Молитвы святых угодников

С Новым годом и Рождеством!

Главная --> Молитвы --> Тропари

Тропари Г-Д.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. Г-Д.

Тропарь архангелу Гавриилу

Небесных воинств архистратиже, молим тя присно мы недостойнии, да твоими молитвами оградиши нас, кровом крил невещественныя твоея славы, сохраняя нас припадающих прилежно, и вопиющих, от бед избави нас, яко чиноначалъник вышних сил.

Тропарь преподобному Гавриилу Седмиезерскому

Тропарь, глас 4:
От юности, богомудре, просветився любовию Христовою, суетный и многомятежный мир оставил еси. Житие свое вверя предстательству Пречистыя Богородицы, слез потоки изливал еси пред честным Ея образом, и теченьми их седьм езер освятил еси. И терпения ради украси тя небесными дарами Христос Бог наш, в чудесех и ученицех славна показа земле Казанской.

Тропарь и кондак преподобному Гавриилу Афонскому

Тропарь, глас 6:
От суетнаго и многомятежнаго мира удалився, к немерцающему свету горы Афонския притекл еси, чистотою и говением, молитвами и трудом прославил еси Бога, храмы православныя во славу Трисвятаго имене Его воздвигл еси, преблаженне Гаврииле, мы же святых мощей твоих обретение празднующе, с верою и любовию взываем: моли Христа Бога, да сотворит нас победители греха и храмы Духа Святаго.

Кондак, глас 1:
Стяжал еси дух мирен в житии твоем, пожил еси желанием Божественным и любовию Господа твоего, Гаврииле преблаженне, от Него же венец приял еси, и Христу со ангелы предстоя, моли спастися нам.

Тропарь мученику младенцу Гавриилу Белостокскому

Тропарь, глас 5:
Святый младенче Гаврииле, ты за Прободеннаго нас ради от иудей люте от онехже в ребра прободен был еси и за Истощившаго кровь Свою за нас все тело твое на истощение крове в лютыя язвы предал еси, ныне же во славе вечней с Ним вселился еси. Тем помяни и нас, молим, зде чтущих память твою, прося нам здравие телеси и спасение душам нашим.

Величание:
Величаем тя, страстотерпче святый младенче Гаврииле, и чтем честная страдания твоя, яже за Христа претерпел еси.

Тропарь преподобному Галактиону Вологодскому

Тропарь, глас 5:
Днесь град Вологда тобою всемирне хвалится, возсиял бо еси пресветло яко солнце и чудесы твоими град и веси, преподобне Галактионе, озарил еси. И ныне молися Господеви избавитися душам нашим от прелести вражия спастися граду нашему от поганскаго и всех противных наития, и испроси у Христа Бога любовию чтущим тя прегрешений прощения и просящим твоея помощи от всякия скорби избавление, и вопиющим к тебе: Бог наш с нами, прославивый угодника Своего, яко же благоволи.

Тропарь мученикам Галактиону и Епистимии

Тропарь, глас 4:
Мученицы Твои, Господи, во страданиях своих венцы прияша нетленныя от Тебе, Бога нашего, имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.

Тропарь преподобному Геннадию, Костромскому и Любимоградскому (Любомирскому) чудотворцу

Тропарь, глас 4:
Яко пустыниолюбивая горлица, от суетнаго и многомятежнаго мира в пустыню удалився, чистотою и говением, молитвами и труждением прославил еси Бога в душе и телеси своем. И тако благочестно пожив, явился еси, преподобне, пустыни Любимоградския украшение, иноком честнаго жития образ и теплый молитвенник за всех, притекающих к раце твоей с верою.

Тропарь Геннадию, архиепископу Новгородскому

Тропарь, глас 5:
Уподобился еси древним отцем, святителю отче Геннадие, Священныя Книги собрав и еретики посрамив, ревность по Бозе показуя, паству оградил еси, моли и ныне Христа Бога мир Церкви даровати и спастися душам нашим.

Тропарь благоверному великому князю Георгию (Юрию) Всеволодовичу Владимирскому

Тропарь, глас 8:
На высоте великаго княжения седя, явился еси, благочестием и верою сияя отечеству своему, яко солнце; по Святей Троице ревностию разжегся и за веру крепко пострадав, кровь твою пролиял еси. Тем и отсеченная твоя за Христа глава свидетельствует яве о тебе, прилепшая по смерти к телеси твоему, с неюже и до днесь нетленны пребывают мощи твоя, от нихже источаеши исцеления душам и телесем нашим. Но яко дерзновение имея ко Христу, страстотерпче Георгие, непрестанно моли державу твою и сродник твоих безвредну сохранити молитвами твоими.

Тропарь мученику Георгию Новому, Софийскому

Тропарь, глас 4:
Божественным желанием от юнаго возраста весь сам себе Господеви возложив, в молитвах и постех образ быв добродетели, богатство же, и славу, и доброродство телесное, яко не сущее, презрев, и Христа единаго от души возлюбил еси, и Того, истиннаго суща Бога, в Троице покланяема, пред нечестивыми турки проповедал еси, и, срацынскую веру, и законы Моамефовы под ногами поправ и мучителя ужасив, мучения венцем украсився, славне, к Небесным востекл еси ликостоянием, премудре Георгие. Моли Христа Бога сохранити отечество твое и спасти люди и град, иже твоя подвиги присно почитающия.

Тропарь великомученику Георгию Победоносцу

Тропарь, глас 4:
Подвигом добрым подвизался еси, страстотерпче Христов Георгие, и веры ради обличил еси мучителей нечестие: жертва же благоприятна Богови принеслся еси. Темже и венец приял еси победы, и молитвами, святе, твоими, всем подаеши прегрешений прощение.

Ин тропарь, глас той же:
Яко пленных свободитель, и нищих защититель, немощствующих врач, царей поборниче, победоносче великомучениче Георгие, моли Христа Бога, спастися душам нашим.

Тропарь, глас 4 (На освящение церкви вмч. Георгия в Киеве):
Днесь блажат тя мира концы, Божественных чудес исполншеся, и земля радуется, напившися крове твоея. Христоименитии же людие града Киева освящением Божественнаго храма твоего радостию возвеселишася, страстотерпче Георгие, сосуде избранный Святаго Духа, угодниче Христов. Егоже моли с верою и мольбою приходящим во святый твой храм дати очищение грехов, умирити мир и спасти души наша.

Кондак, глас 4:
Возделан от Бога, показался еси благочестия делатель честнейший, добродетелей рукояти собрав себе: сеяв бо в слезах, веселием жнеши: страдальчествовав же кровию, Христа приял еси: и молитвами, святе, твоими, всем подаеши прегрешений прощение.

Тропарь Герасиму, епископу Великопермскому, Устьвымскому

Тропарь, глас 3:
Божественныя веры проповеданием землю Зырянскую озарил еси и ко Христу люди многия привел еси. Возопиет же с тобою и Авель ко Господу и Захариина кровь праведная, отче Герасиме, моли Христа Бога пастве твоей и всем, любовию память твою совершающим, даровати велию милость.

Тропарь преподобному Герасиму Вологодскому

Тропарь, глас 4:
Яко Безплотным единонравен и преподобным сообщник, преподобне Герасиме, един на Вологду пришел еси, прорицая ту быти граду великому и в нем святей церкви воздвигнутися и святителем водворитися. Темже и сподобился еси близ того погребен быти и по преставлении своем многими чудесы исцелений просил еси. Молися всегда о нас, яко да обрящем от Бога милость.

Тропарь святителям Герасиму, Питириму и Ионе, епископам Великопермским, Устьвымским

Тропарь, глас 8:
Равноапостольному святителю Стефану наследовавшии и Православия светом страну Зырянскую озарившии, святителие Христовы Герасиме, Питириме и Ионо, Престолу Пресвятыя Троицы ныне предстояще, молитеся пастве вашей от врагов ненаветованней быти и всем православным людем в мире спастися.

Тропарь преподобному Герману Аляскинскому

Тропарь, глас 7:
Звездо пресветлая Церкве Христовы, на севере просиявшая, вся к Царствию Небесному путеводящая, учителю и апостоле истинныя веры, предстателю и заступниче гонимых, украшение изящное Святыя Церкве во Америце, преподобне отче Германе Аляскинский, молися ко Господу Спасу нашему, спастися душам нашим.

Кондак, глас 3:
Свет вечный Христа Спаса нашего тя на путь евангельский во Америку настави, возвестити весть о мире евангельскую. Днесь Престолу Славы предстоя, молися о стране твоей и людех ея, о мире всего мира и спасении душ наших.

Тропари святителю Герману, архиепископу Казанскому и Свияжскому

Тропарь, глас 4:
От юности иго Христово усердно восприим, бденными подвиги поста и молитвы прославился еси, отонудуже призывающу тя Богу на служение Церкви в новопросвещеннем царстве Казанстем, вкупе со святителем Гурием воззван был еси; идеже, яко первоначальник созданной тобою во граде Свияжске обители, и достойный первосвятителю преемник явился еси. Почивая убо нетленными мощами во обители твоей, а духом предстоя престолу Владычню, молися, святителю Германе, со святителем Гурием, обители твоей во святыни, православней же пастве во благочестии преспевати, и тьме иноверия светом веры разгнатися.

Тропарь второй:
Яко великим пастырем единонравна и учителем вселенныя единомысленна, Церкве Божия служителя усердна и строителя тайн Христовых благоговейна, стекшеся благовернии людие, Свияжския обители богомудраго основателя и Казанския новопросвещенныя паствы святителя Германа песньми и пении восхвалим, глаголюще: не престай присещати молитвами твоими на обитель и на всю паству твою, и обитель во святыня, паству же в вере и благочестии блюсти невредим.

Тропарь преподобному Герману, Соловецкому чудотворцу

Тропарь, глас 8:
Желанием духовным от юности распаляем, преподобне Германе, Христу тесным жития путем последовал еси, и в морский пустынный остров, аки в тихое пристанище, вселився, в нем многая лета постнически пожил еси, идеже блаженным отцем Зосиме и Савватию сожитель был еси: с ннмиже моли Христа Бога о нас, любовию чтущих память твою.

Кондак, глас 4:
Вышних желая, вся долу влекущая возненавидел еси и, отечество свое оставль, в поморие пустынное отшел еси, таже в морский остров удалився, в нем многа лета Господеви поработал еси. Темже, память твою празднующе, любовию вопием ти: радуйся, Германе Богомудре, отче наш.

Тропарь преподобным Геронию и Леонтию, канонархам Печерским, в Дальних пещерах

Тропарь, глас 3:
Двоице святая, правилоначальная, бывшая в церкви и в правиле иночестем возсиявшая светло, всечестнии канонарси, молите Христа Бога, да прегрешений оставление подаст душам нашим.

Тропарь святителю Геронтию, митрополиту Московскому и всея Руси

Тропарь, глас 6:
Днесь душа всяка веселится на память успения святителя Христова Геронтия, премудрости ревнителя и кротости учителя, смирению наказателя, учением Божественных словес верныя насладившаго. Русскаго митрополита похвалим, святительства паству приимшаго, украсившаго Церковь Христову. Тем и Христос видя твое благопроизволение, причте тя в лик праведных, святителю Геронтие, моли Христа Бога и Пречистую Богородицу непрестанно о всех нас.

Кондак, глас 2:
Божиим Духом иночество вожделе и восприя Духа Святаго благодатию, и святительства сана сподобился еси, содержаще престол Русския Митрополии, и бысть пастырь и учитель от рода русскаго, пасый стадо Христово словесных овец, и обрете благодать от Господа, Геронтие святителю, Емуже всегда о нас непрестанно молися, спастися душам нашим.

Тропарь преподобному Геронтию, канонарху Печерскому, в Дальних пещерах

Тропарь, глас 3:
Всечестный канонарше Геронтие, правилоначальный бывый в церкви и в правиле иночестем возсиявший светло, моли Христа Бога, да прегрешений оставление подаст душам нашим.

Тропарь благоверному князю Глебу Владимирскому

Тропарь, глас 4:
Днесь светло красуется славнейший град Владимир, имея в себе пребогатое сокровище — чудоточащия честныя мощи благовернаго князя Глеба, имиже украшался и хваляся, вселенную всю созывает к веселию и велегласно вопиет: о Владыко Христе, даровавый таковую благодать угоднику Твоему, его молитвами помилуй нас.

Тропарь благоверному князю Глебу Всеволодовичу Городенскому (иже в Киеве)

Тропарь, глас 2:
В постничестве от юности добре подвизався, Богомудре, ум на враги мужески вооружив, оружием крестным сих победил еси, твердомудростная повлача, в душу вложи свою. Темже похваляем тя, княже наш Глебе, яко постником ты еси удобрение, Киеву — слава и всей Русстей земли — утверждение.

Тропарь благоверному князю Глебу, во святом крещении Давиду

Тропарь, глас 4:
Мученик Твой, Господи, спасшеся веры ради, княже Глебе, труждающимся быстрый помощник и ненадежным надежа. Ты бо болезни врачуеши притекающим к тебе с верою. Темже и мы верою молимся от бед избави нас, чтущим любовию память твою.

Тропарь святой праведной Гликерие, деве Новгородской

Тропарь, глас 8:
Вышния красоты желающе, нижния сласти телесныя далече от себе отринула еси, и нестяжание паче суетнаго мира возлюбивши, ангельское житие провождала еси, Гликерие, дево блаженная, моля Христа Бога спастися душам нашим.

Кондак, глас 3:
Веселися, Великий Новград, великое сокровище стяжав, мощи твои, святая праведная дево Гликерие, благодать исцелений подающии всем с верою и любовию приходящим к ним. И ныне предстоя с ликом святых жен русских пред Престолом Святой Троицы, молися оставление грехов даровати чтущим святую память твою.

Величание:
Величаем тя, святая праведная дево Гликерие, и чтим святую память твою, ты бо молиши за ны Христа Бога нашего.

Тропарь Пресвятой Богородице перед Ея иконой, именуемой «Гребневская»

Тропарь, глас 8:
Днесь, яко солнце пресветло, просия в Российстей стране, в конце ея полуденнем, всечестная икона Твоя, Владычице, юже благоверный великий князь Димитрий в град Москву принесе. Светло празднуем, благовернии людие, честнаго образа пришествие, молящеся прилежно: Владычице Богородице, молися Сыну Твоему, Христу Богу нашему, избавити град Москву, страну нашу и вся православныя христианы от варварскаго пленения, и междоусобныя брани, и всех навет вражиих, Тебе бо Едину Заступницу имамы.

Тропарь священномученику Григорию V, патриарху Константинопольскому

Тропарь, глас 7:
Святителю и мучениче Григорие, за люди твоя душу положивый и в светоносный день Христова Воскресения пострадавый, молися Страдавшему за ны и Воскресшему Церковь Православную незыблему всегда хранити, пастве же твоей и Русстей земле, святыя мощи твоя с любовию лета многа хранившей, даровати мир и велию милость.

Тропарь святителю Григорию Богослову

Тропарь, глас 1:
Пастырская свирель богословия твоего риторов победи трубы, якоже бо глубины духа изыскавшу, и доброты вещания приложишася тебе. Но моли Христа Бога, отче Григорие, спастися душам нашим.

Кондак, глас 3:
Богословным языком твоим сплетения риторская разрушивый, славне, Православия одеждею свыше истканною Церковь украсил еси, юже и носящи, с нами зовет твоими чады: радуйся, отче, богословия уме крайнейший.

Тропарь преподобному Григорию Пельшемскому, Вологодскому чудотворцу

Тропарь, глас 8:
Любовию Христовою, богомудре, просветився, добродетельми облистал еси: и всякое наслаждение плотское возненавидев, и в пустыню вселився, в нейже вельми подвизался еси в жизни сей временней в пениих и во бдениих, и в пощениих. Сего ради и Христос даром чудес обогати тя: но поминай нас чтущих пресветлую память твою, преподобне отче Григорие, и моли Христа Бога, спастися душам нашим.

Тропарь святителю Григорию Двоеслову, папе Римскому

Тропарь, глас 4:
Иже от Бога свыше Божественную благодать восприем, славне Григорие, и Того силою укрепляемь, евангельски шествовати изволил еси. Отонудуже у Христа возмездие трудов приял еси, всеблаженне, Егоже моли, да спасет души наша.

Тропарь преподобному Григорию и Кассиану Авнежским

Тропарь, глас 8:
Православия наставницы, благочестия и чистоты учителие, Церкви Вологодстей богодарованное украшение, преподобнии отцы наши Григорие и Кассиане, молите Милостиваго Бога, да вашим предстательством подаст благодать и мир стране нашей и душам нашим спасение.

Тропарь святителю Григорию Чудотворцу, епископу Неокесарийскому

Тропарь, глас 8:
В молитвах бодрствуя, чудес деланьми претерпевая, тезоимение стяжал еси исправления; но молися Христу Богу, отче Григорие, просветити души наша, да не когда уснем в смерть.

Тропарь святителю Григорию Паламе, архиепископу Фессалонитскому

Тропарь, глас 8:
Православию наставниче, святителем украшение, Богословцем поборниче непобедимый, Григорие чудотворче, Солуню великая похвало, проповедниче благодати, моли Христа Бога спастися душам нашим.

Кондак, глас 4:
Ныне время деятельное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго, но ослаби, Содетелю всех, яко да приимем нетленныя венцы.

Тропарь преподобному Григорию, чудотворцу Печерскому, в Ближних пещерах

Тропарь, глас 3:
Великих дарований приемниче и великих чудес силою Божиею творителю, пречудне отче Григорие, яко велие дерзновение имея ко Христу Богу, непрестанно о нас молися Ему, да грехов оставление подаст душам нашим.

Тропарь преподобному Григорию, затворнику Печерскому, в Дальних пещерах

Тропарь, глас 1:
Пещерный житель и в телеси Ангел и чудотворец явился еси, Богоносне отче наш Григорие, постом, бдением, молитвою Небесная дарования приим, исцеляеши недужныя и души верою приходящих ти. Слава Давшему ти крепость, слава Венчавшему тя, слава Действующему тобою всем исцеления.

Тропарь преподобному Григорию, священноиноку

Тропарь, глас 4:
Божественную ти раку обстояще, премудре, зовем ти, преподобне: ко Владыце всех и Зиждителю молися избавити нас от бед, иже верою и любовию тебе душами и сердцы воспевающе достойно: слава ти, преподобне всеблаженне Григорие.

Тропарь к пресвятой Богородице перед Ея иконой, именуемой «Грузинская»

Тропарь, глас 4:
От святая иконы Твоея, о Владычице Богородице, спасение и цельбы подаются обильно всем с верою и любовию приходящым. Еюже и мою немощь посети, и душу мою помилуй, Благая, и тело мое изцели благодатию Твоею, Пречистая. Аминь.

Ин тропарь, глас 4:
Днесь светло красуется Раифская пустынь, яко зарю солнечную, от востока возсиявшую, восприимше, Владычице, чудотворную Твою икону: еюже разгоняеши мглу искушений и бед от вопиющих верно: избави обитель нашу и вся страны христианския от всех навет вражиих и спаси души наша, яко милосердная Заступница рода христианскаго. Аминь.

Кондак, глас 7:
Тебе, избранной от всех родов, Божией Матери благодарственная пения приносим, пришествием честные Твоея иконе раби Твои, Богородице, озаряеми, но яко имущая державу непобедимую, от всяких нас бед свободи да зовем Ти: Радуйся, Невесто Неневестная.

Тропарь святителям Гурию, архиепископу Казанскому и Варсонофию, епископу Тверскому (Обретение мощей)

Тропарь, глас 3:
Первии учителие прежде темному, ныне же светлому и новопросвещенному граду Казани, первии возвестителие пути спасительнаго, истиннии хранителие апостольских преданий, столпи непоколебимии, благочестия учителие и Православия наставницы, Гурие и Варсонофие, Владыку всех молите мир вселенней даровати и душам нашим велию милость.

Тропари святителю Гурию, архиепископу Казанскому

Тропарь, глас 4:
Правило веры и образ целомудрия, учителя добрых дел и наставника спасения даде тя Господь новопросвещенному граду Казани, в немже приобрел еси новыя от язык люди и привел еси я Христови. Сего ради в память твою радостно сошедшеся, честне празднуем святое твое успение, ты же, отче наш, святителю Христов Гурие, моли Христа Бога спастися душам нашим.

Тропарь, глас 4 (Перенесение мощей):
Яко крин благовонный, мироточивыя твоя мощи от вертограда Церкве Спасовы в вертоград Церкве Богородичны честне принесошася, святителю Гурие, яко же бо дар честен, тя даровав Христос Пречистей Матери Своей, и исполнися храм Ея святый благоухания твоего, и возрадовася архиерейский престол, приемый тя, первоседателя своего. Возвеселися же собор верных со святителем и священноначальники о преславном цельбоносных твоих мощей пренесении, еже мы радостно празднующе, молим тя, угодниче Божий: моли Христа Бога подати душам нашим мир и велию милость.

Тропарь мученикам Гурию, Самону и Авиву, исповедникам

Тропарь, глас 5:
Чудеса святых Твоих мученик стену необориму, нам даровавый, Христе Боже, тех молитвами советы языков разори, Церковь святую укрепи, яко един Благ и Человеколюбец.

Тропарь пророку Давиду, Псалмопевцу

Тропарь, глас 2:
Пророка твоего Давида память, Господи, празднующе, тем Тя молим: спаси души наша.

Тропарь преподобным Дамиану пресвитеру, целебнику, Иеремии и Матфею прозорливым, Печерским, в Ближних пещерах

Тропарь, глас 1:
Христовых повелений светом сердца своя просветивше, страстный мрак прогнасте, те Троицы селение бысте тричисленнии отцы, Дамиане, Иеремие с Матфеем, от Неяже благодать приемше, недужныя исцеляете, будущая возвещаете и, Ангелом сопричастницы суще, молитеся Христу Богу даровати нам причастие святых.

Тропарь благоверному князю Даниилу Московскому

Тропарь, глас 3:
Явился еси в стране нашей, яко звезда пресветлая, благоверный княже Данииле, лучами света твоего озаряя град твой и обитель твою людем православным поборник еси, пленным свободитель и нищим защититель, моли Христа Бога державе Российстей даровати мир и спасти души наша.

Кондак, глас 6:
Еже по образу соблюд непреложно, и яже в мире тленная оставив, со ангельскими лики предстоиши Христу, преподобне княже Данииле, никакоже забывая чад твоих, но милостивно посещая и глаголя им: аз есмь с вами и никтоже на вы.

Тропарь преподобному Даниилу Переяславскому

Тропарь, глас 3:
От юности, блаженне, всего себе Господеви возложив, выну повинуяся Богу, противяся же диаволу, страсти греховныя победил еси. Там сам храм Божий быв, и обитель красну во славу Пресвятыя Троицы воздвигнув, и собранное тобою в ней стадо Христово богоугодно упас, преставился еси к вечным обителем, отче Данииле. Моли триипостаснаго во едином существе Бога, спастися душам нашим.

Тропарь пророку Даниилу и трем отрокам: Анании, Азарии и Мисаилу

Тропарь, глас 2:
Велия веры исправления, во источнице пламене, яко на воде упокоения, святии трие отроцы радовахуся, и пророк Даниил львом пастырь яко овцам являшеся. Тех молитвами, Христе Боже, спаси души наша.

Тропарь святителю Даниилу, архиепископу Сербскому

Тропарь, глас 3:
Чудо явися извещения, делами добродетелей Божиих возсиял еси, монашествующих лики упасл еси, архиерейская седалища утвердил еси, еретическаго нападения не усумневся, Церковию Христовою управляя, преподобне отче, Данииле премудре, умер, яко спя, тело же твое цело и нетленно соблюдено бысть, и подает цельбы болящим от различных недугов, и демоны прогоняет. Сего ради молим тя: моли спастися душам нашим.

Тропарь преподобному Даниилу Столпнику

Тропарь, глас 1:
Терпения столп был еси, ревновавый праотцем, преподобне, Иову во страстех, Иосифу во искушениих, и Безплотных жительству сый в телеси, Данииле, отче наш, моли Христа Бога спастися душам нашим.

Тропарь девяти мученикам, иже в Кизице: Феонию (Феогниду), Руфу, Антипатру, Феостиху, Артеме, Магну, Феодоту, Фавмасию и Филимону

Тропарь, глас 8:
Святии девяточисленнии мученицы, от различных градов во един лик, манием Божественным, мужественно за Христа пострадасте, совокупившеся невидимаго врага победисте, зловерныя князи и мучители посрамисте вашим терпением, огнем же любве Божия разжигаеми, вещественно вас огнь мучащий в хлад преложисте; темже, дадеся вам от Христа Бога благодать трясавичную исцеляти болезнь, от неяже и многовидных страстей милостиво спасайте и нас предстательством вашим молимся.

Тропарь Пресвятой Богородице перед Ея иконой, именуемой «Державная»

Тропарь, глас 8:
Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей «Державней», и светозарный луч славы чудес Твоих да нисходит от Нея на всех с верою Тебе молящихся и вопиющих Богу. Аллилуиа.

Тропарь, глас 4:
Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

Величание:
Величаем Тя, Пресвятая Дево, Богоизбранная Отроковице, и чтим Державный образ святыни Твоея, имже подаеши велию милость всем, с верою к нему притекающим.

Тропарь преподобному Дию Константинопольскому

Тропарь, глас 1:
Пустынный житель, и в телеси Ангел, и чудотворец явился еси, Богоносе отче наш Дие: постом, бдением, молитвою Небесная дарования приим, исцеляеши недужныя и души верою притекающих ти. Слава Давшему ти крепость, слава Венчавшему тя, слава Действующему тобою всем исцеления.

Тропарь святому благоверному великому князю Московскому Димитрию Донскому

Тропарь, глас 3:
Велика обрете в бедах тя поборника земля Русская, языки побеждающа. Якоже на Доне Мамаеву низложил еси гордыню, на подвиг сей прияв благословение преподобнаго Сергия, тако, княже Димитрие, Христу Богу молися, даровати нам велию милость.

Кондак, глас 2:
Подвиги твоими, святе Димитрие, страну нашу Бог сохрани, Давый тебе непобедимую. И ныне, предстателю крепкий, соблюдай молитвами святыми град твой Москву невредим от всех навет вражиих.

Тропарь преподобному Димитрию Прилуцкому, Вологодскому

Тропарь, глас 1:
Свыше от Бога, преподобне, благодать приял еси духовную, и от Него убо познался еси, блаженне, того ради и ты духом познал еси лучшая Его, будущаго века пребывание, и постнически испытався во своих обителех. И ныне со ангели ликовствуя, Спасу всех за ны молися, святе Димитрие, да вси вопием: Слава Давшему ти крепость, слава Венчавшему тя, слава Действующему тобою всем исцеления.

Тропарь, глас 4 (Сретение образа преподобного Димитрия):
Возсия днесь, яко солнце, пречестный образ священнолепнаго твоего подобия, паче солнца лучами чудес твоих всех озаряя, тьму бесовскую без вести творя, егоже радостно сретаху, духовныя лики составльше, непрестанно вопием ти: Димитрие, отче наш, моли Спаса всех сохранити град твой и страну нашу, стаду твоему спасение подавая и велию милость.

Тропарь святителям Димитрию, митрополиту Ростовскому, Митрофану и Тихону, епископам Воронежским

Тропарь, глас 8:
Яко же древле на Востоцех трие велицыи святителие, сильный словом Василий, глубина Богословия Григорий и Златоустый Иоанн, тако и днесь в стране полунощней три новоявленная светила веры на тверди церковной востекоша: столп веры Митрофан, слово истины в лице царю исповедавый, и обличитель раскола Димитрий, мечем обоюду острым вся козни его рассекий, и помазания полный сосуд Тихон, тихостию словес своих грешника к покаянию призвавый. О велицыи трие святителие земли Российския, молите Христа Бога, Емуже угодни бысте, спастися душам нашим.

Тропарь великомученику Димитрию Солунскому

Тропарь, глас 3:
Велика обрете в бедах тя поборника вселенныя, страстотерпче, языки побеждающа. Якоже убо Лиеву низложил еси гордыню, на подвиг дерзновенна сотворив Нестора: тако святе Димитрие, Христу Богу молися, даровати нам велию милость.

Тропарь святителю Димитрию Ростовскому

Тропарь, глас 8:
Православия ревнителю и раскола искоренителю, Российский целебниче и новый к Богу молитвенниче, списаньми твоими буих уцеломудрил еси, цевнице духовная, Димитрие блаженне, моли Христа Бога, спастися душам нашим.

Кондак, глас 8:
Звезду Российскую, от Киева возсиявшую и чрез Новград Северский в Ростов достигшую, всю же страну сию ученьми и чудесы озарившую, ублажим златословеснаго учителя Димитрия, той бо всем вся написа, яже к наставлению, да всех приобрящет, якоже Павел Христу, и спасет правоверием души наша.

Тропарь благоверному царевичу Димитрию Угличскому и Московскому

Тропарь, глас 1:
Всеоружеством Духа благодати вооружен быв и необорим столп и утверждение отечеству своему показася, яко агнец незлобивый, от врага неправедно заклан быв и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевичу княже Димитрие. Слава Восприимшему тя от земных в Небесная, слава Венчавшему тя венцем неувядаемым, слава Действующему тобою всем исцеление.

Тропарь, глас 4:
Царскую диадиму обагрил еси кровию твоею, богомудре мучениче, за скиптр крест в руки приим, явился еси победоносец, в жертву непорочну Владыце принесл еси себе, яко бо агнец незлоблив от раба заколен еси, и ныне радуяся предстоиши Святей Троице. Молися о державе сродников твоих богоугодней быти и сыновом Российским спастися.

Тропарь, глас 8 (Перенесение мощей):
Днесь вельми хвалится царствующий град Москва, имея в себе праведныя твоя мощи, благоверне царевиче Димитрие, яко цвети благоуханныи, пребываеми во святем храме, просвещение подают душам и телом нашим. Тем радостно тя восхваляем, и честное пренесение мощей твоих верно почитаем, и молим тя: моли Христа Бога даровати нам велию милость.

Тропарь преподобному Диодору Юрьегорскому

Тропарь, глас 2:
Желанием духа распалився, мятеж мирский отринув, ко Единому Богу любовию прилепися и Того вседушне взыскуя, во внутреннюю пустыню отыде, при водах вселися, идеже в слезах и трудех пребывая многолетное время, в терпении мнозе житие Ангельское проходил еси в наставлении Божественнаго разума, стадо инок собра мудре, ихже посещая, не остави, Диодоре преподобне, отче наш, Пресвятей Троице моляся от зол всяческих избавити и спасти души наша.

Тропарь мученику Диомиду, врачу

Тропарь, глас 3:
Мучительнии сосуди устроиша ти путь к Небесем, Христов воине Диомиде, победив диавольския козни, и на Небесех у Христа прославися, молися за творящих верою память твою.

Тропарь священномученику Дионисию Ареопагиту, епископу Афинскому

Тропарь, глас 4:
Благости научився и трезвяся во всех, благою совестию священнолепно оболкся, почерпл еси от сосуда избраннаго неизреченная и, веру соблюд, равное течение совершил еси, священномучениче Дионисие, моли Христа Бога спастися душам нашим.

Тропарь преподобному Дионисию, игумену Глушицкому

Тропарь, глас 1:
Божественною любовию от юности распалаемь, Дионисие преподобне, вся, яже в мире красная, возненавидев, Христа единаго возлюбил еси и сего ради во внутреннюю пустыню вселился еси, со зверьми живый, весь Христови. Отонудуже и Всевидящее Око, твоя труды видев, даром чудес и по преставлении обогатил тя есть. Темже вопием ти: моли непрестанно о всех нас, честную память твою присно в песнех почитающих.

Тропарь преподобному Дионисию и Амфилохию Глушицким

Тропарь, глас 8:
Светильницы светлии явльшеся доброту земную мудренно оставльше и идоша во внутреннюю пустыню, купно с Дионисием Амфилохие, смирение и всю добродетель извыкоша и обретоша безсмертие, постом, и бдением, и прочим воздержанием себе принося Христу, и ныне на Небесех Престолу Христову предстоя, молитеся, отцы Богомудрии, Дионисие и Амфилохие, умирити мир и спастися душам поющих вас, согрешением оставление даровати, чтущим всечестную память вашу.

Тропарь преподобному Дионисию, затворнику Печерскому, в Дальних пещерах

Тропарь, глас 4:
Жертву Безкровную приносивый Господеви непорочне и служивый Ему по званию своему многое время неленостне, священне Дионисие, молися о нас, любовию чтущих тя.

Тропарь преподобному Дионисию Радонежскому

Тропарь, глас 3:
Земная, прельщающая очеса миролюбцев, возненавидел еси, отче Богоносне Дионисие, за уметы та вменив, шествуя путем скорбным, и в терпении добр воин Христов явился еси, победив страсти мира, был еси до кончины непоколебимый благочестия поборник. Темже мы днесь, совершая священную память твою, духовными тя песньми ублажаем и смиренно молим, да, предстоя Престолу Господа Бога, ходатайствуеши о спасении душ наших.

Тропарь Дионисию, архиепископу Суздальскому

Тропарь, глас 8:
Православия ревнителю, благочестия наставниче, ищущим спасения добрый кормчий, монашествующих Богодухновенное украшение, Богоноснаго Евфимия собеседниче, святителю Дионисие, ученьми и добродетельми отечество твое просветил еси, не забуди нас, чтущих тя, но в мире управи живот наш.

Тропарь Дионисию, епископу Полоцкому

Тропарь, глас 4:
Правило веры, и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Дионисие, моли Христа Бога спастися душам нашим.

Тропарь благоверному князю Довмонту, во святом Крещении Тимофею, Псковскому

Тропарь, глас 8:
Иже отчее нечестие возненавидев, преблаженне княже Довмонте, и нощи страстныя избег, еже к идолом тщание, прииде мыслию к Солнцу славы — Христу, озарився благодатию Божественнаго Крещения, и ныне во свете Пресвятыя Троицы предстоя, моли Христа Бога сохранити и спасти православныя люди и град твой от безбожных агарян, и латин нашествия, и междоусобныя брани и спастися душам нашим.

Тропарь преподобномученику Дометию Персянину

Тропарь, глас 4:
Постнически преподвизався на горе, умная врагов ополчения всеоружием Креста погубил еси, всеблаженне. Паки же ко страдальчеству мужески облеклся еси, убив Копронима мечем веры, и обоих ради венчался еси от Бога, преподобномучениче Дометие приснопамятне.

Тропарь святителю Донату, епископу Еврии

Тропарь, глас 4:
Блажен делатель и украситель Церкве Христовы, отче Донате, был еси, непрестанно попечение о стаде твоем стяжав, научая и руководя оно в любви Сына Божия, не токмо бо в твоем граде многий народ, но в Константинополе самодержца и в нем вся люди удивил еси православными чудесы твоими. Богоугодныя убо мольбы сотворяя ко Христу Богу, помощник скор всем явися, предстоя Всесвятей Троице, в Вышних моли Ю о всех нас, да спасет души наша.

Тропарь священномученику Дорофею, епископу Тирскому

Тропарь, глас 5:
Нищелюбием обогатився и милость воздержания источив, наслаждения Царствия Небеснаго сподобися, страдальчески беды приим по стаде своем, и апостолом обретеся ссельник, отче священномучениче Дорофее, моли Христа Бога спастися душам нашим.

Тропарь преподобному Досифею Верхнеостровскому, Псковскому

Тропарь, глас 4:
Яко светильник всесветел явился еси во острове Псковскаго езера, преподобне отче наш Досифее. Ты бо крест Христов от юности своея на рамо взем, усердно Тому последовал еси, чистотою Богови приближився, отонудуже и чудес дарованием обогатился еси. Темже и мы, притекающе ко святей иконе твоей, умильно глаголем: отче преподобне, моли Христа Бога спастися душам нашим.

Тропарь Пресвятой Богородице перед Ея иконой, именуемой «Достойно есть» («Милующая»)

Тропарь, глас 4:
Притецем, вернии, со дерзновением к Милующей Царице Богородице и умиленно воззовем к Ней: низпосли на ны милости Твоя богатыя: град сей избави от всякаго обстояния, мир даруй мирови и спасение душам нашим.



... Добавить в "Закладки" ... Ctrl+D


Для пожертвований:

Пожертвование.

Да хранит Вас Господь!

Православные информеры для сайтов и блогов




Все молитвы ...