Молитвы святых угодников

Главная --> Иконы --> Чудотворные иконы --> Икона Митрополит Алексий, святитель Московский и всея России чудотворец

Икона Митрополит Алексий, святитель Московский и всея России чудотворец.

Алексий, святитель Московский и всея России чудотворец

Молитвы святителю Алексию Московскому чудотворцу.

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у Престола всех Царя, и наслаждаяся Света Единосущныя Троицы, и херувимски со Ангелы возглашая песнь Трисвятую, велие и неизследованное дерзновение имея ко Всемилостивому Владыце, молися спасти люди паствы твоея, единородный ти язык; благостояние святых церквей утверди, архиереи благолепием святительства украси; монашествующия к подвигом добраго течения укрепи; град сей (или: весь сию; аще во обители: святую обитель сию) и вся грады и страны добре сохрани и веру святую непорочну тем соблюсти Господа умоли; мир весь умири, от глада и пагубы избави ны и от нападения иноплеменных сохрани нас; старыя утеши, юныя накажи (научи), безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели и везде тепле призывающих тя и с верою притекающих к раце честных и многоцелебных мощей твоих, усердно припадающих и молящих ти ся от всяких напастей и бед ходатайством твоим свободи, да зовем ти: о Богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райскии, всезлатая уста Слова, московская похвало, всея России украшение! Моли о нас Всещедраго и Человеколюбиваго Христа Бога нашего, да в День страшнаго Пришествия Его шуияго стояния избавит нас и радости святых причастники сотворит со всеми святыми вовеки. Аминь.

Молитва вторая

О священнейший отче, святителю Христов Алексие, пастырю и учителю наш, не отрини нас (имена), с верою притекающих к твоему заступлению, но скоро потщися помолитися Царю царствующих и Господу господствующих, да избавит стадо Свое от волков, губящих е, и всяку страну христианскую огради и сохрани святыми твоими молитвами от мирскаго мятежа и труса, нашествия иноплеменник и междоусобныя брани, от глада же и губительства, потопа, и меча, и огня, и напрасныя смерти, и якоже исцелением от слепоты царицы агарянския спасл еси отечество твое, тако помилуй и нас, умом, словом и делом во тьме греховней сущих, и избави нас гнева Божия и вечныя казни, яко да твоим ходатайством и помощию, Своим же милосердием и благодатию, Христос Бог тихое и безгрешное житие даст нам пожити в веце сем и на Страшнем судище Своем сподобит деснаго стояния со всеми святыми. Аминь.

Тропарь святителю Алексию, Московскому и всея Руси чудотворцу

12 февраля

Тропарь святителя Московского Алексия
глас 8

Яко апостолом сопрестольна,/ и врача предобра, и служителя благоприятна,/ к раце твоей честней притекающе, святителю Алексие, богомудре чудотворче,/ сошедшеся, любовию в память твою светло празднуем,/ в песнех и пениих радующеся и Христа славяще,/ таковую благодать тебе даровавшаго исцелений// и граду твоему великое утверждение.

Кондак святителя Московского Алексия
глас 8

Божественнаго и пречестнаго святителя Христова,/ новаго чудотворца Алексия,/ верно вси поюще, людие, любовию да ублажим, яко пастыря великаго,/ служителя же и учителя премудра земли Российстей./ Днесь, в память его притекше, радостно возопием песнь богоносному:/ яко имея дерзновение к Богу, многообразных нас избави обстояний, да зовем ти:// радуйся, утверждение граду нашему.

Ин тропарь Алексия, митрополита Московского и всея России
глас 8

Яко светоносная возсия днесь память твоя, славне,/ верных озаряющи души и телеса,/ и исцеления струй Богоприятными ти молитвами источаеши,/ отче святителю Алексие,/ темже тя молим, яко архиереом сопрестольна и чудодейственника изрядна,/ иже Христову Престолу предстояй,/ о нас не оскудевай моляся спастися душам нашим.

20 мая (Обретение мощей)

Тропарь святителя Алексия
глас 2

Яко сокровище пребогатое, многолетно в земли сокровенное,/ честныя мощи твоя обретошася чудоточащия,/ всеблаженне отче святителю Алексие,/ от нихже врачевство приемлюще, обогащаемся/ и Христа славословим, глаголюще:// слава прославляющему святыя Своя.

Кондак святителя Алексия
глас 8

Яко солнце незаходимое, от гроба возсия нам/ от мног лет сокровены честныя твоя мощи нетленны,/ святителю Алексие,/ тобою благодать приемлем,/ всю бо страну сию и вся ны чудесы и добротою обогащаеши,/ действом благодати, да поем ти:// радуйся, отче, светило России.

Ин тропарь святителя Алексия, митр. Московского и всея России, чудотворца
глас 4

Апостольских преемников архиереев сопрестольниче,/ России всея пастырю и учителю,/ всеблаженне отче Алексие,/ Владыце всех молися/ мир пастве твоей даровати,/ и спасение душам,/ и велию милость.

Ин тропарь святителя Алексия, митр. Московского и всея России, чудотворца
глас 3

Свыше от Бога глас глаголющ услышав,/ от юности подвизався, мудре,/ в молитвах, и во умилении, и слезах,/ во бдениих же и пощениих образ быв добродетели,/ отонюдуже и дом Духу Пречистому явися./ Сего ради Русския митрополии архиерейским саном почтен быв,/ Христово стадо упасл еси добре,/ еретическая нападения, не усумнеся, отрази/ и церкви воздвиже Христови, святителю Алексие,/ иночествующих лики собра/ и сих Христови привел еси./ Умре же, явися, яко спящ,/ цел соблюден бысть пред многими леты,/ подавая цельбы болящим./ Тем молим тя:/ моли Христа Бога спасти град твой Москву неврежден/ и страну и православный люди по велицей Его милости.

Ин кондак святителя Алексия, митр. Московского и всея России, чудотворца
глас 3

Яко светоносная память святителя/ всем разруши уныние/ и свет облиста Небесных даров,/ всех созывающи на веселие:/ от Бога бо, святителю Алексие, благодать обрете прогонити недуги/ и вся человеки исцеляти,/ и мнихом же степень показася.

5 октября (Моск. Свт.)

Тропарь святителей Московских
глас 4

Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.

Кондак святителей Московских
глас 3

Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.

Величание

Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.

Житие святого отца нашего Алексия, митрополита Московского и всея России чудотворца
Акафист митрополиту Алексию, святителю Московскому и всея России чудотворцу

« предыдущая икона :: следующая икона »




... Добавить в "Закладки" ... Ctrl+D


Для пожертвований:

Да хранит Вас Господь!

Православные информеры для сайтов и блогов