себе уневестивши и в княжестем чертозе подвижнически поживши, послежде и чертог и чад твоих Бога ради оставила еси, преподобная Евфросиние, и вшедши во обитель, тобою созданную, во иноческом образе многи подвиги показала еси, и святое житие по благодати Божией блаженною кончиною увенчала еси. И ныне, предстоящи Христу Богу, моли спастися душам нашим.

Кондак, глас 2:
Вся красная мира сего яко суетная презревши и тело твое постом и бдением изнуривши, непрестаными молитвами Богу угодила еси, преподобная Евфросиние, и, дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.

Величание:
Ублажаем тя, преподобная мати Евфросиние, и чтим святую память твою, ты бо молиши за ны Христа Бога нашего.

Тропарь преподобной благоверной княгине Евфросинии Полоцкой

Тропарь, глас 4:
Подражающи дванадесятолетна дванадесятолетну Христу, учившему во святилищи Божию Слову, последовала еси, Евфросиние. Славу временную и земнаго обручника оставльши и вся мирская презревши, краснейшему паче всех Христу себе уневестила еси, крест вземши, путем ангельскаго жития шествующи и многия к Нему наставляющи, во благоухании мира в Небесный Чертог востекла еси, иде же моли, Его же возлюбила еси, о чтущих благочестно память твою.

Тропарь, глас 3:
Веселися, земле Полотская, красуйся и ликуй, обитель Спасова, се бо Господь исполни желание сердца вашего: духовная Мати наша и Предстательница, Евфросиния богомудрая яко птица возлете от града Киева, и яко горлица обрете гнездо свое во обители древнего удела своего, иде же собирает птенцы своя под крыле свои, сохранити и утвердити я в правоверии, пришествием многоцелебных мощей своих просветити омраченная, собрати расточенная, разогна и тьму искушений и бед от вопиющих верно: спасай нас молитвами твоими, яко предстательница наша, преподобная мати Евфросиния.

Кондак, глас 8:
Избранней Богом от самаго рождения, и призванней на служение Ему, в чине ангельстем Господеви послужившей свято, и преподобно пожившей, и ныне с Небесными силами Господа восхваляющей, о нас же, грешных, пред Господем ходатайствуй, с радостию и любовию воззовем: радуйся, Евфросиние, невесто Христова всечестная.

Величание:
Ублажаем тя, преподобная мати Евфросиние, и чтим святую память твою, наставнице инокиням и собеседнице ангелом.

Тропарь преподобной (благоверной княгине) Евфросинии Суздальской

Тропарь, глас 4:
Святая твоя память Суждальскую страну веселит, верных же вся созывает во всечестный храм твой, идеже ныне совершается всеславная память твоя, Евфросиние преподобная: моли Христа Бога спастися душам нашим.

Кондак, глас 2:
Девства чистый сосуд елеем молитвы и любве исполнивши, неугасимый светильник в сердце своем возжгла еси, преподобная, с нимже бодренно в сретение Небеснаго Жениха изшедши, в чертог Того пресветлый прията была еси: идеже ныне водворяяся с лики ангелов и святых, молися, молимся, Христу Богу, части дев юродивых избавитися нам.

Кондак, глас 8:
Девства чистотою возмогла еси свешу своего разума и просветила еси душевную чистоту, пощением же и бдением плоть поработила еси духу, темже, преподобная Евфросиние, почитающе подвиги трудов твоих, молимся, моли Христа Бога спастися душам нашим.

Величание:
Ублажаем тя, преподобная мати Евфросиние, и чтим святую память твою, наставнице инокиням и собеседнице ангелом.

Тропарь великомученице Екатерине

Тропарь, глас 4:
Добродетельми, яко лучами солнечными, просветила еси неверныя мудрецы: и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино: желанием востекла еси в небесный чертог, к прекрасному Жениху Христу, и от Него царским венцем венчалася еси: Емуже со Ангелы предстоящи, за ны молися, творящия пречестную память твою.

Тропарь преподобному Елеазару, Анзерскому чудотворцу

Тропарь, глас 3:
Отверг плоти тленныя, нетленных потщался еси достигнути. и, мира удалився, вселился еси в морской остров, и на нем усердно многа лета Господеви поработал еси: сего ради и дары прозрения и чудес обогатился еси, отче преподобне Елеазаре, Христа Бога моли даровати нам мир и велию милость.

Тропарь блаженному Елезвою, царю Ефиопскому

Тропарь, глас 4:
Иже Божественным рачением подвигся на отмщение пролитыя крови праведных, яко Давид от Самуила, ты же от Зинона предивнаго, пророчески яже сбытися тебе предрекша, еже обещанием к нему, и того благословением победы на враги и одоления показавшу, отнюду же со отложением царства постных селений горы жизнь соверши, Елезвое царю, моли Небеснаго Царя Христа спасти души наша.

Тропарь Пресвятой Богородице перед Ея иконой, именуемой «Елецкая» (Владимирская)

Тропарь, глас 4:
Днесь светло красуется древний град Елец, поминающе славное чудо Пресвятыя Богородицы: егда бо на стогнах Первопрестольныя Москвы икону Ея чудную людие московстии сретаху, тогда Сама, Владычице, на горе Аргамачстей во граде Ельце, на сретение нечестивому Тамерлану изшедше, грозное его нашествие вспять обрати. Сего дивнаго явления изображение на новописанней иконе зряще и Заступницу нашу за вся благодеяния Ея благодаряще, умильно Ей взываем: и в предняя не остави нас, о Мати Милосердая.

Тропарь Пресвятой Богородице перед Ея иконой, именуемой «Елецкая» (Черниговская)

Тропарь, глас 6:
Твоего милосердия дарования воспоминающе, Владычице, и Твой чудотворный образ благоговейно лобызающе, упованием же Твоея помощи сердца наша веселяще, аки среди нас пребывающую Тя помышляем и верою Тебе вопием: Твоего моли Сына и Господа, да научит нас заповеди Его всегда творити и злыя искушения побеждати, и Тебе Предстательницу нашу, достойно пети и славити во веки.

Тропарь преподобному Елиазару, Анзерскому чудотворцу

Тропарь, глас 3:
Отверг плоти тленныя, нетленных потщался еси достигнути. и, мира удалився, вселился еси в морской остров, и на нем усердно многа лета Господеви поработал еси: сего ради и дары прозрения и чудес обогатился еси, отче преподобне Елеазаре, Христа Бога моли даровати нам мир и велию милость.

Тропарь святой преподобномученице великой княгине Елисавете

Тропарь, глас 2:
В красоте земней красоту небесную показала еси, святая преподобомученица Елисавето, и женаммироносицам Марии и Марфе подражала еси, в служении Богу и людем страждущим. Темже прослави тя Христос Бог, яко едину от святых жен российских, дарующих вам мир и велию милость.

Тропарь, глас 1:
Смирением достоинство княжеское сокрывши, богомудрая Елисавето, сугубым служением Марфы и Марии Христа почтила еси. Милосердием, терпением и любовию себе предочистивши, яко жертва праведная Богу принеслася еси. Мы же, чтуще добродетельное житие и страдания твоя, яко истинную наставницу усердно просим тя: святая мученице великая княгине Елисавето, моли Христа Бога спасти и просветити души наша.

Тропарь, глас 4:
Страстотерпица преподобная Варваро, в напастех с наставницей своею даже до смерти пребывшая, Христово бо Евангелие исполнив, положила еси душу свою за други своя. Ныне же предстоя с собором святых жен российских, моли оставление грехов даровати чтущим любовию святую память твою.

Тропарь, глас 4:
Кротость и смирение и любовь вселивши в душу свою, усердно послужила еси страждущим, страстотерпице святая княгине Елисавето, таже с верою претерпела еси страдания и смерть за Христа, с мученицею Варварою. С нею же моли о всех с любовию почитающих вас.

Кондак, глас 4:
Воспоем днесь славу святым новомученицам Российским, благоверной княгине Елисавете с Варварою верною, в Гефсиманийстей веси погребенным, образ бо вам показавшим мужества духовнаго во исповедании веры Православныя. Темже молим вас, молитеся Христу Богу, да изведет на жатву делатели Своя, просветити светом истинныя веры страну еяже возлюбили есте, и спасет души наша.

Кондак, глас 4:
От славы царственныя, вземши крест Христов, прешла еси к славе небесней, молящися за врагов, и обрела еси радость вечную, святая мученице княгине Елисавето, с Варварою мученицею. Темже молите о душах наших.

Тропарь преподобному Елисею Лавришевскому и святителю Лаврентию, затворнику Печерскому, епископу Туровскому, в Ближних пещерах

Тропарь, глас 3:
Преподобне отче наш Елисее, с Лаврентием чудным подвизался еси, учителю своему подражая, земную славу и честь стопам Христа повергли есте, темже Господь увенча вас нетленным венцем славы Своея.

Тропарь преподобному Елисею Лавришевскому

Тропарь, глас 3:
Преподобне отче наш Елисее, с Лаврентием чудным подвизался еси, учителю своему подражая, земную славу и честь стопам Христа повергли есте, темже Господь увенча вас нетленным венцем славы Своея.

Тропарь пророку Елисею

Тропарь, глас 4:
Иже во плоти Ангел и пророков начальнику свидетельствова, славный Елисее, дивны чудеса соделал еси, пророче, поспешеством Святаго Духа; силою Илииною исцелив водное естество, звери же погуби пожирающия, и Неемана очисти, и вдовича сына воскресил еси, и всем чтущим тя даруй благодать и исцеление.

Тропарь священномученику Еразму Охридскому

Тропарь, глас 4:
Преподобно житие твое прошед, мудре, светлым украсился еси хитоном священства. Проливая же кровь мученичества, Еразме, сподобился еси свыше мздов нелестных и, предстоя Троице, молишися о нас, воспевающих тя.

Тропарь преподобному Еразму Печерскому, в Ближних пещерах

Тропарь, глас 4:
Благолепие дому Господня любя, расточил еси нещадно имение твое во украшение того, преподобне Еразме, тем ныне живя в дому Господни на Небеси, моли и нам освятитися в жилище Господне.

Тропарь священномученику Ермогену, патриарху Московскому

Тропарь, глас 8:
Российския земли первопрестольниче, и неусыпный о ней к Богу молитвенниче! За веру Христову и паству твою душу свою положив, державу нашу утвердил еси и страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.

Тропарь, глас 4 (Прославление):
Приспе день светлаго торжества, град Москва радуется, и с ним Русь Православная ликовствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас, яко предстатель наш, великий Ермогене.

Кондак, глас 6:
Темницею и гладом изнуряем, даже до смерти верен пребыл еси, блаженне Ермогене, малодушие от сердец людей твоих изгоняя и на общий подвиг вся призывая. Темже и нечестивых мятеж низложил еси и державу нашу утвердил еси, да вси зовем ти: радуйся, заступниче Российския земли.

Тропарь священномученику Ермолаю, иерею Никомидийскому

Тропарь, глас 1:
Миром благодати помазан, преблаженне отче Ермолае иерей Бога Вышняго явился еси и благочестия светлый проповедник, мученик же твердый и безмездный врач притекающих к тебе. Слава Давшему тебе крепость, слава Венчавшему тя, слава Действующему тобою всем исцеления.

Тропарь священномученикам Ермолаю, Ермиппу и Ермократу, иереям Никомидийским

Тропарь, глас 8:
Троицы провозвестницы, троице мучеников честная, идольское нечестие обличившии и тьмочисленнаго врага сокрушившии, ныне, со Христом царствующе, молите, священный Ермолае со Ермиппом и Ермократом славным, яко да и наша враги победим и приимем от Царя всех, Бога, вечный живот и венец нетленный.

Тропарь преподобному Ефрему, архимандриту Новоторжскому, чудотворцу

Тропарь, глас 1:
Божественною свыше просветився благодатию, преподобне, многим терпением во временной жизни подвиг совершил еси. Темже источаеши чудес благодать всем с верою приходящим к раце мощей твоих, Ефреме преблаженне. Сего ради зовем: слава Давшему ти крепость, слава Венчавшему тя, слава Действующему тобою всем исцеления.

Тропарь преподобному Ефрему Перекомскому, Новгородскому чудотворцу

Тропарь, глас 4:
От юности твоея весь Богови поработился еси, блаженне: и Того ради любве отечество и род оставил еси, в пустыню вселився, в нейже жестокое житие показав, и чудес дарования от Бога приял еси, Ефреме преподобне: моли Христа Бога, да спасет души наша.

Тропарь преподобному Ефрему Печерскому, епископу Переяславскому

Тропарь, глас 8:
Духом горя путешествия к святым местом, странствовал еси в Греческую землю, святителю Ефреме, отнюдуже со многою пользою возвращался, устав святаго Студийскаго монастыря списав, аки некий многочестен дар, семо принесл еси, имже и днесь Церковь Российская управляема славит тебе, истиннаго о ней промысленника.

Тропарь святителю Ефрему, патриарху Сербскому

Тропарь, глас 8:
Патриархов великое удобрение, святителем красото, монахом правило, пустынником славу, милости подателя, разсуждения светильника, сошедшеся, вернии, восхвалим, кротости учителя, Божественнаго рачителя, премудраго архипастыря, великаго святителя и отца, Ефрема, Патриарха Сербскаго, звезду, темныя люди просвещающую и вся верным озаряющую. Темже, притекающе к раце мощей его, любовию целуем я и вопием: святе святый, непрестай молити Христа Бога спастися душам нашим.

Тропарь преподобному Ефрему Сирину

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Ефреме, преподобне отче наш. Моли Христа Бога спастися душам нашим.

Тропари святым женаммироносицам
(Неделя 3-я по Пасхе)

Тропари святым женам мироносицам, глас 2:
Егда снизшел еси к смерти, Животе Безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.
Слава: Благообразный Иосиф с древа снем Пречистое Твое Тело, плащаницею чистою обвив, и благоуханьми во гробе нове закрыв положи; но тридневен воскресл еси, Господи, подаяй мирови велию милость.
И ныне: Мироносицам женам при гробе представ ангел, вопияше: мира мертвым суть прилична, Христос же истления явися чуждь. Но возопийте: воскресе Господь, подаяй мирови велию милость.

Кондак, глас 2:
Радоватися мироносицам повелел еси, плачь праматере Евы утолил еси воскресением Твоим, Христе Боже, апостолом же Твоим проповедати повелел еси: Спас воскресе от гроба.

Тропарь Пресвятой Богородице перед Ея иконой, именуемой «Живоносный Источник»

Тропарь, глас 4:
Днесь притецем вернии к Божественному и цельбоносному образу Пресвятая Богородицы, излиявшия капли своих излияний, и людем верным чудесе показавшия, яже мы видяще и слышаще духовно празднуем и любезно вопием: исцели наши недуги и страсти, якоже и каркинския и тмочисленныя страсти исцелила еси; темже молим Тя Дево Пречистая, моли воплощеннаго из Тебе Христа Бога нашего спастися душа нашим.

Тропарь, глас 4:
Почерпем, человецы, цельбы душам и телом молитвою, Река бо всем предтечет — Пречистая Царица Богородица, источающи нам чудную воду и измывающи сердец черности, греховныя струпы очищающи, души же освящающи верных Божественною благодатию.

Тропарь Пресвятой Богородице перед Ея иконой, именуемой «Жировицкая»

Тропарь, глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставления испроси, помыслами благочестия сердца наша просвети и к Сыну Твоему молитву вознеси о спасении душ наших.

Величание:
Величаем Тя, Пресвятая Дево, и почитаем честную икону Твою, юже от лет древних во обители Жировицкой прославила еси.

Тропарь праведным Захарии и Елисавете, родителям святого Иоанна Предтечи

Тропарь первый святому пророку Захарии:
Священства одеждою обложен премудре, по закону Божию всесожжения приятна священнолепно приносил еси, Захарие, и был еси светильник и зритель тайных, знамения в тебе благодати нося явственно всемудре. И мечем убиен был в храме Божии, Христов пророче, с Предтечею моли спастися душам нашим.

Кондак:
Пророк днесь и священник Вышняго, Захариа предложи, Предтечев родитель, трапезу своея памяти, верныя питая, питие бо правды всем растворив, сего ради скончавается, яко Божественный таинник Божия благодати.

Тропарь второй:
Праведных твоих Захарии и Елисаветы, Господи, память празднующе теми молим Тя: спаси души наша.

Тропарь преподобному Захарии, постнику Печерскому, в Дальних пещерах

Тропарь, глас 3:
Постническаго ради твоего жития, блаженне Захарие, яко приемый велию на бесы крепость, моли и нам техже козней избыти, получити грехов прощение и велию милость.

Тропарь Зачатию праведной Анною Пресвятой Богородицы

Тропарь, глас 4:
Днесь безчадия узы разрешаются, Иоакима бо и Анну услышав, Бог паче надежды родити тем яве обещавает Богоотроковицу, из Неяже Сам родися Неописанный, Человек быв, Ангелом повелев вопити Ей: радуйся, Благодатная, Господь с Тобою.

Величание:
Величаем Тя, Пресвятая Дево, и чтим святых Твоих родителей и всеславное славим зачатие Твое.

Тропарь зачатию праведной Анною Пресвятой Богородицы

Тропарь, глас 4:
Днесь безчадия узы разрешаются, Иоакима бо и Анну услышав, Бог паче надежды родити тем яве обещаваст Богоотроковицу, из Неяже Сам родися Неописанный, Человек быв, Ангелом повелев вопити Ей: радуйся, Благодатная, Господь с Тобою.

Величание:
Величаем Тя, Пресвятая Дево, и чтим святых Твоих родителей и всеславное славим зачатие Твое.

Тропарь мученице Зинаиде

Тропарь, глас 4:
Агница Твоя, Иисусе Зинаидо зовет велиим гласом: Тебе, Женише мой, люблю, и Тебе ищущи страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе и умираю за Тя, да и живу с Тобою: но яко жертву непорочную приими мя с любовию пожершуюся Тебе. Тоя молитвами, яко Милостив, спаси души наша.

Кондак, глас 2:
Храм Твой всечестный, яко цельбу душевную обретше вси вернии, велегласно вопием ти дево мученице Зинаидо, Великоименитая! Христа Бога моли непрестанно о всех нас.

Величание, глас 8:
Величаем Тя святая мученице Зинаидо, и чтим честная страдания твоя, яже за Христа, претерпела еси.

Тропарь преподобному Зинону, постнику Печерскому, в Дальних пещерах

Тропарь, глас 4:
Преподобне отче Зиноне, преподобне и честне житие твое на земли препроводивый и тем Богови по премногу благоугодивый, моли о нас, чтущих память твою.

Тропарь Пресвятой Богородице перед Ея иконой, именуемой «Знамение» (Новгородская)

Тропарь, глас 4:
Яко необоримую стену и источник чудес стяжавше Тя раби Твои, Богородице Пречистая, сопротивных ополчения низлагаем; темже молим Тя: мир граду Твоему даруй и душам нашим велию милость.

Кондак, глас 4:
Честнаго образа Твоего знамение празднующе людие Твои, Богородительнице, имже дивную победу на сопротивных граду Твоему даровала еси; темже Тебе верою взываем: радуйся, Дево, христиан похвало.

Величание:
Величаем Тя, Пресвятая Дево, Богоизбранная Отроковице, и чтим образ Твой святый, имже дивную победу на сопротивныя граду Твоему даровала еси.

Тропарь Пресвятой Богородице перед Ея иконами, именуемыми «Знамение»

Тропарь, глас 4:
Яко необоримую стену и источник чудес стяжавше Тя раби Твои, Богородице пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Кондак, глас 4:
Честнаго образа Твоего знамение празднующе, людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Величание:
Величаем Тя, Пресвятая Дево, и чтим образ Твой честный, имже показала еси преславное знамение.

Тропарь 26-ти преподобномученикам Зографским

Тропарь, глас 1:
Тревеличайшия светильники, всех преподобномученик Богоизбранный полк, двадесять и шесть Божественныя обители Зографския отец, почтим, прелесть латинскую обличившия и насильственно во огни скончавшияся; Фому пастыреначальника, священнаго Варсонофия, достославнаго Парфения и прочия, подвизавшияся, сошедшеся, песньми почтим, сии бо Троицу Святую присно о нас умоляют.

Кондак, глас 8:
Иже обители нашея заступницы и хранителие, преподобнии отцы да похвалятся, лесть латинян отвергшия и, огнем сожженныя, скончавшияся и венчавшияся, ихже достойно воспоим, зовуще: радуйтеся преподобнии мученицы.

Тропарь преподобным Зосиме и Савватию Соловецким

Тропарь, глас 4:
Постническое и равноангельское житие ваше, преподобнии отцы Зосимо и Савватие, вселенней познаны сотвори вас: чудодеянии различными, богоноснии, просвещаете верою призывающия вы и чтущия честную память вашу.

Тропарь, глас 8 (Перенесение мощей):
Яко светильницы явитеся всесветлии, во отоце окияна моря, преподобнии отцы Зосимо и Савватие: вы бо крест Христов на рамо вземше, усердно Тому последовасте, и чистотою Богови приближившеся, отонудуже силами чудес обогатистеся. Тем и мы любезно притекаем к ракам честных мощей ваших и умильно глаголем: о преподобнии, молите Христа Бога, спастися душам нашим.

Кондак, глас 2:
Христовою любовию уязвившеся, преподобнии, и Того крест, на рамо вземши, понесли есте, Божественне вооружившеся на невидимы враги и непрестанныя молитвы, яко копие в руках, имуще, крепко победили есте бесовския ополчения; благодать Господню приемше целити недуги душ и телес притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобнии отцы Зосимо и Савватие, монахов удобрение.

Тропарь преподобному Зосиме, игумену Соловецкому

Тропарь, глас 4:
Изволением Божественнаго разума вселился еси в пустыню и тамо, вперив ум твой в Небесныя обители, равно Ангелом житие на земли пожив, в молитвах, и трудех, и пощениих образ был еси твоим учеником. Отонудуже Бог, видя твое благое изволение, умножи тебе чада в пустыни, слез твоих теченьми напаяемей. Но, яко имея дерзновение к Богу, поминай стадо, еже собрал еси, мудре, и не забуди, яко же обещался еси, посещая чад твоих, Зосимо преподобне, отче наш.

Тропарь преподобным Зосиме, Савватию и Герману Соловецким

Тропарь, глас 8:
Яко светильницы явистеся всесветлии во отоце окияна моря, преподобнии отцы наши Зосимо, Савватие и Германе, вы бо крест Христов на рамо вземше, усердно Тому последовасте и, чистотою Богови приближившеся, отунудуже силами чудес обогатистеся. Темже и мы любезно притекаем к ракам честных мощей ваших и умильно глаголем: о, преподобнии, молите Христа Бога спастися душам нашим.

Иные популярные молитвы:

Молитвы утренние читать ежедневно
Псалтырь. Кафисма. Псалом
О молитве: Что такое молитва, Сила молитвы, Молитва-встреча, Молитва-диалог
О молитве: О молитве Иисусовой, О даровании молитвы
О молитве: Какие молитвы нельзя читать мирянам, Какие молитвы должны читать миряне, Опасность привыкания, Как научиться припадать к Богу в молитве, О чем просить Бога в своих молитвах, Почему наши молитвы бывают неуслышаны
Каноны и молитвы для подготовки к Таинствам Исповеди и Святого Причастия
Молитвы в душевных недугах. Молитвы об исцелении душевных и духовных недугов
Молитвы об исцелении телесных недугов
Тропари Г-Д. Тропарь Пресвятой Богородице. Тропарь святым преподобным угодникам
Тропари О-П. Тропарь Пресвятой Богородице. Тропарь святым преподобным угодникам
Молитвы о совете и любви между мужем и женой
Молитвы перед началом обучения
Молитва святым, иные.
Молитва перед выходом из дома
Пяточисленные молитвы


... Добавить в "Закладки" ... Ctrl+D


Для пожертвований:

Пожертвование.

Да хранит Вас Господь!

Православные информеры для сайтов и блогов




Все молитвы ...