Молитвы святых угодников

С Новым годом и Рождеством!

Главная --> Молитвы --> Тропари

Тропари А.

Тропари: А, Б - В, Г - Д, Е - З, И - К, Л - Н, О-П, Р-Я.

Тропари: Пресвятой Богородице, иконам Божией Матери, святым преподобным угодникам. А.

Тропарь праведному Аарону, первосвященнику

Тропарь, глас 3:
Стеблю Левиина корене, приимый чин древняго Мафусаила, он бо отча ради к Богу вознесения, ты же братня ради с Богом беседования, первосвященный во Израили молебниче о всех, умоли Бога купно с братом своим боговидцем, да избавимся от всякия скорби.

Тропарь мученикам Авкту и Тавриону

Тропарь, глас 4:
Таврион славный и Авкт дивный, огневи противистася и всем инем казнем, молитвами возмогающа; та убо молением сердца похваляюще, верою пресвятую и честную память ею совершим, душам просвещение почерпающа.

Тропарь мученику Аврамию Болгарскому

Тропарь, глас 4:
Днесь, благовернии людие, сошедшеся, восхвалим добляго сего мученика и страдальца Аврамия: сей бо укрепляем силою Божиею душу свою положи за Христа, много пострадав от зловерных болгар. Сего ради от Господа венец прият, и ныне предстоит Ему и молится о граде сем и о всех нас, чтущих память его.

Тропарь преподобному Аврамию Галичскому, Городецкому, Чухломскому чудотворцу

Тропарь, глас 4:
От мирскаго мятежа изшед, в тихое пристанище, преподобнаго Сергия обитель, притекл еси, и тамо равноангельское житие пожив, во страну Галичскую пришел еси, идеже, веру Христову насаждая и новокрещенныя люди от суеверий поганских очищая, многи и велики подвиги подъял еси, и обители четыре создав, иноков лики добре упасл еси и ко Христу Спасу привел еси; Егоже моли, преподобне отче Аврамие, спасти души наша.

Тропарь преподобному Аврамию, затворнику Печерскому, в Ближних пещерах

Тропарь, глас 2:
Велия веры исправления, в пещернем затворе, яко на воде упокоения, преподобне отче Авраамие, радовался еси, огнем бо любве Божественным распалаемь, бдением и молитвою безстрастия достигл еси и явился еси равноангельный на земли, того молитвами, Христе Боже, спаси души наша.

Тропарь преподобному Аврамию, архимандриту Ростовскому

Тропарь, глас 1:
Просветився Божественною благодатию, неверныя люди наставил еси к свету Богоразумия: и по смерти сияя светлостию жития твоего, источаеши исцеления притекающим с верою к тебе, Аврамие отче наш, Христа Бога моли даровати нам велию милость.

Тропарь преподобному Аврамию Смоленскому

Тропарь, глас 8:
Днесь возсия нам память твоя, славне, яко солнце, светозарно лучами озаряющая мир и тьму нощи злых духов от нас отгоняющая. Днесь Небесныя силы святых Ангел и души праведных мысленно торжествуют, радующеся. Днесь и мы, грешнии, припадающе, молимся: отче преподобне Аврамие, Христа Бога моли непрестанно спасти град и люди, любезно тебе почитающия.

Тропарь преподобному Агапиту Печерскому, врачу безмездному

Тропарь, глас 5:
Богоноснаго Антония ревнуя, смиренномудрию, аки неким врачевством зелием снедным исцелял еси болящия, преподобне Агапите, тем и врача неверна уверив, наставил еси на путь спасения. Уврачуй и наша болезни и молися Господеви о воспевающих тя.

Кондак, глас 6:
Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси у Бога продолжение живота и, сим чудом того уверив, привел еси Христови. Емуже в веселии предстоя, молися о нас, преподобне.

Тропарь мученице Агафии

Тропарь, глас 4:
Агница Твоя, Иисусе, Агафие, зовет велием гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную, приимя мя, с любовию пожершуюся Тебе. Твоя молитвами, яко Милостив, спаси души наша.

Кондак, глас 4:
Да украсится днесь Церковь порфирою славною, омоченою от чистых кровей Агафии мученицы вопиющи: радуйся, Катанская похвало.

Тропарь преподобному Агафону Печерскому, в Дальних пещерах

Тропарь, глас 8:
Блага Небесная ради дел твоих стяжавый, благости тезоимените, Агафоне, моли Благаго Господа, молим тя тепле, яко да не лишит нас вечных благ Своих.

Тропарь мученикам Адриану и Наталии

Тропарь, глас 4:
Мученицы Твои, Господи, во страданиих своих венцы прията нетленныя от Тебе, Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.

Тропарь мученику Адриану

Тропарь, глас 3:
Богатство неиждивущее вменил еси веру спасенную, треблаженне, оставль отеческое нечестие и Владыки стопами шествуя, Божественными даровании обогатился еси, Адриане славне; Христа Бога моли спастися душам нашим.

Тропарь преподобномученику Адриану Пошехонскому, Ярославскому

Тропарь, глас 4:
Христову мученику Адриану тезоименит был еси, преподобне, многия труды подъял еси в жизни временней, обитель иноческую созидая в пустыни, идеже пострадал еси даже до крове от злых разбойник и мученическую смерть от них приял еси, Адриане славне, чудес благодатию обогатився, предстоиши всех Царю, Христу Богу, Егоже моли спастися душам нашим.

Тропарь преподобномученикам Александру (Пересвету) и Андрею (Ослябе), Радонежским

Тропарь, глас 1:
Воини Христолюбивии страдальцы послушания прехвальнии Александре дивный Пересвете и Андрее Ослябей именуемый Сергия игумена благодатные наследницы, Куликовской брани ратницы духовнии вы бо змия агарянскаго победисте. Но и нас своим заступлением не остависте, телами в храме Рождества Богородицы почиваете, душею в превышнем селении пребываете. Молите за весь род русский православный, преподобнии сродницы наши.

Тропарь преподобному Александру, игумену Куштскому

Тропарь, глас 4:
Иже плотским дебельством Богови работати изволи, в пустыню вселився, в нейже многими поты и труды безтелеснаго равноангельнаго пребывания возможе достигнути, таже от Бога узрен быв, сподобися великих чудес в жизни и по преставлении, на нечистыя духи силу восприим, изгониши от приходящих к тебе с верою, темже, отче Александре, за вся ны моли, спастися душам нашим.

Тропарь святому благоверному князю Александру Невскому

Тропарь, глас 4:
Яко благочестиваго корене пречестная отрасль был еси, блаженне Александре, яви бо тя Христос яко некое Божественное сокровище Российстей земли, новаго чудотворца преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшаго тебе благодать исцелений. Егоже моли спасти град сей, и стране нашей Богоугодней быти, и сыновом Российским спастися.

Тропарь, глас 4 (Перенесение мощей):
Познай свою братию, российский Иосифе, не в Египте, но на Небеси царствующий, благоверный княже Александре, и приими моления их, умножая жита людем плодоносием земли твоея, грады владычествия твоего ограждая молением и православным христианом на сопротивныя споборствуя.

Величание (на успение великого князя Александра Невского):
Величаем тя, благоверный княже Александре, и чтим святое успение твое, и ныне молиши за нас Христа, Бога нашего.

Кондак, глас 8:
Яко звезду тя пресветлую почитаем, от востока возсиявшую, и на запад пришедшую, всю бо страну сию чудесы и добротою обогащаеши, и просвещаеши верою чтущия память твою, Александре блаженне. Сего ради днесь празднуем твое успение, людие твои сущии, моли спасти Отечество твое, и вся притекающия к раце мощей твоих, и верно вопиющия ти: радуйся, граду нашему утверждение.

Тропарь преподобному Александру Ошевенскому

Тропарь, глас 4:
Христа, истиннаго Бога, всею душею возлюбил еси и Тому невозвратным желанием последовал еси, вся же красная и сладкая мира сего возненавидев, яко небопарный орел, на Небеса возлете и тамо со Ангелы ликуеши и со всеми святыми Святей Троице предстоиши, моли и нам спастися, чадом твоим, яко же обещася, Александре преподобне, отче наш.

Тропарь священномученику Александру (Хотовицкому), протопресвитеру

Тропарь, глас 6:
Кротость и смирение стяжавый, любовь Христову пастве своей показал еси в годину огненных искушений Церкве Российския и, яко пастырь добрый, душу свою за Него положил еси. Молися о нас, священномучениче Александре, просветити души наша.

Тропарь мученице Александре, царице

Тропарь, глас 4:
Царства земнаго славу презревши, Единаго Христа, нас ради распятаго, возлюбила еси и, Того мужественно исповедающи, венцем мученическим увенчалася еси, всеблаженная царице Александро. Темже и ныне Престолу Царя славы на Небесех предстоящи, молися о спасении душ наших.

Тропарь преподобному Александру Свирскому

Тропарь, глас 4:
От юности, богомудре, желанием духовным в пустыню вселився, единаго Христа возжелал еси усердно стопам вслед ходити; темже и ангельстии чини зряще тя, удивишася, како с плотию к невидимым кознем подвизався, премудре, победил еси полки страстей воздержанием, и явился еси равноангелен на земли; Александре Преподобне, моли Христа Бога, да спасет души наша.

Кондак, глас 8:
Яко многосветлая звезда, днесь в странах Российских возсиял еси, отче, вселився в пустыню. Христовым стопам последовати усердно возжелел еси, и Того святое иго на рамо твое взем честный крест, умертвил еси труды подвиг твоих телесная взыграния. Темже вопием ти: спаси стадо твое, еже собрал еси, мудре, да зовем ти: Радуйся, преподобне Александре, отче наш.

Тропарь блаженному Алексию Елнатскому, Христа ради юродивому

Тропарь, глас 4:
Христа ради юродство приял еси и мученическаго венца сподобился еси, и дар пророчества от Бога стяжал еси, за негоже и заключение претерпел еси, святый блаженный Алексие, моли милостивого Бога грехов оставление нам даровати.

Тропарь святителю Алексию, Московскому и всея Руси чудотворцу

Тропарь, глас 8:
Яко Апостолом сопрестольна, и врача предобра, и служителя благоприятна, к раце твоей честней притекающе, святителю Алексие, богомудре чудотворче, сошедшеся любовию в память твою, светло празднуем, в песнех и пениих радующеся и Христа славяще, таковую благодать тебе даровавшаго исцелений и граду твоему великое утверждение.

Тропарь, глас 2 (Обретение мощей):
Яко сокровище пребогатое, многодетно в земли сокровенное, честныя мощи твоя обретошася чудоточащия, всеблаженне отче святителю Алексие: от нихже врачевство приемлюще, обогащаемся и Христа славословим, глаголюще: слава прославляющему святыя Своя.

Тропарь преподобному Алексию, человеку Божию

Тропарь, глас 4:
Возвысився на добродетель и ум очистив, к желанному и крайнему достигл еси: безстрастием же украсив житие твое, и пощение изрядное восприим совестию чистою, в молитвах, яко безплотен пребывая, возсиял еси, яко солнце в мире, преблаженне Алексие.

Кондак, глас 2:
Дом родителей твоих яко чужд имев, водворился еси в нем нищеобразно: и по преставлении венец прием славы, дивен на земли явился еси, Алексие, человече Божий, Ангелом и человеком радование.

Тропарь преподобному Алипию, иконописцу Печерскому

Тропарь, глас 8:
Зраки изобразуя святых на дщицах, сих благодеяния спешно, яко искусен художник, всехвальне Алипие, написал еси на скрижалех твоего сердца и сего ради, яко образ, боголепне украшен, священства благодатию, яки златом, обложился еси от Христа Бога и Спаса душ наших.

Кондак, глас 2:
От юности Божественное в себе имея начертание, вдан был еси в научение иконнаго писания; и внегда небеси подобная Богородицы писашася церковь, ты таможде пособствовал и видел есн Духа Святаго осияние, от Негоже приял еси чудес действо, яко иконы твоя чудотворяху, тем тя чтим и ублажаем, чудне Алипие.

Тропарь преподобному Алипию Столпнику

Тропарь, глас 1:
Терпения столп был еси, ревновавый праотцем, преподобне, Иову во страстех, Иосифу во искушениих, и Безплотных жительству сый в телеси, Алипие отче наш, моли Христа Бога спастися душам нашим.

Тропарь преподобному Амвросию Оптинскому

Тропарь, глас 5:
Яко к целебному источнику, притекаем к тебе, Амвросие, отче наш, ты бо на путь спасения нас верно наставляеши, молитвами от бед и напастей охраняеши, в телесных и душевных скорбех утешаеши, паче же смирению, терпению и любви научаеши, моли Человеколюбца Христа и Заступницу Усердную спастися душам нашим.

Кондак, глас 2:
Завет Пастыреначальника исполнив, старчества благодать наследовал еси, болезнуя сердцем о всех с верою притекающих к тебе, темже и мы, чада твоя, с любовию вопием ти: отче святый Амвросие, моли Христа Бога спастися душам нашим.

Тропарь преподобному Аммону, затворнику Печерскому, в Дальних пещерах

Тропарь, глас 2:
Егда изшел еси от мира, тогда мирская вся яко тщетна отвергл, егда же образ иноческий на ся прият, тогда вражия коварства подвиги своими и труды, Аммоне блаженне, попрал еси, вопия: Христе Боже, слава Тебе.

Тропарь святителю Амфилохию, епископу Владимира Волынского

Тропарь, глас 4:
От мирскаго мятежа изшед, в пещерах Киевских Феодосия блаженнаго Богомудренно вселился еси, святителю Христов, отче Амфилохие, и отсюду во епископа Богоспасаемой пастве Владимиро Волынстей поставленный, в трудех, бдениих и пощениих свято подвизался еси. И тако достиг добродетелей совершенства, паки в пещеры святыя возвратился еси, идеже и дух свой благочестно предал еси Господеви, всечестне, к лику преподобных Печерских причтен, с ними же молися Христу, всечестне, спастися душам нашим.

Кондак, глас 8:
Звезду Волынскую, из пещернаго мрака от Киева возсиявшую, и от Волыни второе пещеры заветныя житием своим блаженною кончиною, и прославлением своим озарившаго, всеблаженнаго Амфилохия, архипастыря Владимиро Волынскаго почтим, просяще его, да в лике преподобных Печерских водворяяся, молится купно с ними о душах наших.

Тропарь преподобным Амфилохию, Макарию, Тарасию и Феодосию Глушицким

Тропарь, глас 8:
Светильники светлыя явльшеся, доброту земную мудренно оставльше, и идоша во внутреннюю пустыню, Амфилохие, Макарие, Тарасие и Феодосие, смирение и всякую добродетель извыкше, и обретоша безсмертие, постом и бдением и прочим воздержанием себе приносяще Христу, и ныне на Небесех Престолу Христову предстоите. Молите, отцы Богомудрии, Амфилохие, Макарие, Тарасие и Феодосие, умирити мир и спастися душам поющих вас, и согрешений оставление даровати чтущим всечестную память вашу.

Кондак, глас 2:
Яко незаходимая светила мысленнаго Солнца, просветисте вселенную и верных души и телеса лучами чудес ваших озаряюще, независтно подаваете от недуг исцеление. Темже, сошедшеся, верою вас в песнях восхваляем, яко наши премудрыя наставники и к Богу ходатаи, и непрестанно вопием: радуйтеся, отцы Богомудрии, Амфилохие, Макарие, Тарасие и Феодосие.

Тропарь преподобномученику Анастасию, диакону Печерскому, в Ближних пещерах

Тропарь, глас 4:
Плотское, яко безплотный Ангел, возненавидевши препитание, духовную во иноческом чину возлюбил еси пищу, и в нем Боговидцу на Синаи Моисею добрым жития твоего подвигом уподобляяйся, многими на горе Божией Печерской возвысился еси добродетельми, идеже в молении к Вышнему непрестанно пребывал еси, ныне же со отцы преподобными Печерскими, аки бисер многоценен, мощми нетленными в пещере твоими пресветло сияеши, а душею со Ангелы пред Престолом Божиим, святый преподобномучениче Анастасие, предстоиши, о нас всегда моляся ко Господу спастися душам нашим.

Тропарь преподобномученице Анастасии Римляныни

Агнице Твоя, Иисусе, Анастасия зовет велиим гласом: Тебе, Женише мой, люблю и тебе ищущи страдальчествую, и сраспинаюся и спогребаюся крещению Твоему, и стражду Тебе ради яко да царствую в Тебе, и умираю за Тя да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко милостив, спаси души наша.

Тропарь преподобной Анастасии Сербской

Тропарь, глас 4:
Добродетельми богатая, кротостию и благочестием украшенная, возсияла еси чистотою жития твоего, сего ради благий Бог благослови тя быти материю светильника рода сербскаго, темже вопием ти: радуйся, преподобная мати Анастасие.

Тропарь святой великомученице Анастасии, именуемой Узорешительница

Тропарь, глас 4:
Победоноснаго Воскресения истинноименитая наречена еси, мученице Христова, победы на враги поставила еси мук терпением, Христа ради, Жениха твоего, Егоже возлюбила еси. Того моли спасти души наша.

Тропарь преподобным Анатолию, в Ближних пещерах и Анатолию затворнику, в Дальних пещерах, Печерским

Тропарь, глас 3:
Преблаженнии и Богоноснии отцы наши, Анатолие и Анатолие Затворниче, яко стяжавшии дерзновение ко Господу равноангельным своим житием, егоже ради обогати Христос нетлением и чудесы мощи ваша, молим вас прилежно: испросите душам нашим очищение и велию и богатую милость.

Тропарь мученику Анатолию

Мученик Твой Господи, Анатолие во страдании своем венец прият нетленный от Тебе Бога нашего. Имеяй бо крепость Твою, мучителей низложи, сокруши и демонов немощныя дерзости Того молитвами спаси души наша.

Тропарь новомученику Ангели

Тропарь, глас 1:
Лик ангельский, Ангели новомучениче, и сонмы страстотерпец восплескаша выспрь твоему веры ради терпению и прекословию и дух твой по благомудрию возведоша на Небеса со славою ко Христу Богу нашему.

Тропарь благоверному великому князю Андрею Боголюбскому

Тропарь, глас 8:
Яко благоверен и праведен, за любовь Христа Бога от своих смерть приял еси, кровь свою пролияв, яко же прежде сродницы твои и страстотерпцы Борис и Глеб, ихже кровем совопиет и твоя кровь, святе, к Богу, якоже Авеля и Захарии праведных, благоверный страстотерпче, великий княже Андрее, с нимиже Христа Бога моли о стране нашей, еже Богоугодней быти и сыновом российским спастися.

Тропарь святителю Андрею, архиепископу Критскому

Тропарь, глас 1:
Христову Церковь цевницею языка твоего, песнословя умильно, возвеселил еси, богословием же Препетыя Троицы славу всем сказал еси ясно, тем тя, яко тайноглагольника, поем, Андрее, пастырю Критский, и величаем память твою, Христа славяще дивнаго во святых Своих.

Тропарь, глас 4:
Постнически предподвизався на горе, умная врагов ополчения всеоружием Креста погубил еси, всеблаженне. Паки же ко страдальчеству мужески облеклся еси, убив Копронима мечем веры; и обоих ради венчался еси от Бога, преподобномучениче Андрее приснопамятно.

Тропарь святому апостолу Андрею Первозванному

Тропарь, глас 4:
Яко апостолов первозванный и верховнаго сущий брат, Владыце всех, Андрее, молися, мир вселенней даровати и душам нашым велию милость.

Кондак, глас 2:
Мужества тезоименитаго богоглагольника и Церкве возследователя верховнаго, Петрова сродника восхвалим: зане якоже древле сему, и ныне нам воззва: приидите, обретохом Желаемаго.

Тропарь преподобному Андрею Рублеву

Тропарь, глас 3:
Божественнаго света лучами облистаемый, преподобне Андрее, Христа познал еси Божию Премудрость и Силу и иконою Святыя Троицы всему миру проповедал еси Единство во Святей Троице, мы же со удивлением и радостию вопием ти: имеяй дерзновение ко Пресвятей Троице, моли просветити души наша.

Кондак, глас 8:
От юности к Божественней красоте устремляяся, чудный иконописец в земли Росийстей был еси, и, богоносным твоим учителем поревновав, сиянием добродетелей украсился еси, преподобне Андрее, темже и явися Церкве нашея похвала и радование.

Тропарь святому благоверному князю Андрею, Смоленскому и Переяславскому чудотворцу

Тропарь, глас 8:
Блаженство Евангельское возлюбив, богомудре княже Андрее, чистоту сердца девством почтил еси, и суету мира сего презрев, устремился еси зрети Бога, Иже тя прослави чудесы во врачевании различне страждущих. Сего ради молим тя: проси нам у Христа Господа всяких скорбей избавления и получение царства небеснаго.

Тропарь:
Град твой Смоленск, яко чужд, имея, водворился еси в град Переяславль, и в дому святителя Николая жестоким житием временную жизнь совершив, востекл еси в горняя предстояти Христу, Егоже моли о творящих память твою, да вси вопием ти: радуйся, святе княже Андрее, Ангелом собеседниче и человеком помощниче.

Величание:
Ублажаем тя, благоверный великий княже Андрее, и чтем святую память твою, ты бо молиши за нас Христа Бога нашего.

Тропарь мученику Андрею Стратилату

Тропарь, глас 5:
Земнаго сана славу оставив, Небесное Царство наследовал еси, кровными каплями, яко пречудным камением, нетленныя венцы украсил еси и ко Христу привел еси собор страстотерпец. С лики ангельскими в невечернем свете незаходимаго Солнца Христа обрел еси, святе Андрее Стратилате, Егоже моли с пострадавшими с тобою присно, да спасет души наша.

Тропарь блаженному Андрею Тотемскому, Христа ради юродивому

Тропарь, глас 4:
Терпением и мужеством Христа ради юродство восприял еси, блаженне Андрее, в посте и бдении пребывая, тягость зноя летняго понесл еси, и мразы зимния терпя, темже и ныне приходящим с верою к тебе, исцеление неоскудно подаеши, моли Христа Бога спастися душам нашим.

Тропарь блаженному Андрею, Христа ради юродивому

Тропарь, глас 1:
Глас апостола Твоего Павла услышав, глаголющ: мы юроди Христа ради, раб Твой, Андрей, юрод бысть на земли Тебе ради, Христе Боже. Темже ныне память его почитающе, Тебе молимся, Господи, спаси души наша.

Тропарь преподобному Андронику Антиохийскому

Тропарь, глас 1:
Пустынный житель и в телеси Ангел и чудотворец показался еси, Богоносне отче наш Андрониче, постом, бдением, молитвою Небесная дарования приим, исцеляеши недужныя и души верою притекающих к тебе. Слава Давшему тебе крепость, слава Венчавшему тя, слава Действующему тобою всем исцеления.

Тропарь преподобным Андронику и Савве Московским

Тропарь, глас 8:
От юности своея, преподобнии отцы Андрониче и Савво, в пустыни вселистеся Сергия великаго, того житию последующе, плоды смирения и послушания возрастили есте, сего ради сподобившеся быти строители и первоначальники обетныя обители святителя Алексия, с нимже испросите у Христа Бога верным людем здравие и спасение и душам нашим велию милость.

Тропарь преподобному Андронику Московскому

Тропарь, глас 1:
Безмолвие от юности возлюбив, на гору Маковец пришел еси, Андрониче блаженне, обитель общаго жития устроил еси в земнем граде Москве, во обители Небеснаго града ныне ликовствуеши, молися Христу Богу спастися душам нашим.

Тропарь преподобным Андронику, Савве и Александру Московским, Даниилу Черному, Андрею Рублеву

Тропарь, глас 2:
Плоды добродетелей на земли принесше, преподобнии отцы, в Небесных чертозех ныне благоухаете, яко райстии цвети, и лицем к лицу зрите Пресвятую Троицу, Юже дерзновенно молите спастися душам нашим.

Тропарь мученице Анисии

Агница Твоя, Иисусе, Анисие зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе: тоя молитвами, яко милостив, спаси души наша.

Тропарь преподобной (благоверной княгине) Анне Кашинской

Тропарь, глас 3:
Днесь восхваляем тя, преподобная мати, великая княгине инокине, Анно: яко бо лоза плодовита посреде терния, процвела еси во граде Кашине твоими добродетельми, всех удивила еси чудным твоим житием, темже Христу Богу угодила еси, и ныне, радующися и веселящися, пребываеши в лики преподобных жен, наслаждающися райския красоты и веселия. Молим убо тя: моли о нас Человеколюбца, Христа Бога нашего, даровати нам мир и велию милость.

Кондак, глас 4:
Яко пресветлая звезда явилася еси в Российскей земли, во граде Кашине, преподобная мати Анно, во всех благочестивых и верных женах, аки крин процвела еси чистым и непорочным твоим житием, во инокинях же совершенными твоими труды и подвиги, и взошла еси к Вышнему граду радующися и веселящися, яко добре совершивши твое течение, и ныне честныя твоя мощи, аки бисерие драгое, явишася, на исцеление всем, приходящим с верою. Темже и вопием ти: радуйся, всекрасная душею и моли Христа Бога о спасении душ наших.

Кондак, глас 8:
Скоропослушную помощницу вси сущии в бедах, благочестно воспоем Анну святую, днесь любовию сошедшеся во обретение честных мощей ея. Воспоем песнь Единому в Троице Богу, радующеся, сподобльшему нас видети пречистое сокровище честных мощей ея: от мног бо лет сокровенны быша, напоследок же нам явлены и источают многа и различна исцеления. Яко да молитвам, ея к Богу от всяких находящих зол избавимся, радостно, душею и веселием сердца благодарная воспоем глаголюще: радуйся, утверждение граду нашему.

Величание:
Ублажаем тя, преподобная мати великая княгиня Анно, и чтим святую память твою, наставнице инокиням и собеседнице ангелом.

Тропарь святой благоверной княгине (преподобной) Анне Новгородской

Тропарь, глас 1:
От запада возсиявши, яко звезда небосветлая, прияти Православную веру сподобилася еси, в ней же плод благославный Русской земле принесши, святая благоверная княгине Анно, Христа всем сердцем возлюбила еси, Того оправдания и законы хранящи; тем же днесь всесвятую твою память празднующе, грехов оставление молитвами твоими приемлем.

Кондак, глас 4:
Днесь в светлой памяти твоей Великий Новград веселится, созывая всех верных светло праздновати память твою, и мы ныне, духовно ликовствующе, радостно славим тя и молим: святая благоверная княгине Анно, предстоя Святей Троице, моли избавити Великий Новград и всю землю Русскую от всяких бед и обстояний и всем нам спастися.

Величание:
Величаем тя, святая благоверная преподобная княгине Анно, и чтим святую память твою, ты бо молиши за ны Христа Бога нашего.

Тропарь праведной Анне

Тропарь, глас 4:
Жизнь рождшую во чреве носила еси, Чистую Богоматерь, богомудрая Анно: темже к приятию небесному, идеже веселящихся жилище, в славе радующися, ныне преставилася еси, чтущим тя любовию прегрешений просящи очищение, присноблаженная.

Величание (на успение праведной Анны):
Величаем тя, святая праведная Анно прамати Христа Бога нашего, и всечестное славим успение твое.

Тропарь преподобному Антонию Великому

Тропарь, глас 4:
Ревнителя Илию нравы подражая, Крестителю правыми стезям последуя, отче Антоние, пустыни был еси житель, и вселенную утвердил еси молитвами твоими. Темже моли Христа Бога спастися душам нашим.

Тропарь святителю Антонию Вологодскому

Тропарь, глас 4:
Иже от юности, Богомудре, возследуя Христу, во бдениих и в пощениих пребывая, и паству, от Бога дарованную ти, добре пасый, и учений Божественных исполняя, и в жизненный путь наставляя: отнюду же и архиерейства саном почтеся, Церковь и люди возвеселил еси; и по преставлении своем чудес лучи испущаеши, недугом с верою приходящим к тебе исцеление подая, и слепу младенцу свет дарова, угодниче Христов, святителю Антоние, предстоя Престолу Христову с лики Ангельскими, с нимиже моли Его о нас, притекающих к тебе получити от него оставление грехов и велию милость.

Тропарь преподобному Антонию Дымскому

Тропарь, глас 4:
Добродетелей ревнителю, пустынный житель, подвижник веры Христа Бога нашего, пощением и труды умертвивый плотская вожделения: тезоимените великому Антонию, егоже житию поревновал еси и во егоже имя божественный храм воздвигл еси: купно с ним, преподобне Антоние, моли Спасителя всех, да и нас сотворит победители плотских похотей и Храмы Духа Святаго, по велицей Его милости.

Тропарь преподобным Антонию и Феодосию Печерским

Тропарь, глас 3:
Двоицу начальных российских светил почтим, Антония, Богом посланнаго, и Феодосия, Богом дарованнаго: тии бо первии, равноангельным в России житием просиявше от гор Киевских, осветиша отечествия нашего вся концы, и путь к Небеси правый многим показаша, и, первоотцы иноком бывше, лики спасаемых Богови приведоша, и ныне, предстояще в вышних немерцаемому Божества Свету, молятся о душах наших.

Тропарь святителю Антонию Новгородскому

Тропарь, глас 4:
Иже от юности, Богомудре, возследуя Христу, во бдениих и в пощениих пребывая, и паству, от Бога дарованную ти, добре пасый, и учений Божественных исполняя, и в жизненный путь наставляя: отнудуже и архиерейства саном почтеся, Церковь и люди возвеселил еси; и по преставлении своем чудес лучи испущаеши, недугом с верою приходящим к тебе исцеление подая, и слепу младенцу свет дарова, угоднниче Христов, святителю Антоние, предстоя Престолу Христову с лики ангельскими, с ними же моли Его о нас, притекающих к тебе получить от Него оставление грехов и велию милость.

Кондак, глас 8:
Возвеселися Христова Честная Церковь, приимши тя в недра своя пастыря и учителя; мы же, вернии людие, прославляем подавшаго ти благость неоскудну, яже твориши преславная чудеса. Тем, святителю, не престай моля Христа, Емуже угодил еси, о нас хвалящих и чтущих тя, к тебе притекающих, подати милость зде и в день Судный, да зовем ти: радуйся, святителю Антоние, граду нашему похвала и утверждение.

Тропарь преподобному Антонию Печерскому, Киевскому, начальнику всех русских монахов

Тропарь, глас 4:
От мирскаго мятежа исшед, отвержением же мира евангельски Христу последовал еси и равноангельное житие пожив, в тихое пристанище Святые Горы Афона достигл еси. Отонудуже благословением отцев в гору Киева пришед, и тамо трудолюбно жизнь совершив, Отечество свое просветил еси, и множеству монашествующих стезю ведущую к Небесному Царствию показав, Христу сия привел еси. Егоже моли, Антоние преподобне, да спасет души наша.

Тропарь преподобному Антонию Римлянину, Новгородскому чудотворцу

Тропарь, глас 4:
Ветхий Рим, отечество твое, оставив, на камень, яко на легкий корабль, возшел еси и на нем паче естества, аки безплотен, по водам шествовал еси, промышлением Божественнаго разума направляемь, Великаго Новаграда достигл еси и, обитель в нем сотворив, тело твое в ней предложил еси, яко дар освящен. Тем молим тя, отче Антоние: моли Христа Бога, да спасет души наша.

Тропарь преподобному Антонию Сийскому

Тропарь, глас 1:
Желанием духовным распалився и мятежи мирския отринув, ко единому же Богу любовию прилепился еси и, Того вседушне взыскуя, во внутреннюю пустыню отошел еси, при водах вселився, идеже во слезах и трудех пребывая многолетное время, в терпении мнозем житие Ангельское проходил еси в наставлении Божественнаго разума, и множество монахов собрал еси, мудре, ихже посещая, и не остави, Антоние преподобне, отче наш, Пресвятей Троице моляся от зол всяческих избавити и спасти души наша.

Тропарь мученикам Антонию, Евстафию и Иоанну Виленским (Литовским)

Тропарь 1, глас 4:
Иже земных чести и славы отвергшеся, доблии и честнии, страдальцы, веры ради крепко и мужественно муки претерпесте, на смерть себе давше за живот всех Владыку: тем же и Христос преславно столпом облачным с небесе вас озари и почестьми и венцы от престола славы венча: со Ангелы Тому предстояще, молите спастися душам нашим.

Тропарь 2, глас 4:
От корене неплодна, преблаженнии, возрастивше православныя веры ветви, первомучеником тезоименитии явистеся: злаго бо и нечестиваго князя ярости не убоястеся, повелевающа Христа отрещися, сего ради мученическия венцы приемше и со Ангелы престолу Владычню предстояще, о нас молитеся, преблаженнии, православно чтущих святую память вашу.

Величание:
Величаем вас, страстотерпцы святии Антоние, Иоанне и Евстафие, и чтем честная страдания ваша, яже за Христа претерпели есте.

Тропарь мученице Антонине

Агница Твоя Иисусе Антонина зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе: тоя молитвами, яко милостив, спаси души наша.

Тропарь мученику Арефе и с ним 4299-ти

Тропарь, глас 1:
Мужествовавше во Христе противу безбожнаго царя, мученицы святии, и того неверие иудейское во Христа обличивше, прияша мук томление и главам усечение; тем восхвалиша тя Ангели, и верных роди тя прославляют, Арефо, и пострадавших с тобою, яко молящихся присно о душах наших.

Тропарь преподобному Арефе, затворнику Печерскому, в Ближних пещерах

Тропарь, глас 2:
Богатство твое душевное погубити хотя враг, помрачил тя бяше богатством тленным исперва, но всех спасаяй Господь богатство гибнущее окрасти попусти, душевное же невредно соблюд, Небесных сокровищ наследника тя показа, Арефо, тем тя чтим и ублажаем.

Тропарь преподобному Аркадию Новоторжскому

Тропарь, глас 4:
От духовнаго наставника, отца преподобнаго Ефрема, наставляемь, послушания добрый рачителю, отче Аркадие, от мирскаго мятежа удалился еси и, инок быв изрядный, добрым подвигом ревнуяй, от Христа Бога приял еси венец славы Небесныя; и ныне, вкупе с преподобным отцем Ефремом у Престола Вышняго предстоя, о нас молися, избавитися нам от всех бед и скорбей и спастися душам нашим.

Тропарь преподобному Арсению Великому

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Арсение отче наш, моли Христа Бога спастися душам нашим.

Тропарь преподобному Арсению Каппадокийскому

Тропарь, глас 3:
Житие богоугодное добре скончав сосуд честен Утешителя явился еси, Богоносне Арсение, чудес благодать приим, всем подаеши скорое вспоможение, отче преподобне, Христу Богу молися даровати нам велию милость.

Тропарь преподобному Арсению, Комельскому чудотворцу

Тропарь, глас 4:
Удалився мира, водворился еси в пустыню и тамо подвизался еси добрым подвигом, постом и молитвами, и многим терпением. И жив показал еси многая чудес: и по преставлении своем источаеши различная исцеления с верой приходящим, к честному гробу твоему, Арсение, отче наш: моли Христа Бога спастися душам нашим.

Кондак, глас 8:
Житейския молвы отбег, и в пустыню вселился еси, и тамо житием жестоким пожил еси, и зверя свирепаго аркуда молитвами укротил еси и многим был еси наставник ко спасению, и того ради получил еси жизнь вечную на Небесех. Всегда зря Святую Троицу, моли избавитися нам от бед, да зовем ти: радуйся, отче наш Арсение, пустынный жителю.

Тропарь преподобному Арсению Коневскому, чудотворцу

Тропарь, глас 1:
Божественного любовию возгоревся, мирския пристрастия от души отвергше, тесным путем постничества во след Христа невозвратным умом шествовал еси, Арсение всеблаженне: от него же и мзду трудов твоих на небесех восприим, поминай нас, чтущих святую память твою и вопиющих: слава Давшему ти крепость, слава Венчавшему тя, слава Действующему тобою всем исцеления.

Тропарь, глас 4:
Духом Божиим наставляемый, возлюбил еси безмолвие, в немже евангельски подвизающуся, пречудный Афонский дар — Богоматере икона, даровася ти, всеблаженне, и, образ добродетелей быв стаду твоему, Арсение отче наш, к Горнему торжеству возшел еси, идеже со Ангелы ликовствуя, моли Христа Бога спастися душам нашим.

Тропарь преподобному Арсению Новгородскому

Тропарь, глас 4:
Отечество свое и род оставил еси, Христу прилепися, и Великаго Новаграда достигл еси, и в нем во юродстве трудолюбное твое тело изнурил еси многим постом и воздержанием, и пророчествия дар прияти сподобися, и многошвенныя ризы изволил еси на себе носити, и, тело в нем предложив, обитель себе в премирнем Царствии у Христа, всех Бога, сотворил еси. Егоже моли, святе Арсение преподобне, Церкви и стране нашей в мире пребывати от всех навет вражиих, ущедрити нас, почитающих твое торжество, и спасти души наша.

Тропарь Арсению, архиепископу Сербскому

Тропарь, глас 8:
Милости наставниче и благоутробия сокровище, еже всем отверзл еси, правоверия учителю и архиереев Божественное удобрение, отче наш, иерарше Арсение, нищих был еси заступник; тем моли Христа Бога, просветити души наша, да не когда уснем в смерть.

Тропарь Арсению, епископу Тверскому

Тропарь, глас 8:
Благочестно пожив во святительстве, люди просветил еси учением твоим, и о храме Пречистая вельми подвизався, и любитель монахов быв, сего ради от Христа паствы твоея венец приял еси. Темже, яко апостольского престола наместника, и святителя великаго чтуще тя, молим чада твоя, блаженне: от всех бед избави нас яже ко Христу молитвами твоими, святителю Христов Арсение, отче наш.

Тропарь, глас 1 (Перенесение мощей):
Божественною свыше просветився благодатию, святителю, и многим терпением во временней жизни подвиг совершил еси. Темже источаеши чудес благодать иже с верою приходящим к честней раце мощей твоих, Арсение преблаженне. Мы же вопием ти: слава Давшему ти крепость, слава Венчавшему тя, слава Действующему тобою всем исцеления.

Тропарь преподобному Арсению Трудолюбивому, в Дальних пещерах

Тропарь, глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Арсение отче наш, моли Христа Бога спастися душам нашим.

Тропарь великомученику Артемию

Тропарь:
Истинною бо Христовою верою утверждься, страстотерпче, мучителя злочестива царя победил еси со идольским того возношением. Тем от Царя Великого, вечно царствующего, пресветлым венцем победным одарен бысть, вся исцеляяй болящия и призывающия тя, Артемие великий, моли Христа Бога спасти души наша.

Кондак, глас 2:
Благочестиваго и венценоснаго мученика, на враги победы вземшаго одоление, сошедшеся, достойно песньми восхвалим Артемия превеликаго в мученицех, чудес же дателя пребогатаго, молится бо Господу о всех нас.

Величание:
Величаем тя, страстотерпче святый Артемие, и чтем честная страдания твоя, иже за Христа претерпел еси.

Тропарь праведному отроку Артемию Веркольскому

Тропарь, глас 1:
Пустынный житель и в телеси Ангел и чудотворец показался еси, отче Артемие: постом, бдением, молитвою небесныя дарования приим, исцеляеши недужныя и души верою притекающих к тебе. Слава Давшему тебе крепость, слава Венчавшему тя, слава Действующему тобою всем исцеления.

Тропарь, глас 3:
Вышняго повелением тученосным облаком небо помрачившим, и молниям блистающим, грому же возшумевшу с прощением, испустил еси душу твою в руце Господеви, премудре Артемие, и ныне предстоиши Престолу Владыки всех, о иже верою и любовию приходящим к тебе, подая исцеление всем неотложно, и моляся Христу Богу, спастися душам нашим.

Величание:
Величаем тя, страстотерпче Христов, Артемие, и чтим святую память твою, ты бо молиши за нас Христа Бога нашего.

Тропарь Архиппу, апостолу от 70-ти

Тропарь, глас 3:
Учениче Павлов и апостоле Христов, Архиппе, Евангелия провозвестниче и Колоссаев учителю, каменное побиение приемый, аки драгоценное украшение, имже венец мучения украсив, вшел еси на веселие Царствия, идеже помяни нас поющих твою память, апостолов сопрестольниче.

Тропарь преподобному Афанасию Афонскому

Тропарь, глас 3:
Еже во плоти житию твоему удивишася ангельстии чини: како с телом к невидимым сплетением изшел еси, приснославне, и уязвил еси демонские полки. Отонудуже, Афанасие, Христос тебе воздаде богатыми дарованьми, сего ради, отче, моли спастися душам нашим.

Тропарь преподобному Афанасию, игумену Брестскому

Тропарь, глас 2:
Блажен еси отче наш Афанасие, яко верно пожил еси стоя бодренно за Святую Восточную Веру: со умилением присно поя неседальное Пречистей, заповедуя никомуже нарушати Православныя Веры Святыя. Пострадал за свидетельство истины даже до смерти, мы же чтуще святыню твою со дерзновением взываем ти: отче наш: Преподобномучениче Афанасие, похвало и украшение наше.

Кондак, глас 4:
Монашеского жития украшение и мучеников красоту явил себе житием твоим, Афанасие, и яко солнце пресветлое людям православным возсиял еси, тем же и Христос даром чудес обогати тя, да чтуще пресветлую память твою, зовем ти: поминай стадо твое молитвами твоими, Преподобне.

Кондак, глас 2:
Яко постника благочестна и искусна и страдальца произволением честна и пустыни жителя сообразна в песнех достойно хвалим Афанасия приснохвального той бо змия попрал есть.

Величание:
Ублажаем тя, Преподобномучениче Афанасие, и чтем святую память твою, наставниче монахов и собеседниче ангелов.

Тропарь святителю Афанасию Великому

Тропарь, глас 3:
Столп был еси Православия, Божественными догматы подтверждая Церковь, священноначальниче Афанасие. Отцу бо Сына единосущна проповедав, посрамил еси Ария, отче преподобне, Христа Бога моли даровати нам велию милость.

Тропарь преподобному Афанасию и Феодосию Череповецким

Тропарь, глас 5:
Яко всехвальнии ученицы великаго покровителя и заступника земли Русской, Богоноснии отцы наши Афанасие и Феодосие, от юности вашея крест Христов на рамена вземшии, усердно Тому последовали есте и добре потрудилися в Сергиевой обители. Отонудуже Божиим изволением прибывша, благочестно во граде нашем Череповце подвизалися есте, и обитель Воскресения Христова устроиша, молитвою и трудом Богу угодивше, от Него венец славы Небесной прияли есте, и ныне святыми своими телесы в соборнем храме под спудом почивающе, духом же вкупе с преподобным Сергием у Престола Всевышняго предстоя, о нас молитеся прилежно избавитися нам от всех бед и скорбей и спастися душам нашим.

Тропарь Афанасию, патриарху Цареградскому, Лубенскому чудотворцу

Тропарь, глас 8:
Премудростию учений твоих царствующий град просветив, тьму неведения еретического разгнал еси, преблаженне; твое благословение земли Российстей принесл еси, отче наш, святителю Афанасие, идеже скончав течение твое, на крилех чистоты возлетел еси в Небесное Царство. Моли Христа Бога непрестанно о душах наших.

Тропарь праведному Афанасию Наволоцкому

Тропарь, глас 1:
Божественною благодатию просветився, и по смерти даруеши исцеления притекающим к тебе, премудре Афанасие, темже и мы ныне чтим честных мощей твоих явление, веселящее вкупе души и телеса. Тем вси вопием: слава Давшему ти крепость, слава Венчавшему тя, слава Действующему тобою всем исцеления.

Тропарь святителю Афанасию Пателарию, патриарху Цареградскому

Тропарь, глас 8:
Премудростию и учением словес твоих царствующий град просветив, и тьму суемудрия еретическаго разгнав, твое благословение сыновом Российским принесл еси, преблаженне отче наш, святителю Христов Афанасие, и зде жития твоего течение скончав, крилома чистоты в царство небесное вознеслся еси, и тамо со Ангелы и лики святых живый, непрестанно моли Христа Бога о душах наших.

Тропарь преподобному Афанасию, затворнику Печерскому, в Ближних пещерах

Тропарь, глас 3:
Блаженство плачущих получити желая, день и нощь непрестанно плакал еси, имея во уме час Судный, тем по кончине твоей обрел еси утешение на Небеси, преподобне Афанасие. Подаждь и нам плакатися зде грехов наших выну, яко да плача безконечнаго избывше, тамо приимем вечное утешение.

Тропарь преподобному Афанасию, затворнику Печерскому, в Дальних пещерах

Тропарь, глас 7:
По имени своему за труды велия и всегдашнее зде умерщвление плоти в затворе безсмертную ныне на Небеси жизнь наследовавый, молим тя прилежно: молися о нас, яко да и мы тояжде сподобимся получити.

Тропарь преподобному Афанасию Высоцкому (Младшему), Серпуховскому

Тропарь, глас 8:
Образ Божий в богосотворенней душе твоей, ум, слово, и дух соблюдая вперился еси отче преподобне Афанасие, любовию ко Всетворцу Богу, и сего ради молитвы, труды, и подвиги добродетельныя восприим, прешел еси в вечныя небесныя кровы. Отнюдуже назирай нас моля Святую Троицу, еже наследити нам горнее всерадостное блаженство.

Тропарь преподобному Афанасию(Старшему), игумену Высоцкому, Цареградскому

Тропарь, глас 4:
От юности от всея души Христа возлюбив, Крест Господень усердно взем, преподобне, и ревности безплотных на земли показав, чуден в подвизех явился еси, яко и дивитися о тебе учителю твоему преподобному Сергию, сего ради и игумен обители иже на Высоком поставлен быв, ученми и добродеянми твоими души просветил еси, многия путеводя ко спасению, с ними же моли присно Христа Бога, блаженне отче наш Афанасие, да спасет души наши.

Тропарь Афанасию, патриарху Цареградскому

Тропарь, глас 1:
Чистоты жития светом страстное терние попалил еси и течением слез безплодную землю напоил еси, многоплодну ниву душевную соделав, Афанасие преблаженне, светило Царюграду, Патриархом удобрение, моли Христа Бога спастися душам нашим.

Тропарь преподобной Афанасии, игумении

Тропарь, глас 3:
В тебе, мати, известно спасеся еже по образу: приимши во Крест, последовала еси Христу, и деющи учила еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобная Афанасие, дух твой.

Тропарь священномученику Афиногену, епископу, и десяти ученикам его

Тропарь, глас 8:
Священный Богу Афиноген, в жертве служитель, священное ученик своих принесе Христу заколение, пастырь со словесными овцами иде в Небесную ограду, победив сверепеющия неверием языки. Мученик Твоих молитвами, Христе Боже, спаси стадо Твое от волков, губящих е.

Тропарь всем преподобным и богоносным отцам, во Святой Горе Афонской просиявшим

Тропарь, глас 1:
Пустыни Афонския отцы, Ангелы во плоти, исповедники вкупе и преподобныя, святители же и мученики в пениих почтим, подражающе добродетелем их, зовуще согласно и глаголюще: слава Прославльшему вы, слава Венчавшему вы, слава в бедах предстатели нам вы Показавшему.

Величание:
Ублажаем вас, преподобнии отцы Афонстии, в Горе сей постившиися, и чтим святую память вашу, наставницы монахов и собеседницы Ангелов.

Тропарь преподобному Ахиле, диакону Печерскому

Тропарь, глас 8:
В тебе, отче, известно спасеся еже по образу приим бо крест последовал еси Христу, и дея учил еси презирати убо плоть, приходит бо: прилежати же о души, вещи безсмертней: тем же и со Ангелы срадуется, преподобне Ахило, дух твой.

Кондак, глас 2:
Чистотою душевною Божественно вооружився, и непристанныя молитвы яко копие вручив крепко, пробол еси бесовская ополчения Ахило, моли непрестанно о всех нас.

Величание:
Ублажаем тя, преподобне отче Ахило, и чтем святую память твою, наставниче монахов и собеседниче Ангелов.

Тропарь Пресвятой Богородице перед Ея иконой, именуемой «Ахтырская»

Тропарь, глас 4:
Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати. Темже на пречистый образ Твой благоговейно взирающе и изображенную Тя на нем пред Крестом Спаса нашего видяще, умиленно к Тебе вопием: Заступнице усердная, благая и милостивая! Ускори избавити ны от всякия скорби, нужды и болезни и спаси души наша, да Тя со благодарением славим во веки.



... Добавить в "Закладки" ... Ctrl+D


Для пожертвований:

Пожертвование.

Да хранит Вас Господь!

Православные информеры для сайтов и блогов




Все молитвы ...